2 Crónicas 35:1-27
35 Tsaypitanami rey Josías nirqan TAYTA DIOSTA adorar *Pascua fiestata* Jerusaléncho rurapäkunanpaq. Tsaymi mushuq wata qalaykunan killa chunka chusku junaqcho Pascua fiestata rurar carnishkunata pishtapäkurqan.
2 Pascua fiestata manaraq rurarmi rey Josías cürakunata churarqan TAYTA DIOSPA templuncho arupäkunanpaq. Nirkurmi paykunata shakyätsirqan mana qelanaypa tsaycho sirvipäkunanpaq.
3 Israel runakunata yachatsiq kaptin y TAYTA DIOSPAQ santu kaptinmi *levitakunatapis Josías kayno nirqan: “Manami *sagrädu babulta maypapis umrushqa puritsipäkunkinatsu. Tsaypa trukanqa Davidpa tsurin rey Salomón sharkatsishqan templumanna churapäkuy. Kananpitaqa TAYTA DIOSNINTSITA y kuyashqan Israel runakunata templucho sirvipäkuy.
4 “Tsayno kaptinqa Israel nacionnintsipa mandaqnin rey David y tsurin Salomón qelqashqancho nishqanno aylunpa aylunpa churanakäriy templucho trukanakuypa arupäkunaykipaq.*
5 Ayluykita turnu töcaptin lapayki templuman aywapäkuy shuyänaykipaq. Tsaynöpami Israel mayikikuna aylunpa aylunpa shamuptin töcashushqayki kaq aylukunata atiendipäkunki.
6 Tsayno kaptinqa jukla purificakur Pascua fiestapaq apapäkamushqan carnishkunata pishtapäkuy. TAYTA DIOS mandashqanta Moisés qelqashqanno Pascua fiestata runakuna cumplipäkunanpaq lapanta kamaripay”.
7 Pascua fiestata rurapäkunanpaqmi rey Josías kikinpa uywankunata kamariparqan kimsa chunka waranqa (30,000) uyshakunata y cabrakunata. Tsaynölami kamariparqan kimsa waranqa (3,000) turitukunata.
8 Tsaynölami reypa mandäshiqninkunapis y Tayta Diospa templuncho aruqkunapa mandaqninkunapis kikinpa voluntäninpita uywakunata kamariparqan Pascua fiestata rurapäkunanpaq. Tayta Diospa templuncho aruqkunapa mandaqninkuna karqan Hilcías, Zacarías y Jehiel. Paykunami kamariparqan ishkay waranqa soqta pachak (2,600) uyshakunata y cabrakunata y kimsa pachak (300) turitukunata. Tsay kamaripashqan uywakuna wakin karqan cürakunapaq y levitakunapaq y wakinnami karqan común runakunapaq.
9 Conanías y aruq mayinkuna Semaías y Natanaelpis uywakunata kamariparqan. Tsaynölami levitakunapa mandaqninkuna Hasabías, Jeiel y Josabadpis uywakunata kamariparqan. Paykuna kamaripashqan uywakuna karqan pitsqa waranqa (5,000) uyshakuna y cabrakuna y pitsqa pachak (500) turitukuna.
10 Lapan kamarishqa kaptinmi cürakuna arupäkunanpaq kaqkunaman churanakärirqan. Levitakunapis rey nishqanno cada aylu turnun chayamuptin churanakurqan arupäkunanpaq.
11 Pascua fiestapaq uywakunata pishtarmi levitakuna yawarta cürakunata makyarqan. Nirkur pishtaylanta cürakunaqa chaskishqan yawarwan *altarta tsaqtsuparqan.
12 Nirkurnami pishtashqan uywakunapa wirankunatapis levitakuna jorqurkur runakunata aylunpa aylunpa entregarqan. Chaskirkurnami Moisés qelqashqancho nishqannöla TAYTA DIOSPAQ rupatsipäkurqan. Törukunata pishtarpis tsaynölami rurarqan.
13 Nirkurnami mandamientucho nishqannöla Pascua fiestata rurar mikupäkunanpaq levitakuna aytsata kankapäkurqan.* Sagrädu kaq aytsatana mankawan, caserölawan y sartinwan ankarkur lapan runakunata apurädu aypupäkurqan.
14 Rupatsina sacrificiukunata y uywakunapa wiranta altarcho patsa tsakashqanyaq cürakuna rupatsiptinmi tiempu mana karqantsu mikuyninkuna yanukärinanpaq. Tsaymi Aarónpita miraq cürakunapaq y kikinkunapaq levitakunala yanukärirqan.
