2 Crónicas 3:1-17
3 Jerusaléncho kaykaq Moriah jirkanchömi* rey Salomón TAYTA DIOSPA templunta sharkatsirqan. Tsay jirkanchömi karqan jebuseo runa Ornánpa ëran.* Tsay ëracho Tayta Dios yuripashqanpitami templuta tsaycho sharkatsinanpaq rey David rantirqan.
2 Salomón chusku wata rey kaykarmi ishkay kaq killacho y ishkay kaq junaqcho templuta arutsiyta qalaykurqan.
3 Templuta ruratsirqan ishkay chunka qanchis (27) metru larguta y anchuntana ruratsirqan isqun metruta.
4 Templupa anchun isqun metru kashqannölami templu yaykuna kaq lädupa kaq alarninpapis anchun karqan isqun metru. Tsaynölami altunpis karqan isqun metru. Tsay alartami qoriwan kuchu kuchu enchapatsirqan.
5 Templupa jatun kaq cuartuntanami entablatsirqan ciprés tablakunawan. Tsay tablakuna jananpami mas alinnin kaq qoriwan enchaparkatsir dibujatsirqan palmërakunata y cadinakunata.
6 Nirkurmi tsay cuartuta kuyaylapaq rumikunawan adornatsirqan. Enchapatsinanpaqmi alinnin kaq qorita Parvaim partipita apatsimurqan.
7 Tsay qoriwanmi terrädukunata, numbralkunata, perqakunata, punkukunata y templu rurincho kaqtaqa lapanta enchapatsirqan. Paredmanmi *querubín niraqkunatapis dibujatsirqan.
8 Templu rurin kaq cuartutami Lugar Santïsimu kananpaq ruratsirqan.* Jatun kaq cuartupa anchun isqun metru kashqannölami Lugar Santïsimupa anchunpis isqun metru karqan. Tsaynölami largunpis isqun metru karqan. Lugar Santïsimuta ishkay chunka waranqa (20,000) kïlu mas alinnin kaq qoriwanmi enchapatsirqan.
9 Tsaypaqmi qori clävukuna karqan. Cada clävumi mediu kïlu maslan lasarqan. Altuscho kaykaq cuartukunatapis qoriwanmi lapanta enchapatsirqan.
10 Lugar Santïsimu rurinmanmi ishkay querubinkunata* qerupita rurarkatsir ichitsirqan. Tsay querubinkunatapis qoriwanmi enchapatsirqan.
11 Juk querubinpa älan perqaman töpararqan y jukaq älannami jukaq querubinpa älanman töpararqan. Juk querubinpa älanpa puntanpita hasta jukaq querubinpa älanpa puntanyaqmi karqan isqun metru. Cada älanpa largunmi karqan ishkay metru juk cuarta maslan.
12 Jukaq querubinpa älankunapis tsay tamäñulami karqan. Tsaymi juk älan töpararqan jukaq kaq perqaman y jukaq älannami töpararqan jukaq querubinpa älanman.
13 Tsay querubinkunaqa punku lädupa rikakushqami ichirpaykarqan. Juk querubinpa älanpa puntanpita hasta jukaq querubinpa älanpa puntanyaq karqan isqun metrumi.
14 Lugar Santupita Lugar Santïsimuta tsaparaq cortïnata awatsirqan azul, granäti y puka milwa hïluwan y llanula putskashqa lïnu hïluwanmi. Tsay cortïna jananpami bordaraykarqan querubinkuna.*
Ishkay columnakunata ruratsishqan
1 Reyes 7.15-22
15 Templu punkuncho ichiränanpaqmi Salomón ruratsirqan ishkay jatusaq columnakunata.* Cada columnapa largunmi karqan chunka soqta metruno. Columna puntancho kananpaqmi adornuntapis ruratsirqan ishkay metru juk cuarta altuta.
16 Cadinatapis tukupa nawintano rurarkatsirmi tsay columnakuna puntancho kaykaq capitelkunaman warkatsirqan. Tsaypita pachak (100) granäda frütakunatano ruraykatsirmi cadinakunaman warkurqan.
17 Tsay columnakunatami templu punkuman ichitsirqan jukta alawqa kaq lädunman y jukaqtana itsuq kaq lädunman. Alawqa kaq nawpancho ichiraykaqpa jutintami churaparqan Jaquín jutin kananpaq y itsuq kaq nawpancho ichiraykaqpa jutintami churaparqan Boaz jutin kananpaq.*
Ichic wilacuycuna
^ 3.1b 2Sam. 24.16.
^ querubín Querubinqa älayuq angilkunami karkaykan. Querubinkunatami Tayta Dios churarqan Edén huertata täpananpaq (Gén. 3.24). Tsaynölami Pactu Babulpa tsapanan jananchöpis qoripita rurashqa ishkay querubinkuna ichiraykarqan (Éxo. 25.18-22; Heb. 9.5). Salomón ruratsishqan templuchöpis ishkay querubinkunami qoriwan enchapashqa karqan. Tsay querubinkunapa altunmi karqan chusku metru pulan (1Rey. 6.23-29). Profëta Ezequielpis revelacionchömi querubinkunata rikarqan (Eze. 10.1-22; 41.18-19).
^ 3.8 Éxo. 26.33-34.
^ 3.14 Éxo. 26.31.
^ 3.15 1Rey. 7.15.
^ 3.17 Jaquín ninanqa kamakätsin ninanmi. Boaz ninanqa munayniyuq ninanmi.
