1 Samuel 6:1-21
6 Filisteo runakunaqa qanchis killami nacionnincho TAYTA DIOSPA babulninta tsararparqan.
2 Tsaypitanami cürakunata y brüjukunata qayaykatsir kayno nir tapupäkurqan: “¿Imatataq rurapäkushaq Israel runakunapa Diosninpa babulninta? Kutitsiyta munarqa ¿imanöpataq kutitsipäkushaq?”
3 Tsaymi kayno nipäkurqan: “Israel runakunapa Diosninpa babulninta kutitsirqa ama jinaylataqa kutitsipäkuytsu, sinöqa ima regälulawanpis kutitsipäkuy. Kutirkatsir aliyarmi musyapäkunki babulta apamushqaykipita Israel runakunapa Diosnin castigaykäshushqaykita”.
4 Tsaymi filisteo runakuna kayno tapupäkurqan: “¿Ima regäluwantaq kutitsipäkushaq?”
Tsawraqa kayno nipäkurqan: “Mandamaqnintsi reykunapis noqantsiwan iwal nakaykarqa pitsqa chupu niraqta y pitsqa ukush niraqta qoripita ruraykur apatsipäkuy. Tsaynöpami mandamaqnintsi reykuna pitsqa kaykaptinqa cada reypita juk qaraynin* kanqa.
5 Tsaykunata apatsipäkuy Israel runakunapa Diosninta respitar. Tsayno ruraptiki capazchari manana castigashushpayki murushqaykikunatapis mana ushakätsinqanatsu y diosnintsikunatapis mana talamanqanatsu.
6 Puyñu rinri ama kapäkuytsu. Mana wiyakuq karqa Egipto runakunano y mandaqnin Faraónnömi karkaykanki. Paykunaqa Israel runakunapa Diosnin pasaypa castigaptinraqmi yarqakamunanpaq Israel runakunata kacharimurqan.
7 “Kananqa mushuq carrëtata ruratsipäkuy. Nirkur imaypis mana yügushqa iti wawayuq ishkay wäkakunata yügurkur carrëtata watapäkuy. Wawankunatami itsanqa chikurätsinki.
8 Nirkurna Israel runakunapa DIOSNINPA babulninta churapäkunki carrëtaman. Tsaynöpis qoripita rurashqayki regälukunata juk cajonman winarkur babulpa nawpanman churapäkunki. Nirkur wäkakuna kikilan qarachashqa apakunanpaq kacharinki.
9 Wäkakuna aywaptin karu qepalanta qatipanki maypa aywashqantapis rikapäkunaykipaq. Israel nacioncho Bet-semesman aywaq nänipa apaptinmi musyashunpaq Israel runakunapa Diosnin castigaykämashqantsita. Juk nänipa aywaptinmi itsanqa musyashunpaq pay mana castigaykämashqantsita. Tsayno kaptinqa lapanpis pasananpaq kaqkunalami pasashqa kanqa”.
10 Cürakuna tsayno niptinmi wawayuq wäkakunata yügupäkurqan carrëtata qarachänanpaq. Wawantanami chikupäkurqan.
11 Nirkurnami TAYTA DIOSPA babulninta carrëtaman churapäkurqan. Tsaynöpis qoripita rurashqan chupu niraqta y ukush niraqta cajonman winarkur carrëtaman watapäkurqan.
12 Tsayno rurarkur qarquptinmi wawanpaq waqaraykar maypapis mana yeqaykachaypa wäkakuna carrëtata qarachashqa aywarqan Bet-semesman aywaq nänipa. Filisteo markakunapa mandaqnin reykunanami karu qepalanta qatiparqan Bet-semespa lindërunyaq.
13 Bet-semes runakunaqa pampacho trïguta ëraykashqancho rikachakur rikarqan Tayta Diospa babulninta wäkakuna qarachashqa yaykaykätsiqta. Tsayta rikarmi pasaypa kushikärirqan.
14 Josuépa chakrancho kaykaq jatunkaray rumi kashqanman chayaykurmi wäkakuna ichikaykärirqan. Bet-semes runakunanami carrëtata tseqtarir tsay wäkakunata pishtarkur TAYTA DIOSTA agradëcikushpan sacrificiuta rupatsirqan.
15 Manaraq rupatsirmi Leví trïbu runakuna carrëtapita jorqapäkurqan TAYTA DIOSPA babulninta y cajoncho kaykaq qoripita rurashqa qarakuykunatapis. Babulta y cajontami jatun rumi jananman churapäkurqan. Tsaymi Bet-semes runakuna TAYTA DIOSTA adorapäkushpan kikinkunapa uywankunatapis tsay junaq rupatsipäkurqan.
16 Tsay rurashqanta rikaykurmi filisteo runakunapa pitsqa mandaqnin reykuna tsay junaqla Ecrón markaman kutipäkurqan.
17 TAYTA DIOSPAQ qoripita rurashqa chupu niraqkuna karqan Asdod, Gaza, Ascalón, Gat y Ecrón markakunapa mandaqnin reykunapitami.
18 Qoripita rurashqa pitsqa ukushkunaqa karqan filisteo runakunapa pitsqa murallashqa markankunapita y cercancho kaq caseriunkunapita. TAYTA DIOSPA babulninta churashqan jatun rumiqa kananyaqmi kaykan Josuépa chakran Bet-semescho.
Pactu Babulta Quiriat-jearimman apapäkushqan
19 TAYTA DIOSPA babulnin tsaycho kaptinmi wakin Bet-semes runakuna kicharkur rikapäkurqan. Tsaymi TAYTA DIOS wanutsirqan qanchis chunka (70)* runakunata. Tsayno wanuptinmi tsaycho taq runakuna pasaypa waqashpan
20 kayno nipäkurqan: “TAYTA DIOS *santu kaykaptinqa ¡piraq nawpancho* kawanman! ¿Maymanraq babulninta apaykatsishwan?”
21 Tsayno nishpanmi wilakuqkunata kacharqan Quiriat-jearimman kayno ninanpaq: “Filisteo runakunami TAYTA DIOSPA babulninta kutitsimushqa. Shapäkamuy apakärinaykipaq”.
Ichic wilacuycuna
^ 6.4 Wakin runakunaqa regälun nipäkun.
^ 6.19 Wakin hebreo copiakuna nipäkun pitsqa chunka waranqa qanchis chunka (50,070) runakunata wanutsishqanta.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 6.20 Israel runakuna nirqan babulpa nawpancho kar Tayta Diospa nawpancho kashqantami.
