1 Samuel 5:1-12
5 Tayta Diospa babulninta filisteo runakuna qechurkur apakärirqan Eben-ezerpita Asdod markaman.
2 Tsaychömi *Dagón jutiyuq diosninpa templunman yaykaykatsir Dagón ïdulupa nawpanman churapäkurqan.
3 Waraynin* tuta Asdod runakuna templuman kutirmi taripäkurqan babulpa nawpancho Dagón upaksaraykaqta. Tsayno tariykurmi yapay kutitsirqan punta kashqanman.
4 Tsaypita jukaqnin tutapis Asdod runakuna kutishpan yapay taripäkurqan TAYTA DIOSPA babulninpa nawpancho Dagón upaksaraykaqta. Umanta y makinkunatanami taripäkurqan punku yaykunacho pakishqa jitaraykaqta.
5 Tsaypitami kananyaq Asdod cürakunapis ni mayqan runakunapis Dagón kashqan templuman yaykur punku yaykuna quiciunta jarupäkuntsu.
6 Tsaynölami Asdod runakunata y nawpan markakunacho taq runakunatapis chupuwan TAYTA DIOS fiyupa castigarqan.
7 Tsayno castigaptinmi Asdod runakuna kayno nirqan: “Israel runakunapa Diosninpa babulninta ama tsararäshunnatsu. Paykunapa Diosninmi castigaykämantsi noqantsitapis y diosnintsi Dagóntapis”.
8 Tsawraqa filisteo autoridäkunata qayaykatsir tapupäkurqan kayno nir: “Israel runakunapa Diosninpa babulninta ¿imatataq rurashun?”
Tsayno tapuptinmi kayno nipäkurqan: “Gat markaman apatsishun”.
Tsayno niptinmi filisteo runakuna Gat markaman apapäkurqan.
9 Tsayman apaptinmi tsaychöpis runakunata TAYTA DIOS castigarqan mantsakuypaq chupuwan. Tsay chupumi usharqan wamrakunapita qalaykur hasta awkinkunayaq.
10 Tsawraqa Tayta Diospa babulninta apapäkurqan Ecrón markaman. Chayaykatsiptinmi tsaycho taq runakuna pasaypa mantsakur kayno nipäkurqan: “¡Kaychi kaylaqa! ¿Imapaqraq Israel runakunapa Diosninpa babulninta apapämashqantsi? ¡Kananqa lapantsitachari ushakätsimäshun!”
11 Tsay markachöpis Tayta Dios castigaptinmi runakuna pasaypa mantsakurqan. Tsaymi Ecrón runakuna filisteo autoridäkunata qayaykatsir kayno nipäkurqan: “Israel runakunapa Diosninpa babulninta Israelman jukla kutitsipäkuy. Mana kutitsiptikiqa lapantsimi ushakäshunpaq”.
12 Mana wanuqkunami intëru cuerpuncho chupu yuriptin nanaywan pasaypa waqapäkurqan.
Ichic wilacuycuna
^ Dagón Dagónqa karqan filisteo runakuna adorashqan ïdulumi. Mikuyninkuna ali wayunanpaq kashqanta yarparmi tsay ïduluta adorapäkuq. Dios kashqanta yarpapäkuptinpis manami rasunpatsu dios karqan (Jue. 16.23; 1Sam. 5.1-7).
^ 5.3 Wakin runakunaqa warantin nipäkun.