15 David, Asaf, Hemán y Jedutún nishqannömi Asafpita miraq cantaqkunapis cantapäkurqan. (Jedutúnqa Tayta Dios revelashqankunata reyta tantiyatsiqmi karqan.)* Tsaynölami punku täpaqkunapis mana kachaypa punkunta täparqan. Tsayno cantar y punkuta täpar tiempun mana kaptinmi levita mayinkuna paykunapaqpis aparqan mikupäkunanpaq kaq derëchunta.
16 Rey Josías nishqannölami Pascua fiestata tsay junaq rurar TAYTA DIOSPA altarnincho rupatsina sacrificiukunata rupatsipäkurqan.
17 Pascua fiestata rurarkurnami tsaycho kaykaq lapan Israel runakuna Levadüraynaq Tantata Mikupäkunan fiestatapis qanchis junaq rurapäkurqan.*
18 Josíasqa Pascua fiestata rurarqan cürakunawan, levitakunawan, Jerusaléncho taq runakunawan y intëru Judápita y Israelpita shamuq runakunawanmi. Profëta Samuel kawashqan witsanpita patsa Israel runakuna manami imaypis tsaynöqa Pascua fiestata rurapäkurqantsu. Tsaynöpis rey Josías Pascua fiestata rurashqannöqa Israel nacioncho manami mayqan reypis rurarqantsu.
19 Tsay Pascua fiestata rurapäkurqan Josías chunka pusaq wata rey kaykänan witsanmi.
Josías wanushqan
2 Reyes 23.28-30
20 Josías TAYTA DIOSPA templunta altsatsiyta ushashqanchönami Egipto nacionpa mandaqnin rey Necao Carquemischo pelyananpaq Éufrates mayuman soldädunkunawan aywapäkurqan. Tsayman aywar Israel nacionpa pasaptinmi Josías payta atacananpaq soldädunkunawan yarqupäkurqan.
21 Tsawraqa Necao kachankunata kacharqan kayno ninanpaq: “Judá nacionpa mandaqnin rey, achäquita ama ashipämaytsu. Manami qamwan pelyaqtsu shamushqä, sinöqa aywaykä juk nacionwan pelyanäpaqmi. Tsayman apurädu aywanäpaqmi Tayta Dios kachaykäman. Atacamashpaykiqa Tayta Diospa contran rikakur wanunkipaqmi”.
22 Necaowan Tayta Dios wilakatsishqa kaykaptinpis Josías manami kutikurqantsu, sinöqa mana cäsukuypami Egipto runakunata soldädunkunawan atacarqan Meguido pampacho.
23 Pelyachömi flëchawan flëchaq soldädukuna Josíasta flëchaykurqan. Tsawraqa rey Josías capitanninkunata kayno nirqan: “Flëcharamashqami. Kay pelyapita qeshpiykatsilämay”.
24 Tsaymi carrëtapita capitankuna jorquykur juk carrëtawanna Jerusalénman apapäkurqan. Tsaycho wanuykuptinmi unay aylunkuna pamparaykashqanman pampapäkurqan. Josíaspaqmi Jerusaléncho taq runakuna y Judácho taq runakunapis lütur pasaypa waqapäkurqan.
25 Josías wanuptinmi Jeremías* juk cantata yarpayninpita jamutarqan pampay höra cantananpaq. Kananyaqmi warmipis olqupis tsay cantata cantar Josías wanushqanta yarpapäkun. Paykuna cantashqankuna qelqaraykan pampapakuy cantakuna libruchömi.
26 Josías rurashqankuna y TAYTA DIOSPA leyninkunata cäsukushqankuna
27 qalaykunanpita ushananyaq lapanpis qelqaraykan Israel nacionpa y Judá nacionpa mandaqnin reykunapa acta librunchömi.
Ichic wilacuycuna
^ Pascua fiesta Pascua fiestata Israel runakuna rurapäkun Tayta Dios Egiptupita jorqamushqanta yarpapäkurmi. Moisés qelqashqan leykunacho nishqannölami lapan olqu kaqkuna chunka ishkay watayuqpita janaman tsay fiestaman aywapäkuq. Warmikunapis tsay fiestaman aywapäkuqmi (Éxo. 12.1-28; Deut. 16.1-8; Mar. 14.12; 1Cor. 5.7).
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ sagrädu Liyinki santupita tantiyatsikuyta.
^ 35.4 2Crón. 8.14.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 35.13 Éxo. 12.8-9.
^ 35.15 1Crón. 25.1.
^ 35.17 Éxo. 12.15-20.
^ 35.25 Jer. 1.1-2; 3.6; 22.10-15.
