1 Samuel 22:1-23
22 Tsaypita David aywakushpanmi Adulam machayman pakakurqan.* Tsayta musyaykurmi wawqinkuna y wakin aylunkunapis pay kaqman aywapäkurqan.
2 Tsaynöpis payman qelikurqan waktsa runakuna, jaqanta pägananpaq mana aypäpakuq runakuna y jaqayashqa runakunapis. Tsaynöpami Davidpa munaynincho karqan chusku pachak (400) runakuna.
3 Tsaypitanami Moab nacioncho kaq Mizpa markaman David aywaykushpan tsay markapa mandaqnin reyta kayno ruwakurqan: “Tayta Dios imano yanapamänanpaq kashqantapis musyakänäyaq mamä y taytä makikicho taykälätsun, tayta”.
4 Ruwakushqanta awniptinmi machaylacho David pakarashqanyaq Moab nacionpa mandaqnin reypa makincho maman y taytan tarqan.
5 Tsaypitanami Tayta Diospa profëtan Gad kayno nirqan Davidta: “Kaylachöqa manami pakaräkunkimantsu. Kutikuy Judá partiman”.
Tsayno niptinmi David aywakurqan Haretcho kaykaq muntiman.
Nob markacho taq cürakunata Saúl wanutsishqan
6 Tsaypitanami Judácho David kaykashqanta Saúl musyarqan. Tsay junaq Gabaacho kaykaq jirkanman Saúl aywaykur tamarisco yöra sikincho lanzan aptashqa jamaraykarqan. Paywanmi soldädunkunapa lapan capitanninkunapis kaykarqan.
7 Paykunatami Saúl kayno nirqan: “¡Benjamín trïbu runakuna, shumaq mayapäkamay! ¿Üva plantashqa chakrakunata y wakin chakrakunatapis Isaípa tsurin* qoshunaykipaq kashqantaku yarparkaykanki? Tsaynöpis ¿waranqa (1,000) soldädunkunapa o pachak (100) soldädunkunapa mandaqnin churashunaykipaq kashqantaku yarparkaykanki?
8 ¡Tsayno kaykaptinpis qamkunaqa lapaykimi conträ sharkapäkushqanki! Tsaymi mayqaykipis mana wilamashqankitsu imaypis yanapanakunanpaq Isaípa tsurinwan tsurï Jonatán *pactuta rurashqanta. Manami mayqaykipis wilamashqankitsu ashmaynï* conträ sharkunanpaq kikïpa tsurï yanapaykashqanta. Tsaymi kananqa ashiykäman wanutsimänanpaq”.
9 Edom nacionpita Doeg runapis Saúlpa capitanninkunawanmi tsaycho kaykarqan. Paymi kayno nirqan: “Isaípa tsurintaqa Ahitobpa tsurin Ahimelecwan Nob markacho parlaykaqtami rikashqä.
10 Imata rurananpaq kashqantapis David musyayta munaptinmi TAYTA DIOSTA Ahimelec tsay höra manakurqan. Nirkurnami Goliatpa espädanta y mikuytapis kamaripashqa”.*
11 Tsayno niptinmi Ahimelecta y lapan cüra mayinkunatapis Nob markapita Saúl qayatsimurqan. Paykunaqa tsay aylulami lapan karqan. Chayaykuptinmi
12 Saúl rabyashqa kayno nirqan: “¡Ahitobpa tsurin, shumaq mayamay!”
Tsayno niptinmi Ahimelecqa kayno nirqan: “Makiki chakikichömi kaykä, tayta”.
13 Tsawraqa Saúl kayno nirqan: “¡Imanirtaq Isaípa tsurinwan parlakushqanki conträ sharkunanpaq! ¡Nirkurpis payta kamaripashqanki mikuyta y espädata! Tsaynöpis Tayta Diosta manakushqanki yanapananpaq. Tsaymi kananqa wanutsimänanpaq ashiykäman”.
14 Tsawraqa Ahimelec kayno nirqan: “¿Imanirtaq yarpaykanki contrayki sharkushqanta? ¿Manaku lapan capitannikipitapis Davidqa mandashqaykikunata ruran? Tsaynöpis payqa mashaykimi kaykan. Tsaynöpis rikashuqniki soldädukunapa capitannin kaptinmi pïmaypis palaciuykicho payta ali rikan.
15 Manami kananraqtsu paypaq Tayta Diosta manakuykä. Tsaynöpis manami musyashqätsu David contrayki sharkushqanta. Mana musyaykaptïqa noqata ni aylükunatapis ama jitapämaytsu”.
16 Tsaymi fiyupa rabyashpan Saúl kayno nirqan: “¡Ahimelec, kananmi itsanqa hörayki chayamushqa lapan ayluykikunawan wanunaykipaq!”
17 Tsayno nirmi rey Saúlqa rikaqnin soldädukunata kayno nirqan: “¡TAYTA DIOSTA sirviq cürakunata wanutsipäkuy! Paykunapis Davidpa favorninmi karkaykan. David qeshpiykashqanta musyaykarpis paykunaqa manami wilakatsimashqatsu”.
Tsayno niptinpis cürakunata wanutsiyta mantsakurqanmi.
18 Tsaymi rey Saúlqa Edom aylu Doegta kayno nirqan: “¡Qam wanutsiy!”
Niptinmi pusaq chunka pitsqa (85) cürakunata wanutsirqan. Tsay cürakunaqa lïnupita rurashqa *efodnin jatishqami karkaykarqan.
19 Tsaypitanami Nob markaman aywaykur Doegqa cürakunapa aylunkunata espädawan wanutsirqan olqutapis, warmitapis, wamratapis y ititapis. Tsaynölami wanutsirqan tsay cürakunapa wäkankunata, bürrunkunata y uyshankunatapis.
20 Tsay junaqmi Ahimelecpa juk tsurin Abiatar qeshpir David kaykashqan kaqman aywarqan.
21 Chayaykushpanmi wilarqan Saúl mandaptin TAYTA DIOSTA sirviq cürakunata wanutsishqanta.
22 Tsayno wilaptinmi David kayno nirqan: “Edom aylu Doegta Nobcho rikar maliciarqämi Saúlta wilananpaq kashqanta. Noqami jutsayuq kaykä ayluykikunata wanutsipäkunanpaq.
23 Ama mantsakuytsu. Kananqa kaycho noqakunawan täkuy. Noqawan kaykaptikiqa manami pipis wanutsishunkipaqtsu. Ishkantsitami wanutsirqa wanutsimäshun”.
Ichic wilacuycuna
^ 22.7 Isaípa tsurinqa Davidmi karqan.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 22.8 Ashmayninpita parlarqa Davidpitami Saúl parlarqan.
^ efod Efodqa cüra jatikunan mandilmi karqan. Tsaytaqa Israelcho mas mandaq cürami röpan jananman jatikuq (Éxo. 28.6-14). Tsay efodchömi laqararqan chunka ishkay rumikuna. Cada rumichömi kaykarqan Israel trïbupa juk jutin. Wakin runakunapis mas jukniraq efodta jatikuqmi. Tsay runakuna karqan Samuel (1Sam. 2.18), David (2Sam. 6.14), Nobpita kaq cürakuna (1Sam. 22.18) y Micaía (Jue. 17.5).
