1 Samuel 30:1-31
30 Tsaypita kimsa junaqta Siclag markaman chayarmi taripäkurqan wayinkuna rupatsishqa kar raqälana kaykaqta. David ilashqanyaqmi amalecita runakunaqa *Neguevman yaykushpan Siclag markatapis rupatsipäkurqan.
2 Tsaynölami tsaycho kaykaq warmikunata y wamrakunatapis mana wanutsiylapa lapanta prësu apakärirqan.
3 Wayinkuna rupashqa kaykaqta tariykur y warminkunata y wamrankunata mana tariykurmi
4 Davidqa yanapaqninkunawan iktsushqanyaq waqapäkurqan.
5 Tsaynölami Davidpa ishkan warminkunatapis amalecita runakuna prësu apakärirqan. Jukaq warminmi karqan Jezreel markapita kaq Ahinoam y jukaq warminnami karqan Carmelpita kaq Abigail. Abigailqa Nabalpa viüdanmi karqan.*
6 Tsurinkunata amalecita runakuna prësu apakushqa kaptinmi yanapaqnin runakuna pasaypa rabyakur Davidta saqmayta munapäkurqan. Tsayno rabyakuptinmi David fiyupa lakikur TAYTA DIOSTA manakurqan.
7 Tsawraqa Ahimelecpa tsurin cüra Abiatarta* David kayno nirqan: “*Efodta makyaykalämay”.
Efodta makyaykuptinmi
8 TAYTA DIOSTA David manakurqan kayno nir: “¿Asaltantikunapa qepanta aywämanku? Jukla aywarqa ¿paykunata taripäshaqtsuraq?”
Tsayno manakuptinmi TAYTA DIOS kayno nirqan: “Taripänaykipaq paykunapa qepanta jukla ayway. Tsaynöpis lapan apakushqantami kutitsimunkipaq”.
9 Tsayno niptinmi Davidqa soqta pachak (600) yanapaqnin runakunata pushakurkur Besor raqraman chayapäkurqan.
10 Pasaypa utikashqa kar mayuta päsayta mana kamäpakurmi ishkay pachak (200) runakuna tsaycho quëdakurqan. Chusku pachak (400) runakunami itsanqa Davidwan aywarqan amalecita runakunata qatipar.
11 Aywarkaykashqanchömi taripäkurqan Egiptupita juk runa bëtashqa jitaraykaqta. Tsay runata David kaqman chayaykatsirmi qarapäkurqan tantata y yakuta.
12 Tsaynöpis qararqan juk hïgus tantata y ishkay päsas tantata.* Tsaykunata mikurkuptinmi kalpan yurirkurqan. Tsay runaqa manashi mikurqantsu ni yakutapis upurqantsu kimsa paqas y kimsa junaq.
13 Tsaypitanami David tapurqan kayno nir: “¿Pipa ashmaynintaq kaykanki y maypitataq shamushqanki?”
Niptinmi kayno nirqan: “Amalecita runapa ashmayninmi kaykä. Kimsa junaqnami pasaypa qeshyaptï patronnï kachariykamar aywakushqa.
14 Noqakuna asaltapäkamushqä Neguevcho taq cereteo runakunata, Judá runakuna tashqan wakin markakunata y Calebpita miraq runakuna tashqan markakunatami. Tsaypita kutimurmi Siclag markatapis rupatsipäkushqä”.
15 Tsawraqa David kayno nirqan: “¿Pushamankimanku tsay runakuna kaykashqanman?”
Niptinmi tsay Egipto runa kayno nirqan: “Mana wanutsimänaykipaq ni patronnïman mana kutitsimänaykipaq Tayta Diospa jutincho jurar promitimaptikiqa pushashaykimi”.
16 Tsay runa pushaptin chayapäkunanpaqqa amalecita runakuna mashtakaykurmi mikur upur fiestata rurarkaykarqan. Tsayno rurarkaykarqan Judácho y Filisteacho taq runakunata asaltar imaykatapis shuntashqanpita kushikurmi.
17 Tsayno kaykaqta tariykurmi Davidqa yanapaqninkunawan tsay runakunata juk junaq qoyati jukaqnin tardiyaq wanutsipäkurqan. Chusku pachak (400) mözukunalami *camëllunkunata muntakurkur qeshpipäkurqan.
