2 Crónicas 5:1-14
5 TAYTA DIOSPA templunta ruratsiyta Salomón usharkurnami templupa manëjunkunata tsayman churananpaq apatsirqan.* Tsay manëjukunataqa Salomón ruratsirqan TAYTA DIOSPAQ taytan David churashqan qoripita y qellaypitami.
Babulta templuman apapäkushqan
1 Reyes 8.1-11
2 Tsaypitanami Salomónqa Jerusalénman qayatsirqan lapan Israel mayor runakunata, trïbukunapa mandaqnin runakunata y Israel aylukunacho mas respitädu runakunatapis. Paykunata qayatsirqan TAYTA DIOSPA *Pactu Babulninta *Davidpa Markanpita templuman apapäkunanpaqmi.* Davidpa Markanpa jukaq jutinmi kaykan *Sión.
3 Qanchis kaq killacho jatun fiestata ruraykashqan junaqmi* tsay qayatsishqan runakunawan Salomón juntakarqan.
4 Lapan mayor runakuna juntakaykuptinnami *levitakuna babulta umrukurkur templuman apapäkurqan.
5 Paykunawanmi cürakunapis tsay babulta, Tinkuna Tolduta y manëjunkunatapis apapäkurqan.
6 Templuman chayaykatsirmi babulpa nawpanman rey Salomónqa lapan Israel runakunawan juntakarqan. Tsaychömi Tayta Diosta adorashpan yupaytapis mana atipaypaq tsaytsika uyshakunata, cabrakunata y törukunata pishtarkur *altarcho rupatsirqan.
7 Nirkurnami TAYTA DIOSPA Pactu Babulninta cürakuna churarqan Lugar Santïsimucho ishkay *querubinkunapa älankuna rurinman.
8 Tsay querubinkunapa älankunami babul jananpa mashtararqan. Tsaynöpami babul y wintukunan qerukunapis querubinkunapa älankuna rurincho karqan.
9 Wintukunan qerukunaqa largu karmi Lugar Santupita rikakarqan. Alarpitami itsanqa mana rikakarqannatsu. Tsaynölami kananyaqpis kaykan.
10 Tsay babulchöqa Horebcho Moisés churashqan ishkay läja rumikunalami winararqan.* Tsay läjakunachömi qelqararqan Israel runakuna Egiptupita yarqamushqan witsan paykunawan TAYTA DIOS *pactuta rurashqan.
11 Lugar Santïsimuman babulta churarkurmi cürakuna yarqukurqan. Lapanpis tsay cürakunaqa mayqan turnucho töcananpaq kaptinpis purificakushqami karkaykarqan.
12 Leví trïbu cantaq runakunami altarman inti jeqamunan kaq nawpancho ichirpaykarqan lïnupita rurashqa röpan jatishqa y platïllunkuna, *salteriunkuna, arpankuna aptashqa. Paykunami karqan Asaf, Hemán, Jedutún, tsurinkuna y aylunkuna. Paykunawanmi karkaykarqan *cornëta tukaq pachak ishkay chunka (120) cürakunapis.
13 Tsaymi cornëtata, platïllukunata y wakin instrumentukunatapis tukaptin cantaqkuna TAYTA DIOSTA agradëcikur alabapäkurqan kayno nir:“¡Tayta Diosqa alilata ruraqmi!¡Kuyapäkuyninqa manami imaypis ushakantsu!”*
Tsayno nir alabarkaykaptinmi TAYTA DIOSPA templunta pukutay tsapakurkurqan.
14 Pukutay tsayno tsapakurkuptinmi y kikin TAYTA DIOS tsay pukutaycho kaptinmi cürakunaqa ima ruraytapis mana kamäpakur yarqukärirqan.*
Ichic wilacuycuna
^ 5.1 2Sam. 8.11; 1Crón. 18.11.
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ querubín Querubinqa älayuq angilkunami karkaykan. Querubinkunatami Tayta Dios churarqan Edén huertata täpananpaq (Gén. 3.24). Tsaynölami Pactu Babulpa tsapanan jananchöpis qoripita rurashqa ishkay querubinkuna ichiraykarqan (Éxo. 25.18-22; Heb. 9.5). Salomón ruratsishqan templuchöpis ishkay querubinkunami qoriwan enchapashqa karqan. Tsay querubinkunapa altunmi karqan chusku metru pulan (1Rey. 6.23-29). Profëta Ezequielpis revelacionchömi querubinkunata rikarqan (Eze. 10.1-22; 41.18-19).
^ 5.10 Deut. 10.5.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ salteriu Salteriuqa taksha arpa niraqmi kaykan (1Sam. 10.5; 2Sam. 6.5; 1Rey. 10.12; 1Crón. 13.8; 15.28; 2Crón. 5.12; Sal. 33.2; 57.8; 81.2; Isa. 5.12).
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ 5.14 Éxo. 40.34-35.
