2 Crónicas 21:1-20
21 Josafat wanuykuptinmi *Davidpa Markancho unay aylunkuna pamparaykashqan kaqman pampapäkurqan. Josafatpa trukannami tsurin Joramna rey karqan.
2 Jorampa wawqinkunami karqan Azarías, Jehiel, Zacarías, Azarías, Micael y Sefatías. Paykuna karqan rey Josafatpa tsurinkunami.
3 Tsay tsurinkunatami papänin rakiparqan qorita, qellayta y chanin cuestaqta imaykakunatapis. Tsaynöpis paykunata churarqan Judá nacioncho corralashqa markakunacho autoridäkuna kananpaqmi. Joramtami itsanqa qechpa kaptin rey kananpaq papänin churarqan.
4 Rey karnami Joramqa pipis qarqunanta mana munar lapan wawqinkunata espädawan wanutsirqan. Tsaynölami wakin mandaq autoridäkunatapis espädawan wanutsirqan.
5 Joramqa kimsa chunka ishkay (32) watayuq kaykarmi rey kayta qalaykurqan. Payqa pusaq watami Jerusalénpita mandarqan.
6 Rey Acabpa tsurinwan tarmi Acabpa aylunkunanöla y Israel nacionpa mandaqnin reykunanöla TAYTA DIOSTA mana cäsukur jutsata rurarqan.
7 Tsayno kaptinpis sirviqnin Davidpita miraq runa Judácho imaypis rey kananpaq *pactuta rurashqa karmi Joramta rey kaykashqanpita TAYTA DIOS mana qarqurqantsu.*
8 Judá nacioncho Joram rey kaykänan witsanmi Edom nación runakuna Judá nacionpa munaynincho kaykashqanpita yarqukärirqan.* Nirkurmi kikinkunapa mandaqnin reyta churapäkurqan.
9 Tsaymi rey Joram capitankunata qayaykatsir guërra carrëtankunawan Edomman aywarqan atacananpaq. Tsawraqa edomita soldädukuna pelyananpaq yarqurmi rey Joramta y carrëtakunawan aywaq capitankunata tumariq tsapapäkurqan. Tsayno tsapaptinmi Israel soldädukunaqa imaykanöpapis tsakaypa qeshpikärirqan.
10 Tsaypita patsami Edom nación runakunaqa kananyaqpis Judá nacionpa munayninchönatsu kaykan.
Joramqa unay aylunkuna yärakushqan TAYTA DIOSTA mana cäsukuptinmi TAYTA DIOS kamakätsirqan Libna marka runakunapis Judá nacionpa munayninpita yarqukärinanpaq.
11 Jerusaléncho taq runakuna juk dioskunata adorapäkunanpaqmi Joramqa Judá jalqakunacho *altarkunata ruratsirqan. Tsaynöpami Judá nación runakuna Tayta Diosta mana cäsukärirqantsu.
12 Tsay witsanmi profëta Elías cartata apatsirqan rey Joramman. Tsay cartachömi kayno nirqan: “Unay ayluyki rey David yärakushqan TAYTA DIOS kaynömi nin: ‘Taytayki Josafat y awkiluyki Asa cäsukamashqanno ¿imanirtaq mana cäsukamankitsu?
13 Qamqa Israel nacionpa mandaqnin reykunanömi lutanta ruraykanki. Juk dioskunata adorapäkunanpaq unay rey Acab shakyätsishqannömi qampis Judácho taq runakunata y Jerusaléncho taq runakunata shakyätsishqanki. Tsaynöpis qampita mas ali kaykaqtami wawqikikunata wanutsishqanki.
14 Tsayno kashqaykipitami nacionnikicho desgracia pasananpaq kamakätsiptï tsurikikunata, warmikikunata y lapan imaykaykikunatapis apakärinqa.
15 Qamtami tukuy niraq qeshyakunawan castigashayki. Pacha nanaywan qeshyaykälarmi waran waran antsankipaq hasta oqitinnikipis tikrakänanyaq’ ”.
16 Nirkurnami filisteo runakunapa y Arabia runakunapa yarpayninman TAYTA DIOS churarqan rey Jorampa contran sharkunanpaq. Arabia runakunaqa tarqan Etiopía runakuna tashqan lädupami.
17 Judá nacionman chayaykur atacarmi apakärirqan reypa palaciuncho kaykaq imaykankunatapis. Tsaynölami apakärirqan Jorampa tsurinkunatapis y warminkunatapis. Jerusalénchöqa Joramwan nunush tsurin Joacazlami quëdarqan.*
18 Tsaypitanami rey Joramta TAYTA DIOS pacha nanaywan castigaptin ima jampipis tinkurqantsu.
19 Ishkay wata tsaynöla qeshyaptinmi oqitinnin tikrakarqan. Tsaynöpami pasaypa lakipaypaq nakaykashqancho wanurqan. Wanuykuptin marka mayinkuna manami yantalatapis rupatsirqantsu unay reykuna wanuptin rurashqannöqa.
20 Joramqa kimsa chunka ishkay (32) watayuq kaykarmi rey kayta qalaykurqan. Jerusalénpita pusaq watalami mandarqan. Wanuptin manami pipis lüturqantsu ni waqarqantsu. Davidpa Markanman pamparpis manami reykuna pamparänan kaqmanqa pamparqantsu.
Ichic wilacuycuna
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 21.7 1Rey. 11.36; 1Crón. 17.10b-14.
^ 21.8 Gén. 27.40.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 21.17 Joacazpa jukaq jutinmi karqan Ocozías.
