2 Crónicas 6:1-42
6 Tsaymi Tayta Diosta manakur Salomón kayno nirqan: “TAYTA DIOS, yanawyaykaq pukutay rurincho tashqaykitami nishqanki.
2 Tsayno kaptinpis kananqa templuta sharkatsishqä imayyaqpis tsaycho tänaykipaqmi”.
3 Nirkurnami tsaycho kaykaq Israel runakunaman tikraykur bendicionta qoshpan rey Salomón
4 kayno nirqan: “Alabashqa kaykulätsun yärakushqantsi TAYTA DIOS. Paymi papänï Davidta promitishqankunata lapanta cumplishqa. Promitirmi kayno nirqan:
5 ‘Kuyashqä Israel runakunata Egiptupita jorqamushqä junaqpita patsa manami manakushqätsu mayqan Israel trïbukunapa markanchöpis täkunä templuta rurapämänanpaq. Tsaynöpis manami mayqan runatapis akrashqätsu Israel runakunapa mandaqnin rey kananpaq.
6 Tsaypitanami itsanqa Jerusalénta akrashqä tsaycho tänäpaq. Tsaynöpis qamtami akrashqä Israel runakunapa mandaqnin rey kanaykipaq’.
7 “Papänï Davidqa kuyamaqnintsi TAYTA DIOSTA adoranantsipaq templuta ruratsiytami munarqan.
8 Tsayno munaptinpis TAYTA DIOS kaynömi nirqan: ‘Noqapaq templuta sharkatsiyta yarpashqayki alimi kaykan.*
9 Itsanqa manami qamtsu sharkatsinkipaq, sinöqa tsurikiraqmi noqapaq templuta sharkatsinqa’.*
10 “Promitishqannölami TAYTA DIOS cumplishqa. Tsaymi papänï Davidpa trukan Israel runakunapa mandaqnin rey kaykä. Tsaynöpis kuyamaqnintsi TAYTA DIOSPAQ templuta sharkatsishqä.
11 Tsay templumanmi TAYTA DIOSPA *Pactu Babulninta churatsishqä. Tsay babul rurinchömi unay ayluntsikunawan TAYTA DIOS rurashqan pactu qelqaraykan”.
12 Tsayno nirkurmi Salomónqa patiu chawpicho broncipita ruratsishqan patakman witsarqan. Tsay patakpa largunpis y anchunpis karqan ishkay metru juk cuartami. Altunna karqan juk metru juk cuarta mas juk jëmin. Tsaypitami lapan Israel runakuna rikaykaptin TAYTA DIOSPA *altarnin nawpanman qonqurpakuykur makinta altupa joqarirqan.
13 -
14 Nirkurmi Tayta Diosta manakushpan kayno nirqan: “Israel runakunata kuyaq TAYTA DIOS, jana patsachöpis ni kay patsachöpis qamnöqa manami ima diospis kantsu. Sirvishuqnikikunawan *pactu rurashqaykitaqa imaypis cumplinkimi. Tsaynömi lapan shonqunwan munashqaykino kawaqkunata imaypis kuyapanki.
15 Sirvishuqniki papänï Davidta lapan promitishqaykita cumplirmi templuykita sharkatsinäpaq yanapamashqanki.
16 “Israel runakunata kuyaq TAYTA DIOS, papänï Davidta promitirmi kayno nirqayki: ‘Qampita miraqkunapis qam cumplishqaykino mandamientükunata cumpliptinqa Israel runakunapa mandaqnin reykuna kananpaqmi imaypis churashaq’.*
17 Tsay promitishqaykita imaypis cumpliykulay, Tayta.
18 “Itsanqa ¿rasunpatsuraq kay patsaman aywaykamur runakuna tashqancho tankipaq? Jana patsapis tsayjinanpa tsikankaray kaykarpis manami aypantsu tänaykipaq. Tsayno kaykaptinqa ¡imanöparaq kay ruratsipashqä templu aypanqa!*
19 Imano kaptinpis lapan shonqüwan manakamushqäta mayaykalämay, TAYTA DIOS. Tsaynöla kanan ruwakamushqäta chaskiykalämay.
20 Kikikimi nirqayki kay templucho imaypis tänaykipaq. Tsayno kaptinqa paqaspapis junaqpapis kay templucho kaykulay manakamushqäta imaypis mayaykamänaykipaq.
21 Noqa manakuptïpis y kuyashqayki Israel runakuna kay templucho manakushuptikipis mayaykulay. Ima jutsata rurapäkuptïpis perdonta manakamuptïqa jana patsacho tashqaykipita patsa perdonaykalämay.
22 “Pipis runa mayinpa contran sharkur jukta jitapaptinqa rasun kaqta musyapäkunanpaq kay *altarnikiman qayaykatsimur juratsiptin
23 jana patsapita patsa mayaykalämunki. Nirkur jutsayuq kaqta castigarpis jutsaynaq kaqtaqa ama castigaykulankitsu.
