2 Crónicas 23:1-21
23 Tsaypita qanchis watachönami cüra Joiada qayatsirqan soldädukunapa capitanninkunata. Juntakaykurmi *pactuta rurapäkurqan reyta churapäkunanpaq. Tsay capitankuna karqan Jerohampa tsurin Azarías, Johanánpa tsurin Ismael, Obedpa tsurin Azarías, Adaíapa tsurin Maasías y Zicripa tsurin Elisafat.
2 Wilanakurkurmi intëru Judá nacionpa aywar lapan markakunapita Jerusalénman shuntamurqan *levitakunata y Israel runakunapa mandaqninkunata.
3 Tayta Diospa templunman juntakaptinnami Joásta cüra Joiada pusharqan paykunapa nawpanman. Nirkurmi kayno nirqan: “¡Kay wamra Ocozíaspa tsurinmi! David aylu karmi TAYTA DIOS promitishqanno kay wamra rey kanqa”.
Tsayno niptinmi lapan runakuna pactuta rurar promitipäkurqan reypa favornin sharkunanpaq.*
4 Nirkurmi cüra Joiada kayno yätsirqan: “Cürakuna y levitakuna, templuncho Tayta Diosta jamay junaq sirvipäkunaykipaq töcashuptiki kimsa puntaman rakikanki. Juk punta kanqa templu punkunta täpananpaq.
5 Juk puntami kanqa reypa palaciunta täpananpaq. Juk puntanami kanqa Cimientu jutiyuq punkuta täpananpaq. Wakin kaq runakunaqa templu patiuchömi karkaykanqa.
6 “Templuman yaykunanpaqqa cürakunalata y levitakunalatami TAYTA DIOS unaypita patsa akrarqan. Tsaymi templucho arunanpaq töcaptin paykunala tsayman yaykapäkunqa. Wakin runakunaqa patiuchömi TAYTA DIOS nishqanno täpanqa.
7 Levitakuna, armayki aptashqa lapayki reyta tumariq tsaparpanki. Pipis payta wanutsinanpaq yaykuyta munaptinqa jukla wanutsipäkunki. Reytaqa maypa aywaptinpis ama kachaykunkitsu”.
8 Tsawraqa levitakuna y Judá runakuna cüra Joiada mandashqankunata lapantami rurapäkurqan. Tsaynöpami turnunkuna cumpliq vigilaqkunata y jamay junaqcho vigilananpaq yaykuqkunatapis capitankuna mana kachaparqantsu wayinkunaman kutinanta.
9 Tsay vigilaqkunatami Joiada kamariparqan rey David ruratsishqan lanzakunata, jatun kaq escüdukunata y taksha kaq escüdukunata. Tsaykunaqa templu rurinchömi churararqan.
10 Kamariparkuptinmi reyman pipis wanutsiq mana yaykunanpaq tsay vigilaqkuna lanzan aptashqa tumariq churanakurqan. Tsayno churanakurqan templupa sur kaq lädunpita qalaykur *altar nawpanpa tumar norti kaq lädunyaqmi.
11 Nirkurnami tsurinkunawan Joiadaqa reypa tsurinta pushaykamur corönata jatiparqan. Jatiparkurnami Israel runakunawan Tayta Dios rurashqan *Pactu Libruta* aptaparqan y aceitita umanman winaparqan. Winaparkuptinnami tsaycho kaykaq runakuna kayno nipäkurqan: “¡Viva mandamaqnintsi rey!”
12 Runakuna cörrishqanta y kushikur qaparpashqanta mayarmi Atalíaqa TAYTA DIOSPA templunman aywarqan ima pasashqantapis musyananpaq.
