2 Crónicas 19:1-11
19 Judá nacionpa mandaqnin rey Josafat Jerusaléncho kaykaq palaciunman guërrapita kutiykaptinmi
2 Hananipa tsurin profëta Jehú taripaykur kayno nirqan: “¡Imanirtaq fiyu runata yanapar pelyaq aywashqanki! ¡Imanirtaq TAYTA DIOSPA contran runakunapa amïgun kanki! Tsayno rurashqaykipitami TAYTA DIOS pasaypa rabyashqa kaykan.
3 Imano kaptinpis *Asera diösapaq jawishqan raku qerukunata kay nacioncho ushakätsishqaykiqa alimi kaykan. Tayta Diosman yärakur payta *ashishqaykipis alimi kaykan”.
Juezkunata Josafat churashqan
4 Josafatqa Jerusaléncho tarpis Beersebapita qalaykur Efraín jalqakunayaq markan markan purirqan runakunata yachatsiraykar. Yachatsirmi runakunata shakyätsirqan unay aylunkuna yärakushqan TAYTA DIOSTA cäsukärinanpaq.
5 Tsaynölami Judá nacioncho ali murallashqa cada markakunaman juezkunata Josafat churarqan.
6 Tsay juezkunatami kayno nirqan: “Shumaq tantiyarkur pitapis juzgapäkuy. Manami runakunatsu juez kanaykipaq churashushqanki, sinöqa TAYTA DIOSMI. Paymi yanapashunki munashqanno arreglanaykipaq.
7 Pay rabyakunmi pitapis manakaqman churaptiki, juknilanpa favornin sharkuptiki y sobornuta chaskipakuptiki. Tsayno kaykaptinqa pïmaypis quejakuq shamuptin TAYTA DIOSNINTSITA *mantsakur shumaq arreglapäkunki”.*
8 Tsaynölami Jerusalénchöpis juezkunata Josafat churarqan TAYTA DIOSPA leyninta cumplitsinanpaq y runakuna quejakushqanta arreglananpaq. Tsay churashqan juezkunami karqan cürakuna, *levitakuna y Israel aylukunapa mandaqnin runakuna.
9 Paykunata yätsirmi kayno nirqan: “Qamkunaqa TAYTA DIOSTA mantsakur runakuna quejakushqanta pay munashqanno mana chaskipakuypa arreglapäkunki.
10 May markapitapis qamkunaman quejakuq shamuptin mana cäsukuqkunata yätsinki TAYTA DIOSTA cäsukärinanpaq. Tsayno yätsinki runa mayinta wanutsishqa kaptinpis o Tayta Diospa mayqan leyninkunata o mandamientunkunata mana cäsukuptinpis. Tsayno yätsiptikimi Tayta Dios mana rabyakunqanatsu qamkunapita ni paykunapitapis. Tsayno rurarqa manami jutsayuqtsu kankipaq.
11 “Qamkuna arreglashqaykita pipis mana cäsukuptinqa mas munayniyuq autoridä kaykanmi paykunata arreglananpaq. Ley religiösata* mana cäsukuqkunataqa mandaq cüra Amaríasmi arreglanqa. Ley civilta* mana cäsukuqkunataqa Ismaelpa tsurin Zebadíasmi arreglanqa. Zebadíasqa Judá trïbu mandaq runami kaykan. Mana qelanaypa runakunata shumaq atiendinki. TAYTA DIOSMI yanapanqa pay munashqanno juzgaq kaqtaqa”.
Ichic wilacuycuna
^ Asera Aseraqa cananeo runakuna adorashqan diösami karqan. Paykunaqa yarpapäkurqan tsay diösa imatapis miratsiq kashqantami. Aserata adorananpaqmi raku qerukunata jawipäkuq. Cananeo runakunaqa yarpapäkurqan tsay jawishqan qerukunacho Asera kashqantami (Éxo. 34.13; Deut. 7.5; 12.3; 16.21; 1Rey. 16.33; 18.19; 2Rey. 13.6).
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ 19.7 Deut. 10.17.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 19.11a Ley religiösaqa kaykan Tayta Diosta imano adorananpaq. Tsaynöpis kaykan juk dioskunata ni ïdulukunata mana adorananpaqmi. Wakin tsay leykuna imano kashqanta musyanaykipaq liyinki Lev. 1—7.
^ 19.11b Ley civilqa kaykan runa mayinwan imano kawananpaqmi. Wakin tsay leykuna imano kashqanta musyanaykipaq liyinki Éxo. 21.2—23.9.
