2 Crónicas 29:1-36
29 Mandayta qalaykushqan witsan Ezequías kaykarqan ishkay chunka pitsqa (25) watayuqmi. Payqa ishkay chunka isqun (29) watami Jerusalénpita mandarqan. Mamanmi karqan Zacaríaspa tsurin Abías.
2 Unay aylun David TAYTA DIOSTA cäsukushqannömi Ezequíaspis cäsukurqan.
3 Paymi mandayta qalaykur punta kaq watacho y punta kaq killacho TAYTA DIOSPA templun patiuman yaykuna punkukunata kicharkatsir altsatsirqan.
4 Nirkurna cürakunata y *levitakunata qayatsirqan inti jeqamunan kaq lädu patiuman.
5 Juntakaykuptinnami paykunata kayno nirqan: “Levitakuna, purificakunaykipaq lapayki armakäriy. Nirkurna unay ayluntsi yärakushqan TAYTA DIOSPA templuntapis purificapäkuy. Tsaycho tarishqayki *impüru kaqkunata waqtaman jitapäkuy.*
6 “TAYTA DIOSNINTSITA mana cäsukurmi ayluntsikuna pasaypa jutsayuq rikakushqa. Tsayno karmi TAYTA DIOSTA manana adorar tashqan templutapis manakaqman churapäkushqa.
7 Templu patiupa punkunkunatapis wichqarätsikushqami. Templu rurincho rataykaq lamparakunatapis upitsishqa. Inciensuwanpis mananami qoshtatsishqanatsu. Rupatsina sacrificiutapis mananami kuyamaqnintsi Tayta Diospaq rupatsishqanatsu.
8 Tsaypitami TAYTA DIOS pasaypa rabyashpan castigarqan Jerusaléncho taqkunata y Judácho kaykaq wakin markakunacho taqkunatapis. Tsaymi pasaypa mantsakashqa, lakishqa y manakaqman churashqa kawapäkurqan. Tsayno pasashqantaqa kikintsimi musyantsi.
9 Mana cäsukuq kashqanpitami wakin ayluntsikunapis guërracho wanushqa. Wakinpa warmi tsurinkunata, olqu tsurinkunata y paykunapa warmintapis prësu apakärirqan.
10 “Tsaymi yarpachakushqä kuyamaqnintsi TAYTA DIOSWAN *pactuta ruranantsipaq. Tsaynöpami rabyaynin pasaptin mana castigamäshunnatsu.
11 Taytakuna, mana qelanaypa TAYTA DIOSTA templuncho yapay sirvipäkuy. Qamkunatami akrashushqanki templuncho sirvinaykipaq, adoranaykipaq y inciensuwan qoshtatsinaykipaq”.
12 Tsayno niptinmi levitakuna jukla awnirqan. Tsay runakuna karqan:Amasaipa tsurin Mahat,Azaríaspa tsurin Joel (Mahat y Joel karqan Coat aylumi),Abdipa tsurin Cis,Jehalelelpa tsurin Azarías (Cis y Azarías karqan Merari aylumi),Zimapa tsurin Joa,Joapa tsurin Edén (Joa y Edén karqan Gersón aylumi),
13 Simri,Jehiel (Simri y Jehiel karqan Elizafán aylumi),Zacarías,Matanías (Zacarías y Matanías karqan Asaf aylumi),
14 Jehiel,Simei (Jehiel y Simei karqan Hemán aylumi),Semaías yUziel (Semaías y Uziel karqan Jedutún aylumi).
15 Paykunami aylunkunawan juntakaykur armakushpan purificakärirqan. Nirkurmi templu patiuman yaykuykur tsaycho kaqkunata purificarqan. Lapantapis rurapäkurqan TAYTA DIOSPA mandamientuncho qelqaraykashqanno y rey nishqannömi.
16 Tsaypitana TAYTA DIOSPA templunman cürakunapis yaykuykur purificarqan. Tsaycho imatapis impüru kaqkunata patiuman jorqaramuptinmi levitakuna Cedrón raqraman apapäkurqan.
17 TAYTA DIOSPA templunta purificayta qalaykurqan wata qalaykunan punta kaq junaqchömi. Tsaypita pusaq junaqtami templu patiuta purificayta ushapäkurqan. Tsaypita pusaq junaq mastami templu rurintapis purificayta ushapäkurqan. Chunka soqta junaqtami lapanta purificayta ushapäkurqan.
18 Nirkurnami palaciunman aywaykur rey Ezequíasta levitakuna kayno nipäkurqan: “Templuta purificayta ushapäkushqänami. Tsaymi purificapäkushqä sacrificiuta rupatsina *altarta, altarpa manëjunkunata, *sagrädu tanta churakuna mësata y mësapa manëjunkunata.
19 TAYTA DIOSTA mana cäsukushpan rey Acaz jitarishqan manëjukunatapis purificarkur Tayta Diospa altarnin nawpanmanmi kutitsipäkushqä”.
20 Tsayno wilaptinmi waraynin* tuta tsaka tsakala marka autoridäkunata rey Ezequías shuntaykur paykunawan TAYTA DIOSPA templunman aywapäkurqan.
