2 Crónicas 8:1-18
8 TAYTA DIOSPA templunta y rey täkunan palaciuta ishkay chunka (20) watachömi Salomón sharkatsiyta usharqan.
2 Tsaypitanami Hiram qoykushqan markakunatapis altsarkatsir Israel mayinkunata tsayman churarqan tänanpaq.
3 Nirkurnami soldädunkunata pushakurkur aywar Soba nacioncho kaykaq Hamat markata atacarqan. Paykunata vincirkurnami tsay markata acapararqan.
4 Tsaypitanami tsaki jirkacho kaykaq Tadmor markatapis altsatsirqan. Tsaynölami Hamat marka cercancho kaq mikuy churakuna markakunatapis altsatsirqan.
5 Tsaynölami altsatsirqan jana kaq Bet-horónta y ura kaq Bet-horóntapis. Tsay markakunatami murallarkatsir punkukunatapis y trancakunatapis churatsirqan.
6 Tsaynölami altsatsirqan Baalat markata, mikuy churakunan markakunata, guërra carrëta churakunan wayikunata y cawallun muntashqa aywaq soldädukunapa cuartilninkunata. Tsaynölami lapan yarpashqankunata ruratsirqan Jerusaléncho, Líbanucho y maytsaychöpis mandashqan kaqchöqa.
7 Tsay witsan Israel nacioncho tarkaykarqanraqmi amorreo runakuna, heteo runakuna, ferezeo runakuna, heveo runakuna y jebuseo runakuna. Paykunaqa manami Israel runakunatsu karqan.
8 Tsay runakunapa unay aylunkunataqa Israel runakuna nacionninman yaykuykur manami wanutsirqantsu. Tsaymi tsay runakunapita miraqkunaqa Israel nacioncho kaykaptinraq Salomón churarqan faynakunacho arupäkunanpaq. Kananyaqpis tsaynölami paykunaqa faynakunacho arupäkun.
9 Israel runakunatami itsanqa mana obligarqantsu faynacho arunanpaq. Tsaypa trukanqa paykunata churarqan soldädukuna, capitankuna, carrëta manijaq soldädukuna y cawallun muntashqa aywaq soldädukuna kananpaqmi.
10 Salomónpa aruqninkunapa capatazninkunami karqan ishkay pachak pitsqa chunka (250). Paykunami faynacho aruqkunata controlaq.
11 Faraónpa warmi tsurin *Davidpa Markancho taykaptinmi Salomón kayno nirqan: “TAYTA DIOSPA babulnin Israel nacionpa mandaqnin rey Davidpa wayinman yaykatsishqa kaptinmi tsay cuartukuna *sagräduna kaykan. Tsaymi tsay wayicho warmï mana tanmantsu”.
Tsayno nirmi tsay warminta Salomón aparqan ruratsipashqan juk lädu palaciuman.
12 TAYTA DIOSPAQ ruratsishqan *altarchömi rupatsina sacrificiukunata Salomón rupatsiq. Tsay altarqa templupa alarnin frentinchömi karqan.
13 Mayqan junaqkunapis rupatsinanpaq *Moisés qelqashqan leykunacho nishqannölami tsay sacrificiukunata Salomón cadala rupatsiq. Tsaymi rupatsirqan jamay junaqkunacho,* lulu killa fiestakunacho* y cada wata kimsa fiestata rurashqanchöpis.* Tsay fiestakuna karqan Levadüraynaq Tantata Mikupäkunan fiesta, Semäna fiesta y *Ramäda fiestapis.
14 Papänin David nishqannölami trukanakuypa arupäkunanpaq cürakunata Salomón churarqan. Tsaynölami *levitakunatapis churarqan trukanakuypa Tayta Diosta alabananpaq y cürakunata cada junaq yanapananpaq. Templu punkukunacho trukanakuypa täpananpaqmi punku täpaqkunatapis churarqan. Lapanta tsayno churarqan Tayta Diospa sirviqnin David nishqannölami.
15 Tsaymi rey David nishqannöla cürakunapis, levitakunapis y tesöruta churananpaq kaq cuartukunata täpaqkunapis lapanta rurapäkurqan.
16 Templupa cimientunta ruratsir qalaykushqanpita hasta templuta sharkatsiyta ushananyaqmi lapanta rurananpaq kashqantanöla Salomón ruratsirqan. Tsaynöpami TAYTA DIOSPA templun kuyaylapaq karqan.
17 Tsaypitami Salomón aywarqan Ezión-geber markaman y Elot markaman *büquikunata ruratsinanpaq. Tsay markakunaqa kaykan Edom nacioncho kaykaq lamar kuchunchömi.
18 Payta yanapananpaqmi rey Hiram tsayman kacharqan büquikunata y büqui manijaq capitankunata. Tsaynöpami tsay runakuna Salomónpa capitanninkunawan lamarpa aywashpan Ofirman chayapäkurqan. Ofirpitami Salomónpaq apamurqan chunka pitsqa waranqa (15,000) kïlu qorita.
Ichic wilacuycuna
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
^ sagrädu Liyinki santupita tantiyatsikuyta.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ Moisés qelqashqan leykuna Moisés qelqashqan leykunaqa kaykan Sinaí jirkacho Tayta Dios tantiyatsishqan mandamientukuna y leykunami. Tsay leykunatami Moisés qelqarqan Éxodo, Levítico, Números y Deuteronomio librukunacho.
^ 8.13a Núm. 28.9-10.
^ 8.13b Núm. 28.11-15.
^ Ramäda fiesta Trïgu cosëchata y üva cosëchata usharkurmi Ramäda fiestata qanchis junaq rurapäkurqan (Lev. 23.34-36; Deut. 16.13). Tsay karqan octubri killa qalaykunanchömi. Tsay fiestata rurananpaqmi lapan olqu kaqkuna Jerusalénman aywapäkurqan (Deut. 16.16). Tsay fiestachömi ramädakunalacho punupäkurqan (Lev. 23.42). Tsaycho punupäkurqan Egiptupita Israel runakunata Tayta Dios jorqamuptin ramädalacho tashqanta yarpänanpaqmi (Lev. 23.43). Jesucristupis Ramäda fiestaman aywarmi runakunata yachatsirqan (Juan 7.37-39).
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
