2 Corintios 11:1-33
11 Löcu kashqäta conträ runakuna niptinpis mana rabyakuylapa mayapäkamay. Yapaymi kayno nï: Mayapäkamay.
2 Tayta Diosnömi qamkunapaq fiyupa lakikü. Jipash tsurinta piwanpis manaraq punuqta runaman entregayta munashqannömi qamkunatapis Jesucristuman entregayta munaykä.
3 Itsanqa lakikü Evata *Satanás engañashqanno* qamkunatapis lutan yachatsikuqkuna engañashunaykipaq kashqanpitami. Tänanpaq parlakushqan mözulapaq jipash kashqannömi qamkunapis Jesucristulapaq karkaykanki.
4 Tsayno kaykaptinqa ¿imanirtaq chaskikurkaykanki lutan yachatsikuqkuna “Jesucristuqa manami yachakushqaykinötsu kaykan” nishuptiki y “Espíritu Santuqa manami yachakushqaykinötsu kaykan” nishuptiki y “Diospa wilakuyninqa manami yachakushqaykinötsu kaykan” nishuptiki?
5 Tsay lutan yachatsikuqkuna “mas alinnin kaq *apostolmi kapäkü” nishuptikipis noqaqa paykunapita mas rasunpa kaq apostolmi kaykä.
6 Runakunapa nawpancho shumaq parlayta mana yacharpis musyämi imapita parlashqätapis. Tsayno karmi Tayta Diospa wilakuyninta tukuynöpa qamkunata wilapashqä.
7 Tayta Diospa wilakuyninta wilapashpä qamkunapita qellayta mana chaskir ¿lutantatsuraq rurashqä? Chaskinäpa trukanqa gastükunapaq arushqämi. Tsayno arushqä Jesucristupa wilakuyninta chaskikur salvakärinaykipaqmi.
8 Qamkunata sirvinäpaq wakin wawqi panikunanami gastükunapaq yanapamashqa.
9 Lakikärinaykita mana munarmi pishïpakurpis qamkunata manakushqätsu. Tsaypa trukanqa Macedoniapita kaq wawqikunami nistashqäkunapaq apapäkamurqan.*
Nawpapita patsa gastükunapaq umaykikunata mana nanätsishqänölami imaypis umaykikunata nanätsishaqtsu.
10 Tayta Dios musyanmi rasun kaqlata niykashqäta. Jesucristupa ali wilakuyninta mana manakuylapa wilakunäpaq manami intëru Acayacho pipis michämanmantsu.
11 Gastükunapaq yanapamänaykita mana munaptï capazchari qamkunaqa manakaqman churashqäta yarpapäkunki. ¡Manami tsaynötsu! ¡Tayta Diosqa musyanmi qamkunata kuyashqäta!
12 Qamkunata kuyarpis Tayta Diospa wilakuyninta wilakur gastükunapaq manami imaypis manakushaykitsu. Tsaynöpami tsay lutan yachatsikuqkunaqa mana yarpapäkunqatsu noqakunano apóstol kashqanta.
13 Paykuna manami Jesucristupa *apostolnintsu karkaykan, sinöqa apóstol tukurmi runakunata engañar purirkaykan.
14 Tsayno purishqanqa manami espantaypaqtsu kaykan. Kikin Satanáspis ali ángel tukurmi purin.
15 Ali ángel tukur Satanás purishqannömi paykunapis Satanáspa sirviqninkuna kashpan Diospa sirviqnin tukular purirkaykan. Tsayno kashqanpita Tayta Diosmi castiganqa.
Pablo nakashqankuna
16 Yapaymi kayno nï: Löcu kashqäta ama pipis yarpätsuntsu. Tsayno kaptinpis löcuno ichiklata alabakushqäta kanan mayapäkamay.
17 Señor Jesucristo tsayno mana alabakuptinpis tantiyarkunaykipaq löcunöpis alabakushaq.
18 Lutan yachatsikuqkuna alabakuykaptinqa ¿imanirtaq noqapis mana alabakümantsu?
19 Qamkuna nipäkunki shumaq yachaq kashqaykitami. Rasunpa yachaq karqa ¿imanirtaq lutan yachatsikuqkuna alabakur nishushqaykita kushishqa chaskikurkaykanki?
