2 Corintios 10:1-18
10 Jesucristo kuyapäshuptikimi noqa Pablo qamkunata ruwakü.* Wakinnikishi manakaqman churamashpayki kayno nirkaykanki: “Kaycho karqa mantsa mantsalami Pablo parlapämantsi. Juk lädu markacho kashpanmi itsanqa olqüpaypa cartancho qelqamun”.
2 Tsaynölashi wakinniki nirkaykanki Diosta mana cäsukuq runanöla kashqäta. Tsaymi ruwakü tsayno mana rimamänaykipaq. Tsaynöla rimamaptikiqa shamur olqüpäshaykimi.
3 Runala karpis manami runakunanötsu guërrata rurapäkü.*
4 Noqakunapa armäkunaqa manami runakuna manijashqan armakunatsu kaykan, sinöqa Tayta Dios kamaripämashqan armakunami.* Tsay armakunawanmi contrankunata ushakätsiq soldäduno kaykä.
5 Tsaynöpami runakuna yachaq tukur Tayta Diospa wilakuyninta mana chaskikärinaykipaq tsapata churapäshuptikipis tantiyatsipäkü Jesucristuta cäsukärinaykipaq y yarpashqaykikunapis pay munashqanno kananpaq.
6 Tsaymi favornï kapäkuptikiqa noqa shamur qamkunacho kaykaq conträ parlaqkunata olqüpäshaq.
7 Shumaq tantiyakäriy imano kaykashqaykitapis. Mayqanikipis rasunpa Jesucristupa wilakuqnin karqa tantiyankimanmi noqakunapis paypa wilakuqnin kapäkushqäta.
8 Wilakuqnin kanäpaq Tayta Dios churamashqa kaptinmi* qamkunata anyapänäpaq munayniyuq kaykä. Anyaparpis manami manakaqman churanäpaqtsu anyapä, sinöqa qamkunata shakyätsinäpaqmi. Munayniyuq kashqäpita aläpa alabakushqäta wakinkuna nipäkuptinpis manami penqakushaqtsu.
9 Ama yarpapäkuytsu mantsakätsiyta munalar cartata apatsimushqäta.
10 Wakinkunashi conträ sharkur kayno nirkaykan: “Pabluqa cartalachömi mantsakuypaq olqüpämantsi. Kikin kaycho karqa manami shumaq parlaytapis kamäpakuntsu”.
11 Tsayno niqkuna shumaq tantiyakäritsun: Cartäkunacho nishqänölami qamkuna kaqman chaykamur olqüpäshayki.
12 Tsay ali tukur alabakuqkunanöchari noqakunapis alabakärïman ¿aw? Paykunaqa kikinkunala alabakurmi upano karkaykan.
13 Tsaynöpis alabakärin Tayta Dios mana kachashqan kaqman chayaykur wilakärishqanpitami. Noqakunaqa manami paykunanötsu kapäkü, sinöqa Tayta Dios kachamashqan kaqlachömi wilakärï. Tsaykunalacho wilakurmi qamkuna kaqmanpis chaykamur wilakärishqä.*
14 Musyapäkushqaykinöpis wakinkunapita mas puntatami qamkunata Jesucristupa wilakuyninta wilapashqä. Qamkunaman puntata mana chayamushqa karqa manami munayniyuqtsu kapäküman qamkunata corriginäpaq.
15 Juk runa wilakushqancho wilakärishqäpita alabakärinäpa trukanqa juk markaman aywar wakin mana Israel runakunatapis wilapaytami munarkaykä. Tsayno munarpis Tayta Diosman shumaq yärakärinaykipaq tantiyatsishqäta chaskikäriptikiraqmi juk läduchöpis wilakärishaq.
16 Tsaymi juk markakunamanpis aywar pipis manaraq wilakushqancho wilakärishaq. Tsaynöpami juk wilakushqankunamanqa jatikar kayno nir mana alabakärishaqtsu: “Noqakunami ali wilakuyta wilapashqä”.
17 Tayta Diospa palabranchöpis kaynömi niykan: “Pipis alabakunanpa trukanqa Tayta Diosta alabatsun”.*
18 Kikilan alabakushqanqa manami alitsu. Tayta Dios alabashqanmi itsanqa ali kaykan.
Ichic wilacuycuna
^ 10.1 Pablo imata ruwakushqanta musyanaykipaq liyinki versïculu 2.
^ 10.3 Guërrata rurananpaq parlarqa Satanásta y lutan yachatsikuqkunata ichipänanpaq kashqanpitami parlaykan.
^ 10.4 Tsay armakuna kaykan Diospa palabran (Rom. 1.16; 1Cor. 1.18; Efe. 6.17), Dios munashqanno kawashqantsi (2Cor. 6.6-7) y Espíritu Santuwan Tayta Dios yanapamashqantsimi (2Cor. 3.18).
^ 10.8 Hech. 22.21.
^ 10.13 Gál. 2.7-9.
