2 Crónicas 31:1-21
31 Fiesta rurayta usharkurmi Jerusalénman juntakaq Israel runakuna Judá nacioncho kaykaq markakunaman aywaykur runakuna adorashqan wankakunata lapanta talamar usharqan. Tsaynölami *Asera diösapaq jawishqan qerukunata tseqtarqan y markakunacho kaykaq altarkunatapis juchutsirqan. Tsayno ushapäkurqan Judá trïbu runakuna tashqancho, Benjamín trïbu runakuna tashqancho, Efraín trïbu runakuna tashqancho y Manasés trïbu runakuna tashqanchöpis. Lapanta talamayta usharkurnami markankunaman y wayinkunaman kutikärirqan.
Levitakunata y cürakunata templucho arunanpaq Ezequías churashqan
2 Tsaypitanami rey Ezequíasqa cürakunata y *levitakunata churarqan habilidänin kashqanman tupu trukanakuypa templucho arupäkunanpaq. Paykunapitami wakinta churarqan sacrificiuta rupatsipäkunanpaq y wakintana churarqan jawka kawakuy sacrificiuta rupatsipäkunanpaq. Tsaynölami wakinta churarqan Tayta Diosta agradëcikur alabapäkunanpaq y wakintana churarqan templu punkucho täpakunanpaq.
3 Tsaynöpis rey Ezequías kikinpa uywankunapitami churarqan sacrificiuta rupatsipäkunanpaq. Tsay sacrificiukunata TAYTA DIOSPA leyninkunacho nishqannömi rupatsipäkurqan cada tuta, cada tardi, cada jamay junaq, cada lulu killa y diyawardakunachöpis.*
4 Nirkurmi Jerusaléncho taq runakunata rey Ezequías nirqan cürakunapa y levitakunapa derëchunta apamunanpaq. Tsayno nirqan cürakuna y levitakuna TAYTA DIOSPA leyninkunacho nishqanno turnun töcaptin templucho arunanta munarmi.
5 Apamunanpaq wilakatsiptinmi Israel runakunaqa chakrankunapa punta wayuyninta lapan shonqunwan apapäkurqan trïguta, vïnuta, aceitita, abëjapa mishkinta y wakin mikuytapis. Tsaynölami cosechashqankunapita *diezmutapis tsaytsikata apapäkurqan.*
6 Wäkankunapita, uyshankunapita y cabrankunapitapis Israel runakuna y Judá runakuna diezmuta apapäkurqan. Tayta Diospaq wakin rakishqan diezmukunatapis apapäkuptinmi qotuy qotuyta shuntarqan.
7 Kimsa kaq killachömi tsaykunata apayta qalaykärirqan. Qanchis kaq killachöraqmi apayta ushapäkurqan.
8 Runakuna apashqanta rikaykurmi rey Ezequías autoridäninkunawan TAYTA DIOSTA adorapäkurqan. Tsaynölami Tayta Dios kuyashqan Israel runakunata kushishqa agradëcikärirqan.
9 Tsaypitanami rey Ezequíasqa cürakunata y levitakunata tapurqan imanir mikuy qoturaykashqantapis.
10 Tsaymi Sadoc aylupita mandaq cüra Azarías kayno nirqan: “Bendicionninta TAYTA DIOS churamuptinmi runakuna templunman atskata apapäkamushqa. Tsaymi apamuyta qalaykushqanpita patsa mikupäkunäpaq lapan putsuy putsuy kaykälan. Kay qoturaykaqkunaqa putsuqkunalami kaykan”.
11 Tsayta rikaykurmi rey Ezequías TAYTA DIOSPA templun patiucho mikuy churakuna wayikunata ruratsirqan. Tsay wayikunamanmi
12 churapäkurqan shuntashqan *primiciakunata, diezmukunata y Tayta Diospaq runakuna promitishqankunata. Tsaykunata täpananpaqmi churarqan Leví trïbu Conaníasta. Payta yanapananpaqmi churarqan wawqin Simeita.