20 Qamkunaqa mana rimakärinkitsu munashqanta ruratsishuptiki, qellaynikita ushaptin, engañashuptiki, mana runatano rikashuptiki y laqyashuptikipis.
21 Tsaynöpis nirkaykan paykunano mana kashpä munayniynaqla kashqätami. ¡Achyä pï, paykunano mana karqa penqakuykächari!
Paykuna alabakushqannölami noqapis alabaküman. Itsanqa paykunano alabakur löcunömi parlaykä.
22 Paykuna hebreo casta kashqannölami noqapis hebreo casta kaykä. Paykuna Israel runa kashqannölami noqapis Israel runa kaykä. Paykuna Abrahampa aylun kashqannölami noqapis Abrahampa aylun kaykä.
23 Paykuna Jesucristupa sirviqnin kashqanta niptinpis noqa masraqmi Jesucristuta sirvï. (Kayno parlarmi löcuno parlaykä.) Maytsaychöpis paykunapita masmi wilakushqä. Wilakushqäpita carcilchöpis mas atska kutimi wichqarashqä.* Autoridäkunapis yaparir yaparirmi astapäkamashqa. Atska kutimi conträkunapis wanutsimayta munashqa.
24 Israel runakunapa autoridäninkuna pitsqa kutimi kimsa chunka isqun (39) maki fiyupa astamashqa.*
25 Kimsa kutimi Roma soldädukuna fiyupa wirumashqa.* Juk kutimi runakuna saqmaypapis ichiklapa wanutsimashqatsu.* Kimsa kutimi aywarkaykashqä *büquipis talpukarqan. Juk paqas juk junaqmi qeruta makalakuynïpa lamarcho awnarqä.
26 Diospa wilakuyninta wilakurmi maytsaypapis purishqä. Atska kutimi mayupis cäsi cäsi apamashqa. Suwakunapa makinpitapis qeshpirqä. Israel runakunapis* y mana Israel runakunapis wanutsimaytami munamashqa.* Markachöpis, chunyaqchöpis y lamarchöpis ichiklapami mana wanushqätsu. Jesucristuman janan shonqula yärakuqkunapis wanutsimaytami munamashqa.
27 Mayman chayarpis sasa aruykunachömi arushqä. Atska kutimi yarpachakur punuytapis mana tarishqätsu. Yarqanarmi y yakunarmi purishqä. Röpä lapshala kaptin qasätsikushqämi.
28 Tsay jananmanpis waran waranmi maytsaycho kaykaq wawqi panikunapaq yarpachakü.
29 Juk wawqi o juk pani nakaptinqa fiyupami lakikü. Pitapis jutsata ruratsiptinqa jutsata ruratsiq runapaq fiyupami rabyä.
30 Alabakunäta munapäkuptikiqa munayniynaq kashqäpitami alabakushaq.
31 Señor Jesucristupa Papänin Tayta Diosmi musyan rasun kaqlata parlaykashqäta. Pay imaypis alabashqa kaykulätsun.
32 Damascuchömi rey Aretaspa gobernadornin soldädukunata churarqan marka punkupa yarquptï prësu tsarimänanpaq.
33 Tsaymi wawqikuna canastaman winarkamar marka murälla jananpa urätsimarqan. Tsaynöpami Tayta Dios yanapamarqan qeshpinäpaq.*
Ichic wilacuycuna
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ 11.3 Gén. 3.1-5, 13.
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
^ 11.9 Fil. 4.15-18.
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
^ 11.23 Hech. 16.23.
^ 11.24 Deut. 25.3.
^ 11.25a Hech. 16.22.
^ 11.25b Hech. 14.19.
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ 11.26a Hech. 9.23.
^ 11.26b Hech. 14.5.
^ 11.32-33 Hech. 9.23-25.
