2 Crónicas 26:1-23
26 Tsaypitanami Judá runakuna juntakaykur Amasíaspa tsurin Uzíasta* churapäkurqan taytanpa trukan rey kananpaq. Tsay witsan Uzías kaykarqan chunka soqta watayuqmi.
2 Paymi taytan wanuptin Elat markata* shuntarqan Judá nacionpa yapay kananpaq. Shuntarkurmi shumaq altsatsirqan.
3 Mandayta qalaykushqan witsan Uzíasqa chunka soqta watayuqmi kaykarqan. Payqa pitsqa chunka ishkay (52) watami Jerusalénpita mandarqan. Mamanmi karqan Jerusalénpita Jecolías.
4 Uzíasqa papänin Amasíasnömi TAYTA DIOS munashqanno kawarqan.
5 Tayta Diosman yärakur kawananpaqmi Uzíasta Zacarías yätsirqan. Zacarías kawashqanyaqqa TAYTA DIOS munashqannömi Uzías kawarqan. Tsayno kawaptinmi lapanchöpis Tayta Dios yanaparqan.
6 Tayta Dios yanapaptinmi Filistea nacioncho kaykaq Gat markata, Jabnia markata y Asdod markata soldädunkunawan vincir murällankunatapis juchutsipäkurqan. Tsayno vincirkurmi filisteo runakuna tashqan Asdod particho juk markakunatana sharkatsirqan.
7 Filisteo runakunata vincinanpaq yanapashqannölami Gur-baalcho taq Arabia runakunata y meunita runakunatapis vincinanpaq Tayta Dios yanaparqan.
8 Tsaynölami amonita runakunapis impuestuta Uzíasta pägarqan. Uzías munayniyuq kashqanqa musyakarqan Egipto nacionpa lindërunyaqmi.
9 Tsaynölami marka täpaqkuna rikachakunanpaq Jerusalénchöpis törrikunata Uzías ruratsirqan. Tsay törrikuna karqan Esquïna punku janancho, Raqra punku janancho y esquïna tumarkuna janancho. Tsay törrikunata shumaqmi siguratsirqan tsaypita defiendikärinanpaq.
10 Tsaynölami chunyaq jirkakunachöpis rikachakuna törrikunata ruratsirqan.
Nirkurmi *Sefelachöpis y pampakunachöpis pözukunata uchkutsirqan uywankuna atska kaptin yakuta uputsinanpaq. Atskata murukuq kaptinmi üva chakrankunacho y wakin chakrankunachöpis arunanpaq minkayninkunapis tsaytsika karqan. Chakrankuna jirkankunacho y pampakunacho karqanmi.
11 Uzíaspa soldädunkunapis atskami karqan. Paykunapa capitanninmi karqan Uzíaspa yanapaqnin Hananías. Cada soldädupa jutintami reypa secretariun Jehiel y yanapaqnin Maasías juk listaman apuntarqan. Tsay soldädukunami jutinkuna qelqarashqanman tupu punta punta guërraman aywapäkuq.
12 Tsay soldädukunapa capitanninkunami karqan ishkay waranqa soqta pachak (2,600) aylukunapa mandaqninkuna. Paykunaqa pelyayta yachaq ali chölu runakunami karqan.
13 Tsay capitankunapa munayninchömi karqan kimsa pachak qanchis waranqa pitsqa pachak (307,500) soldädukuna. Paykunami reypa contrankunawan pelyapäkuq.
14 Tsay soldädukunatami Uzías kamariparqan escüduta, lanzata, cascuta, bronci chalëcuta, flëchakunata y warakata.
15 Jerusalénchömi habilidäniyuq runakunawan Uzías ruratsirqan tukuy niraq mäquinakunata. Tsaykunatami churatsirqan törrikunaman y marka murälla esquïnankuna jananman. Tsay mäquinakunawanmi jatusaq rumikunata y flëchakunata jitatsirqan. Tayta Dios yanapaptinmi rey Uzías munayniyuq kashqan maytsaychöpis musyakarqan.
