1 Samuel 25:1-44
25 Samuel wanuptinnami lapan Israel runakuna juntakaykur waqashpan tashqan Ramá markancho pampapäkurqan. Tsaypitanami David aywakurqan Parán* chunyaq jirkaman.
Davidta Nabal rabyanätsishqan
2 Maón partichömi tarqan Nabal jutiyuq rïcu runa. Paypami karqan kimsa waranqa (3,000) uyshankuna y juk waranqa (1,000) cabrankuna. Paymi Carmel marka lädun jalqancho milwata rutuykätsirqan.
3 Nabal karqan Caleb aylumi. Payqa karqan mana tantiyakuq y fiyu runami. Warmin Abigailmi itsanqa karqan kuyaylapaq y tantiyakuq.
4 Carmelcho uyshankunata Nabal rutuykätsishqanta musyarmi
5 chunka yanapaqninkunata qayaykur David kayno nirqan: “Carmelman aywaykur Nabalta jutïcho winchikushpayki
6 kayno ninki: ‘Ayluykita y qamtapis Tayta Dios yanapaykuläshunki. Tsaynöpis lapan aruynikicho Tayta Dios yanapaykuläshunki.
7 Tayta Nabal, uyshaykita rutuykätsishqaykitami David musyashqa. Carmel particho uyshaykita mitsiqkuna noqakunawan kaykashqan witsan manami paykunata rabyanätsishqätsu ni imaykantapis yatapashqätsu.
8 Ashmaynikikunata tapuptikipis nishqänöla kashqantami wilashunkipaq. Davidqa kuyay tsurikinöshi kaykan. Tsaymi fiestacho kaykashqaykita musyar ruwakushushpayki kachapäkamashqa imalatapis voluntänikipita qepipaykamänaykipaq’ ”.
9 David tsayno yätsirkuptinmi yanapaqninkuna Nabalman chayaykur nishqannöla wilapäkurqan. Nirkur shuyarpaykarqan imata ninantapis.
10 Tsaynami Nabal kayno nirqan: “¿Pitaq Davidqa? ¿Pitaq Isaípa* tsurinqa? Payqa patronninpita qeshpiykurmi tsayno puriykan. Kanan witsanqa ashmaykuna atskaqmi tsayno purirkaykan.
11 Uysha rutuqnïkunalapaqmi tantata ruratsishqä, yakuta kamaripashqä y aytsata yanukatsishqä. Manami qarämantsu mana reqishqä purikuq runataqa”.
12 Tsayno niptinmi Davidpa yanapaqninkunaqa jinayla kutikärirqan. Chayaykushpannami Nabal imata nishqankunatapis Davidta wilaparqan.
13 Tsaymi David pasaypa rabyashpan espädanta kamarirkur paywan kaykaq runakunata kayno nirqan: “¡Lapayki espädaykita kamarikäriy!”
Nirkurnami chusku pachak (400) runakunawan David aywarqan Nabal kaqman. Ishkay pachak (200) runakunanami campamentuta täpapäkurqan.
14 Tsayman aywaykashqanta musyaykurmi Nabalpa juk ashmaynin Abigailta kayno nirqan: “Chunyaq jirkapitami wilakuqninkunata David kachamushqa patronnïta winchikunanpaq. Jina kaqtami patronnïqa fiyupa rabyakushpan olqüpashqa.
15 Mitsikur puripäkuptï paykuna alimi yanapamashqa. Manami rabyatsipäkamashqatsu ni imaykäkunatapis qechupäkamashqatsu.
16 Tsaypa trukanqa junaqpapis tsakaypapis uyshäkunata y noqakunatapis y alimi rikapäkamashqa.
17 Capazchari patronnïtapis y noqantsitapis David ushakätsimäshunpaq. Runayki malgeniu kar imata niptintsipis manami cäsumäshuntsu. Kananqa shumaq yarpachakuy imata ruranaykipaqpis”.
18 Tsayno wilaptinmi Abigailqa jukla alistarqan ishkay pachak (200) tantata, ishkay barril vïnuta, kankashqa pitsqa uysha aytsata, kimsa arröba pulan ankashqa trïguta, pachak (100) päsas tantata y ishkay pachak (200) hïgus tantata.* Tsaykunata kamarikurkurmi bürrukunaman cargakurkur
19 ashmayninkunata kayno nirqan: “Kay cargakunata qatikurkur qamkuna nawparkaykay. Qepaykitanami noqa shamushaq”.
Tsaykunata rurarqan runan Nabalta mana wilapaylapami.
20 Bürrun muntashqa pakaylapa jalqapita uraykämushqanchömi Abigail rikarqan runakunata pushashqa David aywaykämuqta.
21 Davidnami aywaykarqan kayno yarpachakushpan: “Manakaqlapaqchari chunyaq jirkacho Nabalpa imaykantapis mana yatapakuylapa täpashqä. Nabalqa malgeniu karmi tsayjina yanapaykaptïpis noqataqa mana yanapamayta munantsu.
