2 Corintios 12:1-21
12 Alabakushqäwan imata mana jorqurpis kanan wilashayki Señor Jesucristo revelacionkunata rikatsimashqanta.
2 Jesucristuman yärakuq reqishqä runatami* chunka chusku wata qepatana kimsa kaq ciëluman* Tayta Dios aparqan. Itsanqa manami musyätsu cuerpuntin aywashqanta o almalan aywashqantapis. Tsaytaqa Tayta Dioslami musyan.
3 Cuerpuntin aywashqanta o almalan aywashqanta Tayta Diosla musyaptinpis
4 paraísuman* apashqantami musyaykä. Tsaychömi mayarqan pipis mana mayashqankunata. Tsay mayashqankunataqa imano tantiyatsiytapis manami kamäpakuntsu.
5 Tsay runa jana patsaman chayashqanpita alabämanmi. Kikïmi itsanqa mana alabakushaqtsu, sinöqa munayniynaq kashqalätami wilashayki.
6 Alabakuyta munarqa rasun kaqtami alabaküman. Tsayno kaptinpis santuna kashqäta runakuna yarpänanta mana munarmi alabakütsu. Manami alabakushqäta mayartsu pipis ali runa kashqäta yarpanman, sinöqa imano kawashqätapis rikar y imata parlashqätapis mayarmi.
7 Jana patsacho rikashqäkunapita mana alabakunäpaqmi Tayta Dios kamakätsishqa fiyupa nakanäpaq. Tsay nakayqa cuerpücho kasha jatiraykaqnömi kaykan. Kikin *Satanás kachamushqan nakaynöraqmi fiyupa nakatsiman.
8 Tsay nakaypita jorqamänanpaqmi Señornintsita kimsa kuti manakurqä.
9 Manakuptïmi kayno nimarqan: “Kuyashqaläwan qamqa contentakuy. Tsayno nakar kalpaynaq kaptikiraqmi munaynïwan yanapashayki”.
Tsayno nimaptinmi tsay nakaywan nakar kalpaynaq karpis kushikü. Kalpaynaq kaptïraqmi Jesucristo yanapaykäman.
10 Tsaymi qeshyarpis, ashlimaptinpis, pishïpakurpis, chikimaptinpis y ima nakaycho karpis Jesucristuta sirvir mana lakikütsu. Kalpaynaq karpis kalpayuqmi rikakü.*
Corintucho kaq wawqi panikunapaq Pablo lakikushqan
11 Löcuno alabakur parlanäpaqqa kikikikunami ashipämashqanki. Alabakunäpa trukanqa qamkunami alabamankiman karqan. Kikiläpita imatapis rurayta mana kamäpakurpis tsay *apóstol tukuqkunapitaqa mas aliraqmi kä.
12 Apóstol kashqäta tantiyakärinaykipaqmi qamkuna kaqcho nakarpis espantaypaq milagrukunata y señalkunatapis rurarqä.
13 Itsanqa wakin markakunacho gastükunapaq wawqi panikunata manakushqänöqa qamkunata manami manakushqätsu. ¿Imanirtaq tsaypita jaqayashqa karkaykanki? ¿Mana manakushqätsuraq jutsä kashqa?
14 Kamarikushqanami kaykä qamkuna kaqman yapay shamunäpaq. Kananwanqa kimsa kutinami shamushaq. Manami kikïpaq imatapis ashirtsu qamkunaman shamushaq, sinöqa qamkunata kuyapar yanapanäpaqmi. Musyashqantsinöpis manami pï taytapis tsurinkunata manakuntsu, sinöqa yanapanmi.
15 Tsaynölami noqapis qamkunata manakunäpa trukanqa imäkunatapis ushashaq y qamkuna rayku wanunäpaqpis listu kaykä. Lapan shonqüwan qamkunata kuyapar yanapaykaptï ¿imanirtaq noqapita jukniraqyashqa karkaykanki?
16 Musyapäkushqaykinöpis manami mayqanikipa umaykitapis nanätsishqätsu. Tsayno kaptinpis wakinnikishi nirkaykanki waktsakunapaq niq tumpala kikïkunapaq qellayta shuntaykätsishqäta.
17 ¿Imanirtaq tsayno yarparkaykanki? Tantiyakäriy. ¿Imaylaqa qamkunaman kachamushqä wawqikuna mayqalanpis lulapäshurqaykiku?
18 Juk wawqitawan Tituta qamkuna kaqman kachamuptï* manami imatapis sakyashushqankitsu. Tito mana sakyapakuq kashqannömi noqapis mana sakyapakütsu. Paywanqa tsay yarpaylami kaykä.
19 Kay cartata apatsimushqäta liyir capaz yarparkaykanki tsapakunaläpaq qelqamushqäta. Kuyay wawqi panikuna, manami tsapakunäpaqtsu qelqaykämü, sinöqa tantiyakushpayki Tayta Dios munashqanno kawapäkunaykipaqmi. Jesucristuta sirviq karmi Tayta Diospa nawpancho qamkunata yätsiykä.
20 Qamkuna kaqman shamur lutanta rurarkaykaqta tarinäpaq kaqtami lakikü. Tsaynöpis lakikü tsayno kaykaqta tarir qamkunata olqüpänäpaq kashqanpitami. Capazchari qamkunata tarïman rimanakurkaykaqta, chikinakurkaykaqta, rabyatsinakurkaykaqta, jukpa wasanta rimarkaykaqta, jamurpänakurkaykaqta, rabyapänakurkaykaqta, runa tukurkaykaqta y mana alikunata rurarkaykaqta.
21 Capazchari melanaypaq kaqkunata, *fornicación jutsata y jukwan jukwan purirkaykashqaykita mana kacharishqankitsu. Jutsata ruraykaqta tarir qamkunapita Tayta Diospa nawpancho penqakunäpaq kaqpitami lakikü.
Ichic wilacuycuna
^ 12.2a Juk runaman jitaykular kikinpaqmi Pablo parlarqan. Tsayno parlarqan orgullösu kayta mana munarmi. Kikinpaq parlashqanta Pablo wilamantsi versïculu 7-chömi.
^ 12.2b Punta kaq ciëluqa kaykan pukutay kaykashqanmi. Ishkay kaq ciëluqa kaykan qoylarkuna, killa y inti kaykashqan kaqmi. Kimsa kaq ciëlunami kaykan Tayta Dios tashqan.
^ 12.4 Luc. 23.43.
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ 12.10 Tsayno nirmi Pablo kayno nirqan: Tsayno nakar kalpaynaq kaykarpis Jesucristo yanapamaptinmi fuerti rikakü.
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
^ 12.18 2Cor. 8.6, 16-18.
^ fornicación jutsa Fornicación jutsaqa kaykan majalanwan kakunanpa trukan jukwan kakushqan, mana ashinakuylapa kakushqan, uywakunawan kakushqan, olqupura kakushqan, warmipura kakushqan, wayrapakuq warmiwan kakushqan, aylunwan kakushqan y jukwan jukwan lutala kakushqanpis (Lev. 18.6-23; 1Cor. 5.1; 6.12-20; Efe. 5.5).