16 Munayniyuq karmi rey Uzías orgullösu rikakurqan. Juk junaqmi mana cäsukuypa TAYTA DIOSPA templunman yaykurqan inciensuwan *altarcho qoshtatsinanpaq.
17 Tsayman yaykuptinmi qepanta cüra Azarías yaykurqan pusaq chunka (80) ali chölu cüra mayinkunawan.
18 Paykunami reyta kayno nipäkurqan: “Tayta Uzías, TAYTA DIOSPAQ inciensuwan qoshtatsinaykipaqqa manami qamtatsu churashushqanki. Tsayta rurananpaqqa Aarónpita miraq cürakunalatami TAYTA DIOS churashqa.* Inciensuwan templucho qoshtatsirqa jutsatami rurashqanki. Tsayno rurashqaykipita TAYTA DIOS manami yanapashunkipaqtsu. Kaypita jukla yarquy”.
19 Tsayno michaptinmi inciensu qoshtatsikunan aptashqana kar Uzías pasaypa rabyakurkurqan. Tsaymi cürakuna rikaykaptin reypa urkuncho jinan höra *lepra yurirqan. Tsayno pasarqan templu rurincho inciensuwan qoshtatsikuna altar nawpancho ichiraykaptinmi.
20 Rey Uzíaspa urkuncho lepra kaykashqanta rikaykurmi cüra mayinkunawan mandaq cüra Azarías jinan höra templu rurinpita jorqamurqan. TAYTA DIOS castigashqanta tantiyarmi kikin reypis jukla yarqukurqan.
21 Wanushqanyaqmi rey Uzíasqa lepra qeshyawan qeshyarqan. Tsayno qeshyarmi palaciupita juk läduchöna tarqan. TAYTA DIOSPA templun patiuman yaykunanpaqpis manami kachaparqannatsu. Tsaymi tsurin Jotamna paypa trukan nacionta mandarqan.
22 Uzías rurashqankunataqa qalaykunanpita ushananyaq Amozpa tsurin profëta Isaíasmi qelqarqan.
23 Uzías wanuykuptinnami unay aylunkuna pamparaykashqanman pampapäkurqan. Lepra qeshyawan wanushqa kaptinmi reykuna pamparashqan panteón cercalanman pampapäkurqan. Paypa trukannami tsurin Jotamna rey karqan.
Ichic wilacuycuna
^ 26.1 Uzíaspa jukaq jutinmi karqan Azarías.
^ 26.2 1Rey. 9.26.
^ Sefela Sefelaqa Israel nacioncho jirkan jirkan partimi kaykan. Sefelapita inti jeqanan lädupami Mediterraneo lamar kaykan. Sefelapita inti jeqamunan lädupanami jirkakuna kaykan. Norti lädupita sur kaq läduyaqmi Sefela kaykan chusku chunka pitsqa kilömetruno. Inti jeqamunan lädupita inti jeqanan läduyaqmi chunka soqta kilömetruno kaykan. Sefelacho chakrakuna ali kaptinmi mikuykuna ali wayun. Filisteo runakunawan pelyarmi Israel runakuna Sefelacho kaykaq markakunata y chakrakunata qechunakärirqan (Jos. 10.40; 12.8; 1Rey. 10.27; 2Crón. 28.18).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 26.18 Éxo. 30.7-8; Núm. 3.10.
^ lepra Lepra qeshyaqa runapa qarancho tukuy casta qerikunami karqan. Israel nacioncho lepra qeshyawan qeshyaykaqkunaqa markapita juk läduchömi täkäriq (Lev. 13.45-46). Paykunataqa runakuna manami yataylapis yataqtsu (Lev. 22.5). Tsayno kaptinpis Jesucristo munayniyuq karmi leprawan qeshyaykaqkunata yataykur aliyätsirqan (Mar. 1.40-43).
