1 Samuel 28:1-25
28 Tsay witsanmi filisteo runakuna juntakaykur aywapäkurqan Israel runakunata atacananpaq. Tsawraqa rey Aquis Davidta kayno nirqan: “Qam y qamwan kaykaq runakunapis guërraman aywaykäshilämay”.
2 Tsayno niptinmi David kayno nirqan: “Aywashun yanapanäpaq, tayta. Kananmi rikamanki imano pelyashqätapis”.
Tsawraqa Aquis kayno nirqan: “Tsayno kaptinqa noqata rikamänaykipaqmi churashayki”.
Endor markacho taq brüjaman rikatsikuq Saúl aywashqan
3 Tsay witsanqa Samuel wanushqanami karqan. Israel runakuna lüturmi markan Ramácho pampapäkurqan.* Tsaynöpis wanushkunapa almanwan parlaqkunata y brüjukunatapis Israel nacionpita rey Saúl qarqushqami karqan.*
4 Israel runakunawan pelyananpaqmi filisteo runakuna campamentuta rurapäkurqan Sunem markacho. Saúlnami Israel runakunawan campamentuta rurapäkurqan Gilboa jirkacho.
5 Filisteo soldädukuna juntakashqa kaykaqta rikaykurmi Saúl pasaypa mantsakäkurqan.
6 Tsawraqa imata rurananpaqpis TAYTA DIOSTA manakurqan. Manakuptinpis TAYTA DIOS manami imatapis nirqantsu ni sueñuyninchöpis, ni *Urim rumiwanpis ni profëtakunawanpis.
7 Tsaymi yanapaqninkunata Saúl kayno nirqan: “Ayway ashipäkamuy rikakuq warmita rikatsikuq aywanäpaq”.
Tsayno niptinmi kayno nipäkurqan: “Endor markachömi rikakuq warmi kaykan”.
8 Tsawraqa Saúl juk röpata jatikurkur ishkay yanapaqninkunawan tsakaypa aywarqan tsay warmi kaqman. Chayaykurmi kayno ruwakurqan: “Imano kanäpaq kashqantapis musyanäpaq wanushqa runapa almanta yuritsipaykalämay, mamïta”.
9 Tsayno niptin warmi kayno nirqan: “Qam musyankimi rey Saúl kay nacionpita lapan brüjukunata y wanushkunapa almanwan parlaqkunata qarqushqanta. Tsayno kaykaptinqa ¿imanirtaq wanushqa runapa almanta qayamunäta munaykanki? Tsayta manakamarqa noqatapis wanuymanchaq jitarpamanki”.
10 Tsayno niptinmi Saúl kayno nirqan: “TAYTA DIOSPA jutinchömi qamta promitï imapis mana pasashunaykipaq”.
11 Tsawraqa warmi kayno nirqan: “¿Pipa almanta yuritsimunätataq munaykanki?”
Tsaymi kayno nirqan: “Samuelpa almanta yuritsimunaykitami munaykä”.
12 Tsawraqa Samuelpa almanta rikaykur warmi qapachakurqan kayno nir: “¡Qamqa rey Saúlchaq kaykanki! ¡Imanirtaq lulapämashqanki, tayta!”
13 Tsaynami rey Saúl kayno nirqan: “Ama mantsakuytsu. ¿Imatataq rikaykanki?”
Tsawraqa warmi nirqan: “Patsa rurinpita alma sharkaykämuqtami rikaykä”.
14 Tsawraqa Saúl tapurqan: “¿Pï niraqtaq tsay sharkaykämuq kaykan?”
Niptinmi nirqan: “Tünican jatishqa awkin runami sharkaykämun”.
Samuel sharkaykämushqanta tantiyarmi Saúl qonqurpakuykurqan urkunpis pampaman töpashqanyaq.
15 Yuriparkurmi Samuel kayno nirqan Saúlta: “¿Imapaqtaq rabyanätsimar kayman qayatsimashqanki?”
Tsayno niptin Saúl kayno nirqan: “Filisteo runakuna conträ pelyananpaq shamuptinmi pasaypa lakikuykä. Tayta Diospis manakuptï manami imatapis nimantsu. Sueñuynïchöpis ni profëtakunapis manami imatapis nimantsu. Tsaymi qamta qayatsimushqä imata ruranäpaq kaqtapis tantiyatsimänaykipaq, tayta”.
16 Tsawraqa Samuel kayno nirqan: “TAYTA DIOS qampa contrayki kaykaptinqa ¿imapaqnataq imatapis tapukamanki?
17 TAYTA DIOS nimashqanta wilashqänölami lapanpis pasaykäshunki. Tsaymi rey kaykashqaykipita jorqushushpayki Davidtana churashqa Israel runakunapa mandaqnin rey kananpaq.*
18 Tsayno jorqushushqanki ‘amalecita runakunata ushakätsiy’ nishuptikipis mana ushakätsishqaykipitami.*
19 Tsaymi Israel soldädukunata filisteo runakunapa makinman TAYTA DIOS entreganqapaq. Tsaycho qamtapis y tsurikikunatapis wanutsishuptikimi wara junaq noqa kashqä kaqman chayamunkipaq”.
20 Tsayno niptinmi Saúl pasaypa mantsakar pampaman tunikurqan. Juk junaq y juk tsakay imatapis mana mikushqa karmi pasaypa almatakashqa karqan.
21 Pasaypa mantsakashqa kaykaqta rikarmi tsay warmi witiykur kayno nirqan: “Wanunäpaq kashqanta mantsakuykarpis ruwakamaptikimi Samuelpa almanta yuritsimushqä, tayta.
22 Ashmayniki kaykaptïqa kanan nishqäta mayaykalämay. Kawarirkunaykipaq mikurkulay. Nirkurnami pasakunkipaq”.
23 Tsayno niptinpis Saúl manami mikuyta munarqantsu. Yanapaqninkuna y tsay warmi yaparir yaparir ruwaptinraqmi pampapita sharkurkur bancuman jamakurqan.
24 Tsaymi tsay warmi yarqurir werannin turitunta pishtarir levadüraynaq tantatapis masararqan.
25 Nirkurmi Saúlman y yanapaqninkunaman tsay yanukushqan mikuyta apaparqan mikunanpaq. Tsayta mikurkurnami tsay tsakay aywakärirqan.
Ichic wilacuycuna
^ 28.3a 1Sam. 25.1.
^ 28.3b Lev. 20.27; Deut. 18.10-11.
^ Urim y Tumim Urim y Tumimqa rumikunami karqan. Tsay rumikunaqa mandaq cürapa pechëran rurinchömi winararqan. Tsay rumikunawanmi mandaq cüra suertita rikaq Tayta Dios imata munashqantapis musyananpaq (Éxo. 28.30; Esd. 2.63; Neh. 7.65).
^ 28.17 1Sam. 15.27-29.
^ 28.18 1Sam. 15.3-9.
