1 Samuel 26:1-25
26 Tsaypitanami Zif markacho taq runakuna Gabaa markaman aywaykur Saúlta wilapäkurqan kayno nir: “Chunyaq jirka tsimpan Haquila jirkanchömi David pakaraykan”.*
2 Tsaycho pakaraykashqanta mayaykurmi Zif chunyaq jirkaman Davidta ashinanpaq Saúl aywarqan kimsa waranqa (3,000) alinnin kaq soldädukunata pushakurkur.
3 Haquila jirkaman chayaykurmi näni nawpancho campamentunta Saúl sharkatsirqan. Davidnami paykunapa tsimpan chunyaq jirkacho pakaraykarqan. Tsaymanpis Saúl qatipaykashqanta mayaykurmi
4 runakunata David kacharqan chayashqanta o mana chayashqantapis musyapakamunanpaq.
5 Tsay runakuna kutiykamuptinmi Davidpis aywarqan Saúlpa campamentunman. Chayaykurmi rikarqan Nerpa tsurin capitán Abner y Saúl maynincho punushqanta. Tsaynöpis rikarqan Saúlpa soldädunkuna jiruruypa nawpancho punurkaykashqanta.
6 Rikaykurmi Davidqa heteo runa Ahimelecta y Sarviapa wawan Abisaita kayno nirqan: “¿Mayqanikitaq Saúl kaqman aywaptï yanaqämayta munanki?”
(Abisaiqa Joabpa wawqinmi karqan.)
Tsawraqa Abisai kayno nirqan: “Noqa yanaqäshayki, tayta”.
7 Tsawraqa tsay tsakay David y Abisai yaykapäkurqan Saúl kaykashqan kaqman. Tsaychömi Saúlta taripäkurqan jawnan nawpanman lanzanta jawiykur wanuyparaq punukashqa kaykaqta. Tsaynölami Abnerpis y soldädunkunapis paypa nawpancho wanuyparaq punukashqa kaykänaq.
8 Tsayno punurkaykaqta rikaykurmi Davidta Abisai kayno nirqan: “Tayta Diosmi makikiman churamushqa contrayki runata. Kachapaykamay kikinpa lanzanwan juk tuksiyla pasarpatsinäpaq”.
9 Tsayno niptinmi David kayno nirqan: “¡Ama wanutsiytsu! TAYTA DIOS akrashqantaqa manami wanutsishwantsu.
10 TAYTA DIOS destinashqan höraraqmi awkinyaypa karpis o guërracho karpis wanunqa.
11 Saúlta mana wanutsinäpaq TAYTA DIOS tsapaykamätsun. Tsaypa trukanqa jukla aywakunantsipaq jorqamuy jawnan nawpancho jawiraykaq lanzanta y yaku puritsikunantapis”.
12 Tsaynöpami Saúlpa lanzanta y yaku puritsikunanta apakurkur aywakärirqan. TAYTA DIOS paykunata wanuyparaq punukätsishqa kaptinmi mayqanpis mana mayarqantsu.
13 Nirkurnami Davidqa paykunapita karulata aywar wak tsimpa jirkanman witsarqan.
14 Tsaypitanami Abnerta y soldädunkunata qayakamurqan kayno nir: “¡Abner! ¡Rikchay!”
Tsawraqa Abner kayno nirqan: “¡Pitaq qam kanki reyman tsayno qayakamunaykipaqqa!”
15 Tsawraqa David kayno nirqan: “¿Manaku qamqa kanki ali chölu? Israel nacionchöqa manami pipis qamno ali chölu kantsu. Tsayno kaykarqa ¿imanirtaq reyta mana cuidashqankitsu? ¿Manaku mayashqanki payta wanutsinanpaq juk runa yaykamushqanta?
16 Cuidanaykipa trukanqa ¿imanirtaq wanuyparaq punushqanki? TAYTA DIOS akrashqan runata mana cuidapäkushqaykipita lapaykimi wanutsishqa kankiman. ¡Maski ashiy jawna kaqcho lanzanta y yaku puritsikunanta!”
17 Tsaymi David kashqanta tantiyar Saúl kayno nirqan: “David, ¿qamku qayakaykämanki?”
Tsayno niptinmi David kayno nirqan: “Tayta rey, noqami kaykälä.
18 Sirvishuqniki kaykaptï ¿imanirtaq wanutsimänaykipaq qatikachaykämanki? ¿Imatataq lutanta rurashqä?
19 Kanan nishqäta mayaykalämay, tayta. Conträ kanaykipaq TAYTA DIOS yarpayta qoshuptikiqa sacrificiuta *altarcho paypaqmi rupatsishaq. Conträ kanaykipaq runakunala shimita jatipäshuptikiqa TAYTA DIOS paykunata maldicionatsun. Paykunami jutsayuq karkaykan TAYTA DIOS qomashqantsi nacionpita qarqushqa kar jäpa markakunapa purinäpaq. Tsay runakunaqa munarkaykan tsay markakunacho adorashqan mana reqishqantsi dioskunata adoranätami.
20 Tsayno munaptinpis TAYTA DIOSPA nawpanpita karu markacho ¿imanirtaq wanüman? ¡Pikita ashiqno ashimarmi shamushqanki! ¡Tsakwatanömi jalqakunapa qatikachaykämanki!”
21 Tsawraqa Saúl kayno nirqan: “Qampa contrayki sharkur jutsayuqmi kaykä, hïju. Kutikamuyna. Manami wanutsishaykitsu. Upano lutanta ruraykaptïpis qamqa kuyapämar manami wanutsimashqankitsu”.
22 Tsayno niptinmi David kayno nirqan: “Kaychömi lanzaykita tsararaykä. Shuntananpaq juk ashmaynikita kachamuy.
23 Alita o mana alita rurashqantsipita TAYTA DIOSMI juzgamäshun. Tsaymi TAYTA DIOS akrashushqaykita musyar makïman churamushuptikipis mana wanutsishqätsu.
24 Kanan qamta respitar mana wanutsishqänöla noqatapis TAYTA DIOS tsapaykamätsun pipis mana wanutsimänanpaq. Tsaynöla ima nakaypitapis jorqaykalämätsun”.
25 Tsawraqa Saúl kayno nirqan: “¡David! TAYTA DIOS lapanchöpis alilata ruraykunaykipaq yanapaykuläshunki”.
Tsaypitanami David aywakuptin Saúlpis wayinpana kutikurqan.
Ichic wilacuycuna
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