18 Tsaynöpami amalecita runakuna apashqankunata lapanta David qechumurqan. Tsaynölami ishkan warminkunatapis shuntamurqan.
19 Paykunata lapanta shuntamuptin manami pishirqantsu ni jatunpis ni takshapis ni olqu wamrapis ni warmi wamrapis. Apashqan kaqkunataqa lapantami imaykantapis David shuntamurqan.
20 Tsaynöpis apashqan uyshankunata y wäkankunata lapantami David shuntamurqan. Shuntamushqan uywakunata kutitsirmi qatiqkuna kayno nipäkurqan: “¡Kay uywakunaqa Davidpaqnami kaykan!”
21 Besor raqraman chayaykuptin tsaycho quëdaq ishkay pachak (200) runakuna yarqur tariparqan Davidta y paywan aywaykaq runakunata. Tsay runakunaqa pasaypa utikashqa karmi amalecita runakunata qatipayta mana kamäpakur Besor raqracho quëdakärirqan. Paykunawan tinkurmi David kushikur winchikurqan.
22 Davidwan aywaq wakin fiyu runakunanami Davidta kayno nipäkurqan: “Noqantsiwan mana aywaq runakunaqa imatapis manami chaskinmantsu. Warminkunata y wamrankunalata pushakurkur aywakäritsun”.
23 Tsawraqa David kayno nirqan: “Wawqikuna, ama tsaynöqa rurashuntsu. TAYTA DIOSMI shuntamunantsipaq yanapamashqantsi. Tsaynöpis suwakunata vincinantsipaqmi yanapamashqantsi.
24 Qamkunaqa lutantami yarparkaykanki. Rakipänakushqantsi höraqa pulanpurami rakipänakushun qepita täpaqkunawanpis y pelyaman aywaqkunawanpis”.
25 Tsay junaqpita patsa kananyaqmi Israel runakuna guërrapita apamushqan kaqtaqa imatapis pulanpura rakipänakun.
26 Siclag markaman chayashpanmi imatapis shuntamushqan kaqkunapita rakirkur Judácho kaykaq mayor runakunapaq David apatsirqan. Apaqkunatami yätsirqan kayno ninanpaq: “TAYTA DIOSPA contran runakunata qechumushqätami qamkunapaq apaykätsimü”.
27 Tsaynölami apatsirqan Bet-elman, Neguev Ramotman, Jatirman,
28 Aroerman, Sifmotman, Estemoaman,
29 Racalman, Jerameel runakuna tashqan markakunaman, ceneo runakuna tashqan markakunaman,
30 Hormaman, Corasánman, Atacman
31 y Hebrónman. Yanapaqninkunawan nawpata chayashqan markakunamanqa lapanmanmi David apatsirqan.
Ichic wilacuycuna
^ Neguev Neguevqa Israel nacionpa sur kaq lädunchömi kaykan. Neguevcho kaykan Beerseba, Siclag, Gerar y Arad markakunami. Neguevcho shumaq mana tamyaptinmi aläpaqa mana murukärintsu. Tsaymi tsay partichöqa uyshata y cabrata ashmakular täkärin (Gén. 24.62; Núm. 13.17; Jos. 11.16).
^ 30.5 1Sam. 25.42-43.
^ 30.7 1Sam. 22.20-23.
^ efod Efodqa cüra jatikunan mandilmi karqan. Tsaytaqa Israelcho mas mandaq cürami röpan jananman jatikuq (Éxo. 28.6-14). Tsay efodchömi laqararqan chunka ishkay rumikuna. Cada rumichömi kaykarqan Israel trïbupa juk jutin. Wakin runakunapis mas jukniraq efodta jatikuqmi. Tsay runakuna karqan Samuel (1Sam. 2.18), David (2Sam. 6.14), Nobpita kaq cürakuna (1Sam. 22.18) y Micaía (Jue. 17.5).
^ 30.12 Tsay tantaqa manami harinapitatsu karqan, sinöqa päsaspita y hïguspitami.
^ camëllu Camëlluqa jatunkaray uywami kaykan. Camëllukunataqa ashmapäkun maypapis aywar cargakunanpaq y muntakunanpaqmi. Tsaynöpis camëllupa milwanta putskarkurmi awapäkuq. Camëllupa milwanpitami Bautizaq Juanpa röpanpis karqan (Mat. 3.4; Mar. 10.25).
