2 Crónicas 27:1-9
27 Mandayta qalaykushqan witsan Jotamqa ishkay chunka pitsqa (25) watayuqmi kaykarqan. Payqa chunka soqta watami Jerusalénpita mandarqan. Mamanmi karqan Sadocpa tsurin Jerusa.
2 Jotamqa papänin Uzíasnömi TAYTA DIOS munashqanno kawarqan. Tayta Diospa templunmanmi itsanqa papäninno mana yaykurqantsu. Tayta Dios munashqanno Jotam kawaptinpis mandashqan nacioncho taq runakunaqa jutsa ruralarmi kawapäkurqan.
3 Jotammi TAYTA DIOSPA templun jana waqtan murällapa punkunta tanatsirqan. Tsaynölami Ofel jirkancho perqatapis altsatsirqan.
4 Judá nación jalqakunachöpis markakunatami sharkatsirqan. Muntikunachöpis pakakuna wayikunata y törrikunatami ruratsirqan.
5 Tsaynöpis amonita runakunapa mandaqnin reytami soldädunkunawan Jotam vincirqan. Vincirkurmi amonita runakunata kimsa watayaq impuestuta pägatsirqan. Tsaymi cada wata pägapäkurqan kimsa waranqa kimsa pachak (3,300) kïlu qellayta, chunka waranqa (10,000) säcu trïguta y chunka waranqa säcu cebädata.
6 TAYTA DIOS munashqanno kawarmi Jotamqa munayniyuq rikakurqan.
7 Jotam imata rurashqankuna y soldädunkunawan yarqur guërrata rurashqankunapis lapanmi qelqaraykan Judá nacionpa y Israel nacionpa mandaqnin reykunapa acta libruncho.
8 Mandayta qalaykushqan witsan Jotamqa ishkay chunka pitsqa (25) watayuqmi kaykarqan. Payqa chunka soqta watami Jerusalénpita mandarqan.
9 Jotam wanuykuptinmi *Davidpa Markanman pampapäkurqan. Paypa trukannami tsurin Acazna rey karqan.
Ichic wilacuycuna
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
