1 Samuel 4:1-22
4 Tayta Dios nishqankunatami lapan Israel runakunata Samuel wilapaq.
Tsay witsanmi Israel runakuna filisteo runakunawan pelyapäkunanpaq campamentuta sharkatsipäkurqan Eben-ezer cercancho. Filisteo soldädukunanami Afecman aywaykur campamentunta sharkatsipäkurqan.
2 Tsaychömi filisteo soldädukuna atacashpan Israel runakunata vincir chusku waranqatano (4,000) wanutsipäkurqan.
3 Israel runakuna pelyashqanpita campamentunman kutikäriptinmi mayor runakuna kayno nipäkurqan: “¿Imanirtaq TAYTA DIOS mana yanapamashqantsitsu filisteo runakunata vincinantsipaq? Yapay mana vincimänantsipaq Silo markapita apamushun TAYTA DIOSPA *Pactu Babulninta. Tsaynöpami TAYTA DIOS noqantsiwan kar yanapamäshun contrantsikunata vincinantsipaq”.
4 Tsawraqa runakunata kacharqan lapanta mandaq TAYTA DIOSPA Pactu Babulninta Silupita apamunanpaq. Babul janancho kaq ishkay *querubín chawpinchömi TAYTA DIOSPA trönun kaykan.* Pactu Babulta apamuptinmi Elípa tsurinkuna Ofni y Fineespis aywarqan.
5 TAYTA DIOSPA Pactu Babulninta campamentuman chayatsiptinmi Israel runakuna kushikuypita pasaypa qaparparqan qaqakunapis yachapashqanyaq.
6 Tsayno qaparpashqanta mayarmi filisteo soldädukuna kayno nipäkurqan: “Hebreo runakuna campamentuncho ¿imanirtaq fiyupa büllata ruraykämun?”
TAYTA DIOSPA babulninta chayatsishqanta musyaykurmi
7 filisteo runakuna pasaypa mantsakashpan kayno nipäkurqan: “¡Kaychi kaylaqa! ¡Israel runakunapa Diosninmi campamentunman chayashqa! Kananqa ¡imanöraq kaykuläshun! ¡Israel runakunapa Diosnin manami imaypis shamurqantsu contrantsi pelyananpaq!
8 ¿Imanöparaq munayniyuq Diosninpa makinpita qeshpiykuläshun? Paymi tukuy niraq desgraciawan Egipto runakunatapis chunyaq jirkacho ushakätsirqan.
9 Taytakuna, tsayno kaptinpis mana mantsakuypa pelyashun. Paykunata mana vinciptintsiqa manami ashmaynintsinatsu kanqa, sinöqa noqantsinami paykunapa ashmaynin kashunpaq. Tsayno mana kanantsipaq tseqlata chanaq wachkakurkur pelyashun”.
10 Filisteo soldädukuna vinciptinmi Israel runakunaqa qeshpir kutikärirqan campamentunman. Tsay pelyachömi filisteo soldädukuna kimsa chunka waranqa (30,000) Israel soldädukunata wanutsipäkurqan.
11 Vincirmi Tayta Diospa babulninta qechurkur Elípa tsurinkunata Ofnita y Fineesta wanutsipäkurqan.
Elí wanushqan
12 Benjamín trïbupita juk runa pelyapita qeshpir tsay junaqla chayarqan Silo markayaq.* Paymi pasaypa lakikushpan röpan rachishqa y umanman alpan winashqa chayarqan.
13 Chayananpaqqa Tayta Diospa babulninpaq pasaypa lakikushpanmi nänipa rikachakur Elí jamaraykarqan. Markaman tsay runa chayaykur pelyacho ima pasashqantapis wilaptinmi ataypa atar lapan waqapäkurqan.
14 Fiyupa waqarkaykashqanta mayarmi Elí kayno tapurqan: “¿Imanirtaq runakuna waqarkaykan?”
Tsaynami tsay runa Elíman jukla aywarqan ima pasashqantapis wilananpaq.
15 Tsay witsan Elíqa kaykarqan isqun chunka pusaq (98) watayuqmi. Nawin tsakaptin mananami reqikurqannatsu.
16 Tsawraqa tsay runa Elíta kayno nirqan: “Kanan junaqlami pelyapita qeshpimur chayamushqä”.
Tsayno niptinmi Elí tapurqan: “¿Imataq pasashqa tsay pelyacho, hïju?”
17 Tsawraqa wilarqan kayno nir: “Filisteo runakuna atacar tsaytsikata wanutsiptinmi Israel runakuna qeshpir aywakärishqa. Ofnita y Fineestapis wanutsipäkushqami. Tayta Diospa babulnintapis apakärishqami”.
18 Tayta Diospa babulninta apakushqanta wilaptinmi sillëtacho jamaraykashqanpita Elíqa ankalaypa punku nawpanman anchakarqan. Awkinna karmi cuerpun lasaptin kunkan pakiqpaq tunir jinan höra wanurqan. Paymi Israel runakunapa jueznin karqan chusku chunka (40) wata.
19 Tsaychömi tsurin Fineespa warminpis wachananpaq killan aypämushqana kaykarqan. Tsaymi Tayta Diospa babulninta apakushqanta y suedrunpis y runanpis wanushqanta mayaykuptin jinan höra wachay nanay tsarikuykurqan. Nanaywan qochpaykaptilanmi wawan yuririrqan.
20 Fineespa warmin wanuykaqtana rikarmi partërakuna kayno nirqan: “Ama mantsakuytsu. Olqutami wachashqanki”.
Tsayno nipäkuptinpis pitishqa karmi imatapis mana rimakurqannatsu.
21 Manaraq wanurmi tsay yuriq wawanpa jutinta churaparqan Icabod jutin kananpaq. Icabod ninanqa Tayta Diosmi kachariykamashqantsi ninanmi. Jutinta tsayno churaparqan Tayta Diospa babulninta apakuptin y runan y suedrun wanuptinmi.
22 Tsaypitana kayno nirqan: “¡Israel runakunatami Tayta Dios kachariykushqa! ¡Tayta Diospa babulnintami filisteo runakuna apakärishqa!”
Ichic wilacuycuna
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ querubín Querubinqa älayuq angilkunami karkaykan. Querubinkunatami Tayta Dios churarqan Edén huertata täpananpaq (Gén. 3.24). Tsaynölami Pactu Babulpa tsapanan jananchöpis qoripita rurashqa ishkay querubinkuna ichiraykarqan (Éxo. 25.18-22; Heb. 9.5). Salomón ruratsishqan templuchöpis ishkay querubinkunami qoriwan enchapashqa karqan. Tsay querubinkunapa altunmi karqan chusku metru pulan (1Rey. 6.23-29). Profëta Ezequielpis revelacionchömi querubinkunata rikarqan (Eze. 10.1-22; 41.18-19).
^ 4.4 Éxo. 25.17-22; Núm. 7.89.
^ 4.12 Pelyashqanpita Siluman karqan soqta lëwami.