24 “Kuyashqayki Israel runakuna jutsata rurashqanpita contrankuna vincir nacionninman apakuptin kay templu lädupa rikäramur perdonta manakur alabashuptikiqa
25 jana patsapita patsa mayaykalämunki. Nirkur perdonashpayki unay aylükunata y noqakunata qoykamashqayki nacionman kutiykatsilämunki, Tayta.
26 “Jutsata rurashqanpita pasaypa usyawan castigaptiki kay templu lädupa rikäramur perdonta manakur alabashuptikiqa
27 jana patsapita patsa mayashpayki kuyashqayki Israel aylu ashmaynikikunata perdonaykulanki. Nirkur tantiyaykatsilanki cäsukushushpayki shumaq kawapäkunanpaq. Tsaynöpis qoykushqayki chakrakunaman tamyaykatsilämunki, Tayta.
28 “Kay nacioncho muchuy kaptin, pesti kaptin, usyawan lapan tsakiptin, mikuykunata rancha ushaptin, chukluskuna o malumyakuna ushaptin, mayqan markatapis contrankuna jiruruypa tsapaptin, o ima desgraciapis o ima qeshyapis tsariptin kuyapaykulanki, Tayta.
29 Kuyashqayki Israel runakuna mayqanpis jutsayuq kashqanta tantiyar kay templu lädupa makinkunata joqarkur manakamushuptiki
30 jana patsacho tashqaykipita patsa mayashpayki perdonaykulanki. Qam musyankimi runa imata yarpashqantapis, Tayta. Tsawraqa runakunata cada ünunta imano kawashqanman tupu yanapaykulanki.
31 Tsayno yanapashqaykita tantiyakurmi unay aylükunata qoykushqayki nacioncho imaypis cäsukur *mantsakärishunkipaq.
32 “Tsaynölami kuyapäkuq Tayta Dios kashqaykita mayar juk lädu nacioncho taq mana Israel runakunapis kay nacionman shamunqa. Paykunapis musyanqami lapanpaq munayniyuq Dios kashqaykita y qampaq imapis sasa mana kashqanta. Kay templu lädupa rikäramur manakushuptiki
33 jana patsapita patsa mayashpayki yanapaykulanki. Tsayno yanapaykulanki kay patsacho lapan nación runakunapis rikakushpan kuyashqayki Israel runakunano mantsakushunaykipaq. Tsaynölami paykunapis tantiyakärinqa kay sharkatsishqä templucho adorapäkushushqaykita.
34 “Kuyashqayki Israel runakuna contrankunawan pelyananpaq maymanpis kachaptiki kay akrashqayki marka lädupa y qampaq sharkatsishqä templu lädupa rikäramur manakamushuptiki
35 jana patsapita patsa mayashpayki yanapaykulanki.
36 “Lapan runakunapis jutsa ruraqlami kaykan, Tayta. Tsayno kashpan kuyashqayki Israel runakuna jutsata ruraptin imaptinqa pasaypa rabyashpayki capazchari manana yanapankipaqnatsu. Tsayno kaptin contrankuna shamushpan capazchari nacionninman apakärinqa cercaman karpis o karuman karpis.
37 Tsaycho kaykar capazchari cuentata qokushpan kayno nir perdonta manakushunkipaq: ‘Jutsata rurashpämi qamta mana cäsukushqätsu, Tayta’.
38 Tsaynöpis capazchari contran runakunapa markancho kaykar lapan shonqunwan yärakamur manakushunkipaq. Unay aylükunata qoykushqayki nación lädupa rikäramur, kay akrashqayki marka lädupa rikäramur y qampaq sharkatsishqä templu lädupa rikäramur ruwakushuptiki
39 taykashqayki jana patsapita patsa mayar yanapaykulanki, Tayta. Kuyashqayki Israel runakuna jutsata rurashqanpita perdonaykulanki.
40 “Kay templuykipita noqakuna manakamushqäta mayaykalämuy, Tayta.
41 “TAYTA DIOS, tänaykipaq kaqman aywaykalämuy.Munayniyuq babulniki kashqancho taykulay.Sirvishuqniki cürakunapis lapan shonqunwan sirviykuläshunki.Munashqaykino kawaqkunapis kuyakuq kashqaykipita kushishqa alabaykuläshunki.
42 TAYTA DIOS, akrashqayki reyta imaypis yanapaykulay.Sirvishuqniki Davidta kuyar promitishqaykita cumpliykulay”.*
Ichic wilacuycuna
^ 6.7-8 2Sam. 7.1-3; 1Crón. 17.1-2.
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 6.16 2Sam. 7.11-16; 1Rey. 2.4.
^ 6.18 2Crón. 2.6.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ 6.41-42 Sal. 132.8-11.
