2 Crónicas 1:1-17
1 TAYTA DIOS yanapaptinmi Davidpa tsurin Salomón intëru mandashqancho munayniyuq rikakurqan.
2 Israel autoridäkunata Salomón qayatsiptinmi juntakarqan soldädukunapa lapan capitanninkuna, juezkuna y Israel runakunapa cada aylupa mandaqninkunapis.
3 Paykunawanmi Salomón aywarqan Gabaón markacho kaykaq *altarman.
Tsaychömi karqan TAYTA DIOSWAN Tinkuna Toldu. Tsay toldutaqa TAYTA DIOSPA sirviqnin Moisésmi chunyaq jirkacho ruratsirqan.
4 Tayta Diospa babulninqa manami Tinkuna Tolduchötsu karqan, sinöqa Jerusaléncho David ruratsishqan tolduchönami. Tsay tolducho churaränanpaqmi Quiriat-jearim markapita Jerusalénman David apatsirqan.*
5 Hurpa wilkan y Uripa tsurin Bezaleel rurashqan bronci altarqa* Gabaónlachöraqmi kaykarqan. Tsay altar karqan TAYTA DIOSWAN Tinkuna Toldu nawpanchömi. Tsaymanmi Salomón lapan runakunawan Tayta Diosta manakuq aywapäkurqan.
6 TAYTA DIOSPA nawpancho kaykaq bronci altarchömi sacrificiuta rupatsir waranqa (1,000) uywakunata Salomón rupatsirqan.
7 Tsay tsakaymi Salomónta yuriparkur Tayta Dios kayno nirqan: “Imatapis manakamashqaykitami kamaripäshayki”.
8 Tsayno niptin Salomón kayno nirqan: “Tayta Dios, qamqa alimi yanapashqanki papänï Davidta. Kananqa noqatanami paypa trukan rey kanäpaq churamashqanki.
9 Mandashqä runakunaqa lamar kuchuncho aquyshanöraqmi yupaytapis mana atipaypaq karkaykan.* Tsaymi manakamü papänï Davidta promitishqaykinöla* yanapamänaykipaq.
10 Kuyashqayki Israel runakunata shumaq mandanäpaq ali yarpayta y yachayta qoykalämay. Yarpaynï shumaq mana kaptinqa tsaytsika runakunata manami mandayta kamäpakushaqtsu”.
11 Tsawraqa Tayta Dios kayno nirqan: “Kushikümi kuyashqä Israel runakunata shumaq mandanaykipaq ali yarpayta y yachayta manakamaptiki. Manami manakamashqankitsu rïcu kanaykipaq, respitädu kanaykipaq, contrayki runakunata ushakätsinäpaq ni atska wata kawanaykipaq.
12 Tsaymi manakamashqaykinöla yanapashayki ali tantiyakuq y yachaq kanaykipaq. Tsaynöpis yanapashayki rïcu kanaykipaq y ali respitashqa kanaykipaqmi. Punta kaq reykunapis manami qam kanaykipaq kashqannöqa kashqatsu. Tsaynölami qepa yaykuq reykunapis qammanqa mana tinkunqatsu”.
13 Nirkurnami Gabaón markacho Tinkuna Toldu kaykaqpita Jerusalénman Salomón kutikur Israel runakunata mandayta qalaykurqan.
Cawallukunata y carrëtakunata Salomón rantishqan
1 Reyes 10.26-29; 2 Crónicas 9.25-28
14 Salomón rantirqan tsaytsika carrëtakunata y cawallukunatami. Tsaynöpami paypa karqan juk waranqa chusku pachak (1,400) carrëtankuna y chunka ishkay waranqa (12,000) cawallunkuna.* Tsay cawallukunatami wakinta churarqan guërra carrëtakuna kaykashqan cuartilkunacho kananpaq y wakintana churarqan Jerusalén palaciun cercacho kananpaq.
15 Rey Salomón shuntatsishqan qoripis yoraq qellaypis shalanöraqmi Jerusaléncho tsaytsika karqan.* Tsaynölami cedru yöratapis Sefelacho* plantatsirqan hïgus yöranöraq tsaytsika kananpaq.
16 Salomón kachashqan negociantikunami Egiptupita y Ciliciapita cawallukunata rantimuq.*
17 Egiptupita rantimushqan juk carrëtami cuestaq soqta pachak (600) yoraq qellay y juk cawallunami cuestaq pachak pitsqa chunka (150) yoraq qellay. Tsay cawallukunata y carrëtakunatami wakintaqa rantikuq heteo runakunapa mandaqnin reykunata y wakintana rantikuq Siria runakunapa mandaqnin reykunata.
Ichic wilacuycuna
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 1.5 Éxo. 38.1-7.
^ 1.9a Gén. 13.16; 28.14.
^ 1.9b 1Crón. 17.11-14.
^ 1.14 1Rey. 4.26.
^ 1.15 Deut. 17.17.
^ Sefela Sefelaqa Israel nacioncho jirkan jirkan partimi kaykan. Sefelapita inti jeqanan lädupami Mediterraneo lamar kaykan. Sefelapita inti jeqamunan lädupanami jirkakuna kaykan. Norti lädupita sur kaq läduyaqmi Sefela kaykan chusku chunka pitsqa kilömetruno. Inti jeqamunan lädupita inti jeqanan läduyaqmi chunka soqta kilömetruno kaykan. Sefelacho chakrakuna ali kaptinmi mikuykuna ali wayun. Filisteo runakunawan pelyarmi Israel runakuna Sefelacho kaykaq markakunata y chakrakunata qechunakärirqan (Jos. 10.40; 12.8; 1Rey. 10.27; 2Crón. 28.18).
^ 1.16 Deut. 17.16.
