1 Samuel 27:1-12
27 Tsaypita David shonqulancho yarpachakurqan kayno nir: “Elaqpitachari Saúlqa imaypis wanutsimanqa. Mana wanutsimänanpaq filisteo runakunapa markanman aywakushaq. Tsayman aywakuptïqa mananami wanutsimänanpaq ashiykämanqanatsu. Tsaynöpami paypa makinpita qeshpishaq”.
2 Tsayno yarpachakushpanmi Davidqa soqta pachak (600) yanapaqnin runakunawan Gat markaman aywakärirqan. Tsay markacho rey kaykarqan Maocpa tsurin Aquismi.
3 Gat markachömi Davidpa yanapaqninkuna warminwan y tsurinkunawan tarqan. Tsaychömi Davidpis ishkan warminwan tarqan. Jukaq warminpa jutinmi karqan Ahinoam. Payqa karqan Jezreel markapitami. Jukaq warminpa jutinmi karqan Abigail. Payqa karqan Carmel markapita Nabalpa viüdanmi.
4 Gat markaman David aywakushqanta mayar Saúl manami ashirqannatsu.
5 Tsaypita juk junaqmi rey Aquista David kayno nirqan: “Lapan shonquykiwan chaskimashqa karqa mayqan markalatapis rikatsimay noqakuna tänäpaq. Tashqayki markalacho ashmarämaptikiqa manami alitsu kanqa”.
6 Tsayno manakuptinmi tsay junaqla Siclag markata rikatsirqan tsaycho tänanpaq. Tsaynöpami Siclag markatapis Judá nacionpa mandaqnin reykuna munaynincho tsararaykan.
7 Filisteo runakuna tashqanchömi David tarqan juk wata chusku killa.
8 Tsaycho tashpanmi Davidqa yanapaqnin runakunawan asaltaq aywapäkuq gesurita, gezrita y amalecita runakuna tashqan markakunaman. Tsay runakunaqa tarqan Telaim partipita Shur nishqan partiyaq. Tsay karqan Egipto lädupami.
9 Tsay markakunaman chayaykurmi warmitapis olqutapis lapanta wanuratsir uyshankunata, cabrankunata, wäkankunata, bürrunkunata, *camëllunkunata y röpankunatapis apakurkur rey Aquis kaqman kutikäriq.
10 Cadala tsayno rurarkur kutiptinmi Aquis tapuq kayno nir: “¿Mayqan markatanataq asaltapäkamushqanki?”
Tsayno tapuptinmi David lulapashpan nirqan Judá partipa aywar *Neguevcho taq runakunata asaltapäkamushqanta. Tsaynölami aybësis nirqan tsay läducho taq Jerameel runakunata asaltapäkamushqanta. Aybësisnami nirqan tsay läducho taq ceneo runakunata asaltapäkamushqanta.
11 Aquisman aywar pipis rasun kaqta mana wilapänanpaqmi Davidqa runatapis warmitapis chipyaq wanutsiq. Filisteo runakunapa markancho tashqan witsan tsaynölami imaypis David ruraq.
12 David nishqanta criyirmi rey Aquis kayno yarparqan: “Tsayno ruraptinqa Israel mayinkuna Davidta chikinqami. Tsayno rurarqa noqapa munaynilächömi imaypis kanqa”.
Ichic wilacuycuna
^ camëllu Camëlluqa jatunkaray uywami kaykan. Camëllukunataqa ashmapäkun maypapis aywar cargakunanpaq y muntakunanpaqmi. Tsaynöpis camëllupa milwanta putskarkurmi awapäkuq. Camëllupa milwanpitami Bautizaq Juanpa röpanpis karqan (Mat. 3.4; Mar. 10.25).
^ Neguev Neguevqa Israel nacionpa sur kaq lädunchömi kaykan. Neguevcho kaykan Beerseba, Siclag, Gerar y Arad markakunami. Neguevcho shumaq mana tamyaptinmi aläpaqa mana murukärintsu. Tsaymi tsay partichöqa uyshata y cabrata ashmakular täkärin (Gén. 24.62; Núm. 13.17; Jos. 11.16).