22 ¡Tayta Dios pasaypa castigamätsun Nabalwan kaykaq lapan runakunata wara tuta mana wanutsiptïqa!”
Davidta Abigail ruwakushqan
23 Davidwan tinkurnami Abigailqa bürrunpita urarpur nawpanman qonqurpakuykurqan urkunpis pampaman töpashqanyaq.
24 Tsayno qonqurpakuykurmi kayno nirqan: “Runä mana yarpachakuypa lutanta parlashqanpita perdonaykalämay, tayta. Kanan ruwakuptï mayaykalämay.
25 Jutinman tupumi Nabal malgeniu kaykan.* Payqa imaypis lutankunatami parlan. Payta ama cäsupaytsu, tayta. Noqaqa manami rikashqätsu kachamushqayki runakunata.
26 “TAYTA DIOS manami munashqatsu lapanïta wanutsimänaykita. Nabalta castigananpaq kashqannöla lapan chikishuqnikikunatapis TAYTA DIOS castigaykulätsun.
27 Kay apamushqä mikuyta yanapashuqniki runakunawan mikurkulay.
28 Noqatapis perdonaykalämay, tayta. Qamqa TAYTA DIOS rayku pelyar purishqaykipitami Israel runakunapa mandaqnin rey kankipaq. Tsaynölami qampita miraqkunapis rey kanqa. Kawashqaykiyaqqa manami pipis yataylapis yatashunkipaqtsu.
29 Pipis wanutsishunaykipaq qatikachäshuptikiqa TAYTA DIOSMI tsapäshunkipaq. Warakawan rumita warakaqnömi chikishuqniki runakunata juk läduman qarqunqa.
30 TAYTA DIOS promitishushqaykita cumplirmi Israel runakunapa mandaqnin rey kanaykipaq churashunkipaq.
31 “Noqakunata wanutsimarqa rey kanaykipaq yaykur maläyankipaqmi kayno nir: ‘¿Imanirtaq tsay runakunata wanutsishqä? ¿Imanirtaq mana shuyarashqätsu kikin Tayta Dios paykunata juzgananpaq?’ Rey kanaykipaq TAYTA DIOS churashuptiki noqalätapis yarparkalämanki, tayta”.
32 Tsayno niptinmi David kayno nirqan: “¡Israel runakunapa Tayta Diosnin alabashqa kaykulätsun! Paymi kanan tinkunantsipaq kachamushushqanki.
33 Kanan junaqmi tsapämashqanki runakunata mana wanutsinäpaq. Tayta Diospa makinman kachaykunäpa trukan runakunata wanutsirqa lutantami ruräman karqan. Ali yarpayniyuq kashqaykipita Tayta Dios yanapaykuläshunki.
34 Jukla mana shamuptikiqa Nabalpa aylun kaqtaqa lapantami wanushqata warätsimüman karqan. TAYTA DIOSMI kachamushushqanki qamkunata mana wanutsinäpaq”.
35 Abigail apashqankunata chaskirkurmi David kayno nirqan: “Kananqa mana lakikuypana wayikipa kutikuy. Runaykita manami wanutsishaqnatsu”.
36 Tsayno niptinmi Abigail wayinpa kutikurqan. Chayaykunanpaqmi ali alilata yanukatsir reynöraq fiestata Nabal ruraykarqan. Pasaypa shinkashqa kaptinmi Abigail imatapis wilaparqantsu jukaqnin tutayaq.
37 Waraynin* tuta shinkashqanpita kachakashqa kaptinnami wilaparqan ima pasashqantapis. Wilapaptinmi Nabalta atäqui tsarikuykurqan.
38 Tsaypita chunka junaqlatami Tayta Diospa castïgunwan wanurqan.
Abigailwan David tashqan
39 Nabal wanushqanta mayaykurmi David kayno nirqan: “¡TAYTA DIOS alabashqa kaykulätsun! Paymi tsapämashqa Nabalta wanutsir jutsata ruranäpaqna kaykaptï. Manakaqman churamashqanpitami kikin TAYTA DIOS wanutsishqa”.
Abigailwan tayta munarmi yanapaqninkunata David kacharqan yarpashqanta wilananpaq.
40 Carmel partiman chayaykurmi Abigailta kayno nipäkurqan: “Davidmi qamwan tayta munaykan”.
41 Tsayno wilaptinmi urkunpis pampaman töpashqanyaq Abigail qonqurpakuykur kayno nirqan: “Tayta David tsayno niptinqa ashmayninkunapa chaki maylaqnilanpis kashaqchari”.
42 Tsayno nirmi jukla kamarikurkur bürrunta muntakurkur y pitsqa ashmaynin jipashkunata pushakurkur Davidpa yanapaqninkunawan Abigail aywarqan. Tsaynöpami Davidpa warminna karqan.
43 Tsaynölami Jezreel markapita kaq Ahinoam warmiwanpis David tarqan.
44 Davidpa warmin Micaltanami taytan Saúl tätsirqan Laispa tsurin Paltiwan. Palti karqan Galim markapitami.
