2 Crónicas 33:1-25
33 Manasés chunka ishkay watayuq kaykarmi rey kayta qalaykurqan. Payqa pitsqa chunka pitsqa (55) watami Jerusalénpita mandarqan.
2 Manasésqa TAYTA DIOSTA mana cäsukurmi unay runakunano jutsata rurar kawarqan.* Tsay runakunatami TAYTA DIOS qarqurqan paykunapa markankunacho Israel runakunana tänanpaq.
3 Tsaynölami Manasésqa papänin Ezequías talamatsishqan *altarkunata yapay sharkatsir mushuq altarkunatapis ruratsirqan *Baal dioskunata adorapäkunanpaq. Nirkurmi *Asera diösapaq raku qerukunata jawitsirqan y intita, killata y qoylarkunatapis adorarqan.
4 Jerusaléncho imayyaqpis tänanpaq TAYTA DIOS nishqa kaykaptinpis juk dioskunata adorapäkunanpaqmi templuncho altarkunata ruratsirqan.*
5 Intita, killata y qoylarkunata adorapäkunanpaqmi TAYTA DIOSPA templunpa ishkan patiuncho altarkunata ruratsirqan.
6 Juk diosta adorashpanmi tsurinkunatapis Ben-hinom raqracho rupatsirqan. Tsaynöpis rikakuq y brüjumi karqan. Payqa almakunawan parlaqkunatapis tapukurqanmi. Tsayno mana alikunata rurarmi TAYTA DIOSTA pasaypa rabyanätsirqan.
7 Ruratsishqan ïdulutapis churarqan Tayta Diospa templun patiuman. Tsay templuta sharkatsipänanpaqmi Davidta y tsurin Salomónta Tayta Dios kayno nirqan: “Jerusalén templuchömi imayyaqpis täshaq. Israel nacioncho kaykaq lapan markakunapitami Jerusalén markata akrashqä täkunä templu tsaycho kananpaq.
8 Moisés yachatsishqan lapan leynïkunata, mandamientükunata y yätsishqäkunata cumpliptinqa Israel runakunata manami imaypis qarqushaqtsu unay aylunkunata qoykushqä nacionpita”.*
9 Tsayno niykaptinpis Judá runakuna y Jerusaléncho taq runakunaqa manami cäsukurqantsu. Tsaypa trukanqa rey Manasés shakyätsiptin TAYTA DIOS ushakätsishqan nación runakunapita mas peormi jutsata rurapäkurqan.
10 Tsawraqa Manasés y mandashqan runakuna Tayta Dios parlapaptinpis manami cäsukärirqantsu.
11 Tsayno kashqanpitami Judá runakunapa contran sharkushpan Asiria soldädukunapa capitanninkunata TAYTA DIOS kacharqan Manasésta prësu tsaripäkamunanpaq. Tsaymi senqanpa ganchuwan shequrkur y bronci cadinawan liyarkur Babiloniaman prësu apakärirqan.
12 Tsayno pasaypa nakashpanraqmi Manasésqa jutsa rurashqanpita lakikur papänin y unay aylunkuna yärakushqan TAYTA DIOSTA perdonta manakurqan.
13 Manakushqanta mayarmi Jerusalénman Tayta Dios kutitsimurqan yapay rey kananpaq. Tsayraqmi Manasésqa tantiyakurqan TAYTA DIOS lapanpaq munayniyuq kashqanta.
14 Tsaypitanami Manasésqa *Davidpa Markan waqtanpa murällata altuta sharkatsirqan. Tsay murällata perqatsirqan Gihón pukyupita inti jeqamunan kaq lädupa raqrata pasar Pescädu nishqan punkuyaq y Ofel jirkanyaqmi. Nirkurnami Judácho kaykaq ali murallashqa markakunaman capitankunata churarqan soldädunkunawan täpananpaq.
15 TAYTA DIOSPA templunpitanami jäpa runakunapa diosninkunata y ruratsishqan ïduluta jitatsirqan. Tsaynölami Jerusaléncho y templu kashqan jirkanchöpis ïdulukunapaq ruratsishqan altarkunata juchurkatsir markapita juk läduman jitatsirqan.
