2 Crónicas 16:1-14
16 Asa kimsa chunka soqta (36) watana rey kaykaptinmi Israel runakunapa mandaqnin rey Baasa soldädunkunawan aywarqan Judá nacionta atacananpaq. Ramá markata vincirkurmi tsay markaman soldädunkunata churar siguratsirqan Judápita tsayman pipis mana yaykunanpaq ni tsaypita Judáman pipis mana yarqunanpaq.
2 Tsaymi Asaqa TAYTA DIOSPA wayincho y palaciuncho churaraykaq qorita y qellayta jorqurir Siria nacionpa mandaqnin rey Ben-adadman apatsirqan. Ben-adadqa Damascuchömi taykarqan. Apatsirmi encargakurqan kayno ninanpaq:
3 “Rey Asami kayno nishunki: ‘Pipis atacaptin taytaykiwan taytä yanapanakunanpaq *pactuta rurashqanno noqantsipis yanapanakunantsipaq pactuta rurashun. Tsaymi yanapamänaykipaq apaykätsimü qorita y qellayta. Tsaynöpis manana atacamänanpaq Israel nacionpa mandaqnin rey Baasata ama yanapaynatsu’ ”.
4 Tsayno manakuptinmi rey Ben-adad awnishpan soldädunkunata y capitanninkunata kacharqan Israel nacioncho kaykaq markakunata atacananpaq. Atacarmi acapararqan Ijón, Dan y Abel-maim markakunata. Neftalí trïbu runakuna tashqancho mikuy churakuna markakunatapis lapantami acapararqan.
5 Tsay markakunata atacashqanta musyaykurmi rey Baasaqa Ramá markacho cuartilta sharkatsinanpaq shuntatsishqankunata kachariykur aywakurqan.
6 Tsaymi rey Asaqa lapan Judá runakunata Ramáman qayatsirqan. Chayaptinmi Ramá markata corralaraq rumikunata y qerukunata apapäkurqan Geba y Mizpa markakunaman. Tsaykunawanmi tsay markakunata altsatsirqan.
7 Tsay witsanmi Tayta Diospa profëtan Hanani Judá nacionpa mandaqnin rey Asa kaqman aywaykur kayno nirqan: “TAYTA DIOSMAN yärakunaykipa trukan ¿imanirtaq Siria nacionpa mandaqnin reyman yärakushqanki? Kananpitaqa tsay reyta manami imaypis vincinkipaqtsu.
8 ¿Manaku yarpanki Libia runakunawan Etiopía runakuna juntakaykur tsaytsika soldädunkunawan y tsaytsika cawallunkunawan y carrëtankunawan atacashunaykipaq shamushqanta? Tsayno kaykaptinpis TAYTA DIOSMAN yärakuptikimi paykunata vincinaykipaq yanapashurqayki.*
9 “TAYTA DIOSQA kay patsacho lapan runakunatami rikaykan lapan shonqunwan payman yärakuqkunata yanapananpaq. Ben-adad yanapashunaykipaq pägarqa upa ruranantami rurashqanki. Tsaymi kananpitaqa guërralachöna kankipaq”.
10 Tsayno niptin rey Asaqa fiyupa rabyakushpan Tayta Diospa profëtanta carcilman prësu wichqatsirqan. Tsaynölami Jerusaléncho taq wakin runakunatapis pasaypa nakatsirqan.
Asa wanushqan
1 Reyes 15.23-24
11 Rey Asa rurashqankuna qalaykunanpita ushananyaq lapanmi qelqaraykan Judá nacionpa y Israel nacionpa mandaqnin reykunapa acta libruncho.
12 Kimsa chunka isqun (39) watana rey kaykaptinmi Asata chaki nanay tsarikuykurqan. Tsaywan qeshyarpis TAYTA DIOSMAN yärakunanpa trukanqa mëdicukunalamanmi yärakurqan.
13 Chusku chunka juk (41) watana rey kaykarmi Asa wanurqan.
14 Wanuykuptinnami *Davidpa Markancho kikin uchkutsishqan sepultüraman tsutaykurqan. Nirkurmi aya jananman winaparqan yachaq runakuna rurashqan tukuy niraq perfümikunata y ali asyaq* jachakunata. Tsayno rurarkurmi wanuqpa jutincho atska yantata qotuykur ninata ratatsirqan.
Ichic wilacuycuna
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 16.8 2Crón. 14.9-15.
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
^ 16.14 Wakin runakunaqa mushkuq nipäkun.
