2 Crónicas 7:1-22
7 Salomón manakuyta usharkuptinmi ciëlupita nina ratamur rupatsina sacrificiuta y wakin sacrificiukunatapis rupar usharqan.* Tsaynölami TAYTA DIOSPA pukutayninpis templuman juntarqan.
2 Tsayno juntaptinmi templuman yaykuyta cürakuna mana kamäpakurqantsu.
3 Nina urämuqta y TAYTA DIOSPA pukutaynin templuman juntakuykuqta rikarmi Israel runakunaqa adorar pampaman lätakuykurqan. TAYTA DIOSTA alabarmi kayno nipäkurqan:“¡TAYTA DIOSQA alilata ruraqmi!¡Kuyapäkuyninqa manami imaypis ushakantsu!”*
4 Tsaypitanami rey Salomón y lapan Israel runakuna TAYTA DIOSPAQ sacrificiukunata rupatsipäkurqan.
5 Tsaymi rupatsipäkurqan ishkay chunka ishkay waranqa (22,000) törukunata y pachak ishkay chunka waranqa (120,000) uyshakunata y cabrakunata. Tsaynömi Tayta Diospaq sharkatsishqan templuta lapan Israel runakunawan Salomón dedicarqan.
6 Sitiunkunaman cürakuna ichiykurmi *levitakunapa nawpancho *cornëtakunata tukarqan. Tsaynölami Tayta Diosta alabananpaq rey David ruratsishqan instrumentukunata tukashpan levitakuna cantarkaykarqan kayno nir: “¡Paypa kuyakuyninqa mana ushakaqmi kaykan!” Tsayyaqmi lapan Israel runakuna ichirpaykarqan.
7 Rupatsina sacrificiukuna, tsaki mikuy ofrendakuna y ali kawakuy sacrificiukuna tsaytsika kaptinmi bronci altar mana ayparqantsu rupatsipäkunanpaq. Tsaymi templu patiu chawpintapis Salomón dedicarqan tsay pampacho rupatsipäkunanpaq.
8 Tsaypitanami lapan Israel runakunawan *Ramäda fiestata Salomón rurapäkurqan. Hamat markaman yaykunapita patsa y Egipto raqra kuchunpita patsami tsay fiestaman atska runakuna shapäkamurqan.
9 Altarta dedicar qanchis junaq fiestata rurashqannömi Ramäda fiestatapis qanchis junaq rurapäkurqan. Tsaynölami Ramäda fiestata rurayta usharkur Diosta adorashpan juk junaq mas fiestata rurapäkurqan.
10 Qanchis kaq killa ishkay chunka kimsa (23) kaq junaqcho fiesta rurayta usharkurmi runakuna kutikärinanpaq rey Salomón despacharqan. Wayinkunapa kushishqa kutirmi TAYTA DIOSTA agradëcikärirqan Davidta, Salomónta y kuyashqan Israel runakunata yanapashqanpita.
Salomónta Tayta Dios promitishqan
1 Reyes 9.1-9
11 Yarpashqannömi Salomónqa TAYTA DIOSPA templunta y rey täkunan palaciuta sharkatsiyta usharqan.
12 Tsaypitanami tsakaypa yuriparkur Salomónta TAYTA DIOS kayno nirqan: “Manakamashqaykitami mayashqä. Tsaymi sharkatsishqayki templuta akrashqä tsaycho sacrificiuta rupatsipäkunaykipaq.
13 Tsaymi mana tamyatsimuptï, mikuykunata ushananpaq chukluskunata kachamuptï y pesti qeshyata kachamuptï
14 kuyashqä runakuna jutsa rurashqanta tantiyakur perdonta manakamaptin, *ashimaptin y jutsa ruraykunata kachariptinqa manakamashqanta jana patsapita patsa mayashaq. Jutsa rurashqankunata perdonashpämi nacionninman bendicionnïta churamushaq.
15 “Kay templuman aywaykamur runakuna manakamashqanta mayashaqmi.
16 Kay templucho imayyaqpis tänäpaq akrashqa karmi mana kachaypa imaypis rikashaq.
17 “Qampis taytayki Davidno lapan nishqäta cäsukamar leynïkunata y mandamientükunata cumpliptikiqa
18 paywan *pactuta rurar promitishqänölami qampita miraqkuna imayyaqpis Israel runakunapa mandaqnin rey kanqapaq.*
19 “Leynïkunata y mandamientükunata mana cäsukushpayki juk dioskunata adoraptikiqa
20 qamkunata qoykushqä nacionpita qarqushaykimi. Adorapäkamänaykipaq sharkatsishqa kaptinpis taykashqä templuta kachariykushaqmi. Qamkunata castigaptïmi juk lädu nacioncho taq runakunapis kushipäshushpayki manakaqman churashunkipaq.
21 Kay templu kuyaylapaq kaptinpis raqälana kaykaqta rikaykurmi runakuna mantsakashpan kayno nipäkunqapaq: ‘¡Imanirraq kay nación runakunata y kay templutapis TAYTA DIOS ushakätsishqa!’*
22 Tsayno niptinmi kayno nipäkunqa: ‘Yärakushqan TAYTA DIOSTA qonqakuykur juk dioskunata adorar adorapäkushqanpitami paykunata tsayno pasashqa. Unay aylunkunata Egiptupita Tayta Diosnin jorqaykämuptinpis mana cäsukushqanpitami tsayno castigashqa’ ”.
Ichic wilacuycuna
^ 7.1 Lev. 9.23-24.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ Ramäda fiesta Trïgu cosëchata y üva cosëchata usharkurmi Ramäda fiestata qanchis junaq rurapäkurqan (Lev. 23.34-36; Deut. 16.13). Tsay karqan octubri killa qalaykunanchömi. Tsay fiestata rurananpaqmi lapan olqu kaqkuna Jerusalénman aywapäkurqan (Deut. 16.16). Tsay fiestachömi ramädakunalacho punupäkurqan (Lev. 23.42). Tsaycho punupäkurqan Egiptupita Israel runakunata Tayta Dios jorqamuptin ramädalacho tashqanta yarpänanpaqmi (Lev. 23.43). Jesucristupis Ramäda fiestaman aywarmi runakunata yachatsirqan (Juan 7.37-39).
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 7.18 2Sam. 7.11-16; 1Rey. 2.4.
^ 7.21 2Rey. 25.9; 2Crón. 36.19.