16 Nirkurmi TAYTA DIOSPA altarninta altsarkatsir jawka kawakuy sacrificiukunata y agradëcikur apamushqan sacrificiukunatapis rupatsirqan. Tsaynölami Judá runakunata mandarqan Israel runakunata kuyaq TAYTA DIOSTA adorapäkunanpaq.
17 Manasés nishqanno TAYTA DIOSTA adorarpis runakunaqa markakunacho kaykaq altarkunachömi sacrificiukunata rupatsipäkurqan. Itsanqa manami ïdulukunata adorarnatsu tsay sacrificiukunata rupatsirqan, sinöqa TAYTA DIOSTA adorarmi.
18 Manasés imata rurashqankuna, Tayta Diosta manakushqankuna y profëtankunawan TAYTA DIOS payta wilakatsishqankunapis lapanmi qelqaraykan Israel reykunapa acta libruncho.
19 Tsaynölami profëtakuna qelqashqan librucho qelqaraykan Tayta Diosta Manasés perdonta manakushqan y Tayta Dios imano yanapashqanpis. Tsaynöpis tsaycho qelqaraykan manaraq perdonta manakur jutsata rurashqankuna, altarkunata maycho sharkatsishqankuna, *Asera diösapaq raku qerukunata maycho jawitsishqankuna y wakin ïdulukunata mayman churatsishqankunapis.
20 Wanuykuptin Manasésta pampapäkurqan palaciu huertaman. Paypa trukannami tsurin Amónna rey karqan.
Judá nacioncho Amón rey kashqan
2 Reyes 21.19-26
21 Amón ishkay chunka ishkay (22) watayuq kaykarmi rey kayta qalaykurqan. Payqa ishkay watami Jerusalénpita mandarqan.
22 Amónpis papänin Manasésnölami TAYTA DIOSTA mana cäsukur jutsata rurarqan. Tsayno karmi papänin ruratsishqan ïdulukunata adorar sacrificiukunata rupatsirqan.
23 Itsanqa manami papänin Manasésnöqa TAYTA DIOSTA perdonta manakurqantsu. Tsaypa trukanqa mas jutsa ruraylamanmi churakarqan.
24 Kikinpa yanapaqninkunalami contran sharkur jinan palaciulancho Amónta wanutsirqan.
25 Tsayta musyaykurmi wanutsiq runakunata wanutsirqan. Nirkurmi Amónpa tsurin Josíastana rey kananpaq churapäkurqan.
Ichic wilacuycuna
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ Baal Baalqa cananeo runakuna adorashqan diosmi karqan. Juk dios kashqanta yarpaptinpis manami rasunpatsu dios karqan. Cananeo runakuna yarpapäkurqan tsay diosta adoraptin uywankuna mirananpaq kashqanta y chakrankuna ali wayunanpaq kashqantami. Tsaynöpis yarpapäkurqan löcu tamyata y ali tamyatapis kachamushqantami.
^ Asera Aseraqa cananeo runakuna adorashqan diösami karqan. Paykunaqa yarpapäkurqan tsay diösa imatapis miratsiq kashqantami. Aserata adorananpaqmi raku qerukunata jawipäkuq. Cananeo runakunaqa yarpapäkurqan tsay jawishqan qerukunacho Asera kashqantami (Éxo. 34.13; Deut. 7.5; 12.3; 16.21; 1Rey. 16.33; 18.19; 2Rey. 13.6).
^ 33.4 2Sam. 7.13.
^ 33.8 1Rey. 9.3-5; 2Crón. 7.12-18.
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
^ Asera Aseraqa cananeo runakuna adorashqan diösami karqan. Paykunaqa yarpapäkurqan tsay diösa imatapis miratsiq kashqantami. Aserata adorananpaqmi raku qerukunata jawipäkuq. Cananeo runakunaqa yarpapäkurqan tsay jawishqan qerukunacho Asera kashqantami (Éxo. 34.13; Deut. 7.5; 12.3; 16.21; 1Rey. 16.33; 18.19; 2Rey. 13.6).