13 Chayaykurmi reyta rikarqan templu yaykuna columna nawpancho ichiraykaqta. Reypa nawpanchömi mayor runakuna y *cornëta tukaq runakuna kaykarqan. Tsaynömi intëru Judá nación runakunapis kushikur cornëtata tukapäkurqan. Wakinnami instrumentunkunata tukar alabanzata cantarkaykätsirqan. Tsayno kaykaqta rikaykurmi Atalíaqa röpanta rachirishpan kayno nirqan: “¡Traicionëru! ¡Traicionëru!”
14 Tsawraqa cüra Joiada soldädukunapa capitanninkunata kayno nirqan: “Atalíata templupita juk läduman jorqurkur wanutsipäkuy. Pipis favornin sharkuptinqa paytapis espädawan wanutsipäkuy”.
Templupita juk läduman apaykur wanutsinanpaq niptinmi
15 Atalíata prësu tsariykur apapäkurqan cawallukuna yaykukunan palaciupa punkunman. Tsaychömi wanutsipäkurqan.
16 Tsaypitanami TAYTA DIOSWAN pactuta rurar runakunata y reyta Joiada promititsirqan TAYTA DIOSTA cäsukur kawapäkunanpaq.
17 Nirkurnami lapan runakuna aywaykur *Baalpa templunta juchutsipäkurqan. Tsaynölami Baal ïdulukunata y altarninkunatapis lapanta talamar ushapäkurqan. Tsaypitanami talamashqan altarkunapa nawpancho Baalpa cüran Matánta wanutsipäkurqan.
18 Tsaypita kutiykurmi wardiakunata Joiada churarqan TAYTA DIOSPA templunta täpananpaq. Tsay wardiakunaqa cürakunapa y levitakunapa makinchömi karqan. Cürakunata y levitakunata rey David unay churarqan *Moisés qelqashqan leykunacho nishqannölami. Tsaymi paykunaqa TAYTA DIOSPAQ rupatsina sacrificiukunata templucho trukanakuypa rupatsipäkuq y kushishqa alabapäkuq.
19 Tsaynölami templupa patiun yaykuna punkukunaman wardiakunata Joiada churarqan pitapis *impüru kaqkunata mana yaykatsinanpaq.
20 Nirkurnami capitankunawan, respitädu runakunawan, autoridäkunawan y tsaycho kaq lapan runakunawan rey Joásta templupita palaciuman pushapäkurqan. Jana kaq punkupa yaykaratsirmi rey jamakunan trönuman jamatsirqan.
21 Tsaymi lapan runakuna pasaypa kushikärirqan. Atalíata espädawan wanutsishqanpitaqa lapanpis jawkanami kawapäkurqan.
Ichic wilacuycuna
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 23.3 2Sam. 7.12.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ Pactu Libru Pactu Libruqa Israel runakuna cumplinanpaq kaq leykunata qelqashqan librumi karqan (Éxo. 24.7). Tsay leykunaqa karqan paykunawan Tayta Dios rurashqan pactuta cumplinanpaqmi. Tsaynölami tsay pactuta cumplir Tayta Dios promitirqan Israel runakunapa Diosnin kar paykunata yanapananpaq kashqanta y paykuna kuyashqan runakuna kananpaq kashqanta (Hech. 20.28; Efe. 1.22; 5.23).
^ 23.11 Éxo. 24.7; 34.28.
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ Baal Baalqa cananeo runakuna adorashqan diosmi karqan. Juk dios kashqanta yarpaptinpis manami rasunpatsu dios karqan. Cananeo runakuna yarpapäkurqan tsay diosta adoraptin uywankuna mirananpaq kashqanta y chakrankuna ali wayunanpaq kashqantami. Tsaynöpis yarpapäkurqan löcu tamyata y ali tamyatapis kachamushqantami.
^ Moisés qelqashqan leykuna Moisés qelqashqan leykunaqa kaykan Sinaí jirkacho Tayta Dios tantiyatsishqan mandamientukuna y leykunami. Tsay leykunatami Moisés qelqarqan Éxodo, Levítico, Números y Deuteronomio librukunacho.