13 Conaníasta y wawqin Simeita yanapananpaqmi rey Ezequías y mandaq cüra Azarías churarqan Jehielta, Azazíasta, Nahatta, Asaelta, Jerimotta, Jozabadta, Elielta, Ismaquíasta, Mahatta y Benaíata.
14 Leví trïbupita Imnapa tsurin Corétami churarqan runakuna voluntäninpita Tayta Diospaq apamushqankunata chaskinanpaq. Tsay chaskishqankunatami templucho aruqkunata aypuq. Tsaynöpis Coréqa inti jeqamunan kaq lädupa punku kichaqmi karqan.
15 Coréta yanapananpaqmi karqan Edén, Miniamín, Jesúa, Semaías, Amarías y Secanías. Paykunami cürakuna tashqan markakunacho shuntashqankunata levita mayinkunata aypupäkuq. Tsaymi trukanakuypa awkintapis mözutapis aypupäkuq.
16 Tsaynöpami padrunashqa kaq levitakuna kimsa watayuqpita janaman kaqkuna chaskipäkurqan runakuna apamushqankunata. Tsay aypukuqkunami TAYTA DIOSPA templuncho waran waran trukanakuypa arupäkurqan.
17 Tsaymi cürakunata y levitakunata aylunpa aylunpa padrunapäkurqan imacho arushqan tupu y turnun imay töcashqan tupu. Levitakunata padrunapäkurqan ishkay chunka (20) watayuqpita janaman kaqkunatami.
18 Tayta Diosta sirvinalanpaq kaptinmi cada ayluta padrunapäkurqan warminkunatapis, pishi wamrakunatapis, olqu wamrakunatapis y warmi wamrakunatapis. Tsaynöpami cürakunata, levitakunata y wayincho lapan taqkunata padrunarqan.
19 Tsaynölami rey Ezequías cada markacho runakunata churarqan Aarón aylu cürakunata y levitakunata padrunashqa kaqkunataqa mikuyta aypunanpaq. Tsaynöpami chakracho taq levitakunapis mikuyta chaskipäkurqan.
20 Intëru Judá nacioncho mikuyta tsayno aypunanpaqmi runakunata Ezequías churarqan. Ezequías lapan rurashqankunaqa TAYTA DIOS munashqannömi karqan.
21 Tayta Diospa leyninkunata y mandamientunkunata cumplirmi templucho ima ruraykunatapis lapan shonqunwan ruratsirqan. Tsayno ruratsiptinmi lapanpis ali karqan.
Ichic wilacuycuna
^ Asera Aseraqa cananeo runakuna adorashqan diösami karqan. Paykunaqa yarpapäkurqan tsay diösa imatapis miratsiq kashqantami. Aserata adorananpaqmi raku qerukunata jawipäkuq. Cananeo runakunaqa yarpapäkurqan tsay jawishqan qerukunacho Asera kashqantami (Éxo. 34.13; Deut. 7.5; 12.3; 16.21; 1Rey. 16.33; 18.19; 2Rey. 13.6).
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 31.3 Núm. 28.1—29.39.
^ diezmu Diezmuqa cada chunkapita jukta Tayta Diospaq rakishqanmi kaykan. Tsaytaqa rakin qellaypita, uywakunapita y mikuykunapitami (Gén. 14.17-20; Deut. 14.22; Mat. 23.23).
^ 31.4-5 Núm. 18.12-13, 21.
^ primicia Primiciaqa kaykan Israel runakuna qechpa kaqkunata y chakrancho punta poquqkunata Tayta Diospaq apashqanmi (Éxo. 23.19; Lev. 2.11-12; Deut. 14.23; 18.3-4; 26.1-11; 2Crón. 31.11-12; Neh. 10.35-37; 12.44; Eze. 44.30; Rom. 8.23; Apoc. 14.4).
