2 Crónicas 14:1-15
14 (13.23) Abías wanuykuptinmi *Davidpa Markanman pampapäkurqan. Paypa trukannami tsurin Asana rey karqan. Asa rey kaptinqa Judá nacioncho chunka wata jawkalami kawapäkurqan.
2 (1) Asa kawarqan TAYTA DIOS munashqannömi.
3 (2) Tsaymi juk lädu nación runakunapa diosninkunata adorapäkunanpaq rurashqan *altarkunata y markakunacho kaykaq altarkunatapis juchutsirqan. Adorapäkunanpaq ichitsishqan wankakunata y *Asera diösapaq jawishqan raku qerukunatapis pakirmi usharqan.
4 (3) Judá runakunatami nirqan unay aylunkuna yärakushqan TAYTA DIOSTA *ashir leyninkunata y mandamientunkunata cumplipäkunanpaq.
5 (4) Tsaynölami inciensuwan qoshtatsikuna altarkunata y wakin altarkunatapis Judácho kaq lapan markakunapita jorqutsirqan. Asa mandashqan witsanqa Judá nacioncho runakuna jawkalami kawapäkurqan.
6 (5) Jawkala kawananpaq TAYTA DIOS yanapaptinmi rey Asaqa Judá nacioncho markakunata altsarkatsir tumariq corralatsirqan.
7 (6) Judá nación runakunatami kayno nirqan: “Tayta Diosnintsita ashiptintsimi pay yanapaykämantsi nawpantsicho kaykaq nación runakunawan jawkala kawanantsipaq. Jawkala kawashqantsiyaq markantsikunata shumaq corralatsishun. Törrikunatapis cada markacho sharkatsir punkuntapis tanatsishun. Punkuta siguranantsipaq trancatapis churatsishun”.
Tsayno wilanakurkurmi lapanta shumaq ruratsirqan.
8 (7) Rey Asapa soldädunkuna karqan Judá trïbupita kimsa pachak waranqa (300,000). Cada soldädupami escüdunpis y lanzanpis karqan. Benjamín trïbupitanami karqan ishkay pachak pusaq chunka waranqa (280,000) soldädukuna. Paykunapapis escüdun y flëchan karqanmi. Paykunaqa lapanpis ali chölulantaqmi karqan.
9 (8) Tsaypitanami Judá nacionta atacananpaq Zera jutiyuq runa juk millón (1’000,000) soldädunkunata pushakurkur y kimsa pachak (300) guërra carrëtakunawan Etiopíapita Maresa partiyaq chayapäkurqan.
10 (9) Tsaymi Asapis paykunawan pelyananpaq soldädunkunata pushakurkur Maresapa nawpan Sefata pampaman aywaykur churanakurqan.
11 (10) Tsaychömi TAYTA DIOSTA manakur Asa kayno nirqan: “Tayta Dios, atska soldädü kaptinpis o walkala soldädü kaptinpis qam yanapamaptikiqa vincishaqmi. Tsaymi qamlaman yärakärishpä conträkunawan pelyanäpaq jutikicho shapäkamushqä. Qamlami Diosnï kaykanki, Tayta. Ama kachapaykuytsu conträkuna vincimänanta”.
12 (11) Tsayno manakuptinmi rey Asata y Judá runakunata TAYTA DIOS yanaparqan Etiopía runakunata vincipäkunanpaq. Vinciptinmi Etiopía runakunaqa qeshpir aywakärirqan.
13 (12) Qeshpiykaqta Gerar markayaq soldädunkunawan Asa qatipaykur wanutsiptinmi juklaylapis kawaykarqa quëdarqantsu. Nirkurmi wanushqa runakunapa imaykantapis apakärirqan.
14 (13) TAYTA DIOS tsayno yanapashqanta rikarmi Gerar nawpankunacho taq runakuna pasaypa *mantsakashqa rikakurqan. Tsaymi Judá runakunaqa Gerar nawpancho kaykaq markakunatapis atacar imaykankunatapis apakärirqan.
15 (14) Tsaynölami chakracho taq runakunata atacar uyshankunata y *camëllunkunatapis atskata apakärirqan. Nirkurmi Jerusalénman kutikärirqan.
Ichic wilacuycuna
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ Asera Aseraqa cananeo runakuna adorashqan diösami karqan. Paykunaqa yarpapäkurqan tsay diösa imatapis miratsiq kashqantami. Aserata adorananpaqmi raku qerukunata jawipäkuq. Cananeo runakunaqa yarpapäkurqan tsay jawishqan qerukunacho Asera kashqantami (Éxo. 34.13; Deut. 7.5; 12.3; 16.21; 1Rey. 16.33; 18.19; 2Rey. 13.6).
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ camëllu Camëlluqa jatunkaray uywami kaykan. Camëllukunataqa ashmapäkun maypapis aywar cargakunanpaq y muntakunanpaqmi. Tsaynöpis camëllupa milwanta putskarkurmi awapäkuq. Camëllupa milwanpitami Bautizaq Juanpa röpanpis karqan (Mat. 3.4; Mar. 10.25).