21 Aywarmi purificatsina sacrificiupaq* apapäkurqan qanchis turitukunata, qanchis carnikunata, qanchis carnishkunata y qanchis chïvukunata. Tsay uywakunata TAYTA DIOSPA altarnincho rupatsipäkunanpaqmi Aarónpita miraq cürakunata rey nirqan. Tsaykunata rupatsipäkurqan rey aylukuna y Judá runakuna purificashqa kananpaqmi. Tsaynölami rupatsipäkurqan templupis purificashqa kananpaq.
22 Tsawraqa turitukunata pishtashpan yawarninta shuntarkurmi altarpa lädunkunata cürakuna tsaqtsuparqan. Tsaynölami carnikunapa y carnishkunapa yawarninwanpis tsaqtsuparqan.
23 Tsaypitanami purificatsina sacrificiupaq apamushqan chïvukunata reypa nawpanman y autoridäkunapa nawpanman apapäkurqan. Chïvukunapa umanman makinta churarkuptinmi
24 cürakunaqa chïvukunapa kunkanta kutsupäkurqan. Nirkurmi purificatsina sacrificiupaq tsay uywakunapa yawarninwan altarpa lädunkunata tsaqtsuparqan. Tsaypitanami rey nishqannöla altarcho rupatsipäkurqan lapan Israel runakuna jutsa rurashqanpita perdonashqa kananpaq.
25 Nirkurnami rey Ezequíasqa levitakunata churarqan platïllukunata, *salteriukunata y arpakunata TAYTA DIOSPA templuncho tukapäkunanpaq. Tsayno tukapäkunanpaqmi rey Davidpa yanapaqnin profëta Gadwan y profëta Natánwan rey Davidta TAYTA DIOS wilakatsirqan.*
26 Levitakunaqa templu patiucho ichirpaykarqan David ruratsishqan instrumentunkuna aptashqa y cürakunanami ichirpaykarqan *cornëtankuna aptashqa.
27 Tsay hörami Ezequías nirqan rupatsina sacrificiuta altarcho rupatsipäkunanpaq. Rupatsiyta qalaykuptin TAYTA DIOSTA alabayta qalaykärirqan y cornëtakunatapis tukayta qalaykärirqan. Tsaynölami David ruratsishqan instrumentukunatapis tukapäkurqan.
28 Sacrificiu rupayta ushananyaqmi cantaqkuna alabapäkurqan, cornëtata cürakuna tukapäkurqan y juntaraykaq lapan runakuna TAYTA DIOSTA adorapäkurqan.
29 Rupayta usharkuptinmi rey y tsaycho kaykaq lapan runakuna qonqurpakuykur Tayta Diosta adorapäkurqan.
30 Nirkurnami rey Ezequías y autoridäkuna levitakunata nirqan David y Asaf qelqashqan salmukunata cantar TAYTA DIOSTA alabapäkunanpaq. Tsawraqa pasaypa kushishqa cantashpan qonqurpakuykur adorapäkurqan.
31 Nirkurnami rey Ezequías runakunata kayno nirqan: “TAYTA DIOSTA sirvinaykipaq promitishqana kaykarqa uywakunata templunman apapäkamuy rupatsir payta adoranantsipaq. Tsaynöpis payta agradëcikur ali kawakuy sacrificiupaq apapäkamuy”.
Tsayno niptinmi runakunaqa Ezequías nishqannöla apapäkurqan. Wakinkunaqa ali shonqu karmi rupatsina sacrificiukunapaqpis apapäkurqan.
32 Rupatsina sacrificiupaq apapäkushqan uywakuna karqan qanchis chunka (70) turitukuna, pachak (100) carnikuna y ishkay pachak (200) carnishkuna.
33 Tsaycho lapan rupatsishqan uywakuna karqan soqta pachak (600) turitukuna y kimsa waranqa (3,000) uyshakuna.
34 Wakin kaq cürakuna mana purificakushqa kaptinmi purificashqa kaq cürakunaqa walkaqla karqan uywakunata pishtarkur sacrificiuta rupatsipäkunanpaq. Wakin cürakuna mana purificakuptinpis levitakunaqa juklami purificakurqan. Tsaymi wakin cürakuna purificakunanyaq levitakuna yanaparqan uywakunata pishtäshiyta.
35 Tsaytsika uywakunatami pishtapäkurqan sacrificiuta rupatsinanpaq. Ali kawakuy sacrificiupaq pishtashqan uywakunapa wiranpis atskami karqan. Tsaynölami atska vïnupis karqan sacrificiu rupaptin jananman winapänanpaq.
Tsaynömi templucho yapay TAYTA DIOSTA sirviyta qalaykärirqan.
36 Templuta jukla purificananpaq Tayta Dios yanapashqanta tantiyarmi Ezequías y lapan runakuna kushikärirqan.
Ichic wilacuycuna
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ 29.5 Templucho tarishqan impüru kaqkunaqa ïdulukuna y ïdulukunapaq churashqankunami karqan.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ sagrädu Liyinki santupita tantiyatsikuyta.
^ 29.20 Wakin runakunaqa warantin nipäkun.
^ 29.21 Lev. 4.1—5.13; 6.24-30; 8.14-17; 16.3-22.
^ salteriu Salteriuqa taksha arpa niraqmi kaykan (1Sam. 10.5; 2Sam. 6.5; 1Rey. 10.12; 1Crón. 13.8; 15.28; 2Crón. 5.12; Sal. 33.2; 57.8; 81.2; Isa. 5.12).
^ 29.25-30 1Crón. 25.1.
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
