2 Corintios 2:1-17
2 Nawpata qamkuna kaqman shamur lakikatsishqäno yapay lakikatsiyta manami munätsu.
2 Qamkunata lakikatsiptïqa ¿pïlanaraq kushikatsimanqapis?
3 Tsaymi shamunäpa trukan cartata apatsimü. Manami munashqätsu shamuptï lakikatsimänaykita, sinöqa lapantsipis kushikunantsitami munashqä. Musyarqämi qamkuna kushikuptiki noqakunapis kushikunäpaq kashqanta.
4 Tsay cartata qelqamur jaqayashqala karkaykashqaykita yarparmi fiyupa lakikushpä waqarqä. Manami lakikärinaykipaqtsu cartata apatsimurqä, sinöqa qamkunata pasaypa kuyashqäta musyapäkunaykipaqmi.
Contran sharkuq runata Pablo perdonashqan
5 Conträ sharkuq runaqa manami noqalatatsu lakikatsimashqa, sinöqa qamkunatapis lakikatsishushqankimi.
6 Tsay runata corrigipäkushqayki alinami kaykan.
7 Aläpa mana lakikunanpaq perdonar shakyätsipäkuy.
8 Tsaymi qamkunata ruwakü payta kuyar ali shimilaykipa parlapänaykipaq.
9 Tsay cartata qamkunaman apatsimurqä tsay runata corrigipäkunaykipaqmi. Tsaynöpami musyayta munarqä cäsukamashqaykita o mana cäsukamashqaykitapis.
10 Tsay perdonashqayki runata noqapis perdonämi. Noqa perdonanäpaq mana kaptinpis qamkuna raykumi Jesucristupa nawpancho payta perdonashqä.
11 Musyantsimi *Satanás imaykanöpapis runakunata jutsaman tunitsinanpaq kashqanta. Tsaymi tsay runata perdonaptintsi jaqayätsinakuyman Satanás mana jitarpamäshunnatsu.
Troascho Pablo lakikushqan
12 Troas markaman Jesucristupa ali wilakuyninta wilakuq chayaptï manami ima tsapapis kashqatsu.
13 Tsayno kaptinpis qamkuna kaqpita Tito mana mayakämuptinmi fiyupa lakikurqä. Tsaymi Troascho qoyänäpa trukanqa Tituta ashiq* Macedonia provinciaman pasakurqä.*
Tayta Diosta Pablo agradëcikushqan
14 ¡Tayta Diostami agradëcikü! Paymi Jesucristucho kapäkuptï noqakunata imaypis yanapaykäman. Tsaynölami wilakäriptï maytsaychöpis runakunata tantiyatsin Jesucristuta chaskikur payta *reqipäkunanpaq.
15 Jesucristupa wilakuyninta wilakärishqäqa inciensupa ali asyayninnömi* Tayta Diospaq kaykan. Salvakunanpaq kaqkunaman y mana salvakunanpaq kaqkunamanpis chayanmi.
16 Mana salvakuqkunapaqqa melanaypaq asyaqnömi kaykan. Salvakuqkunapaqmi itsanqa maypis muskirkuypaqno kaykan. Tsayno kaptinqa ¿piraq kikilanpita Jesucristupa wilakuyninta wilakunman?
17 Wakinkunaqa imatapis chaskinan kashqalami Diospa wilakuyninta wilakurkaykan. Noqakunaqa manami paykunanötsu kapäkü, sinöqa Tayta Dios kachamashqa kaptin y noqakunawan pay kaykashqanta musyarmi Jesucristupa jutincho lapan shonqüwan wilakärï.
Ichic wilacuycuna
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ 2.13 Pabluwan tinkur Tito wilapashqanta musyanaykipaq liyinki 2Cor. 7.6-15.
^ 2.12-13 Hech. 20.1.
^ reqiy, Diosta reqiy Tayta Diosta reqirqa payman yärakuntsi y pay munashqanno kawar kushikuntsi. Tsaynöpis tantiyantsi kuyakuq kashqanta, munayniyuq kashqanta, jutsaynaq santu kashqanta, juzgakuq kashqanta, alilata ruraq kashqanta y promitishqanta imaypis cumpliq kashqanta.
^ 2.15 Wakin runakunaqa mushkuyninnömi nipäkun.
