2 Corintios 5:1-21
5 Musyantsimi kay cuerpuntsi ushakaptinpis mana ushakaq mushuq cuerputa Tayta Dios qomänantsipaq kashqanta. Kay patsachöqa cuerpuntsi ushakaq tsuklanölami kaykan. Gloriachömi itsanqa mushuq cuerpuntsi Tayta Dios rurashqan ali wayinöna kanqa.
2 Kay patsacho kawashqantsiyaqqa mushuq cuerputa jukla chaskikuyta munarmi yarpachakur lakikuntsi.
3 Mushuq cuerputa chaskikurqa manami qarapächunötsu kashun, sinöqa ali röpashqanönami.
4 Kay patsacho cuerpuntsi ushakaqla kaptin lakikurpis manami wanuyta munantsitsu, sinöqa cuerpuntsi mana ushakaq cuerpuman jukla tikranantami munantsi.
5 Mana ushakaq cuerpuyuq kanantsipaqmi Tayta Dios kamamashqantsi. Mushuq cuerputa chaskinantsipaq kashqanta musyanantsipaqmi Espíritu Santuta qomashqantsi.
6 Tsaymi Tayta Diosman imaypis yärakuntsi. Musyantsimi kay patsacho kashqantsiyaq Tayta Diosta manaraq rikashqantsita.
7 Payta manaraq rikarpis paymanmi yärakuntsi.
8 Payman yärakurmi cuerpuntsita kacharir nawpanman jukla chayayta munantsi.
9 Tsaymi kawarpis o wanurpis imaypis yarpachakuntsi Tayta Dios munashqanno kawanantsipaq.
10 Jesucristupa nawpanman chayaptintsi lapantsitami juzgamäshun.* Kay patsacho kashqantsiyaq alita o mana alita rurashqantsiman tupumi premiutapis o castïgutapis chaskishun.
Tayta Dioswan runakuna amistananpaq wilakushqan
11 Señor Jesucristo juzgamänantsipaq kashqanta musyarmi payta *mantsakur wilakuyninta imaykanöpapis wilakurkaykä. Rasunpa payta sirvirkaykashqäta Tayta Dios musyanmi. Tsaytaqa qamkunapis tantiyapäkunkiman.
12 Tsayno niykä manami yachaq kashqäta alabakurtsu, sinöqa Tayta Diospa wilakuqnin kashqäta tantiyar kushikärinaykipaq y pipis conträ parlaptin favornï sharkunaykipaqmi.
Tsay conträ sharkuqkunaqa yachaq tukurpis janan shonqulami Tayta Diosta sirvipäkun.
13 Löcu kashqäta nipäkuptinpis Tayta Diosta sirvinä kashqami löcu nir jutitsipashqapis kaykä. Ali yarpayniyuq kashqäta nipäkuptinpis qamkunata yanapanä raykumi ali yarpayniyuq kaykä.
14 Imano nipäkamaptinpis noqakunaqa Jesucristo kuyamashqantsita tantiyarmi wanuy kaway payta sirvipäkü. Tsayno sirvipäkü Jesucristo lapantsi rayku wanushqanta musyarmi. Noqantsi rayku wanuptinmi lapantsipis jutsa ruraypaq wanushqanöna kaykantsi.
15 Manami kikintsi munashqalantsita rurar kawakunantsipaqtsu Jesucristo wanushqa, sinöqa pay munashqannöna kawanantsipaqmi. Payqa wanurpis noqantsi raykumi kawarimushqa.
16 Tsayno kaptinmi Diosman mana yärakuq runakunanöqa pipaqpis lutanta yarpätsu. Nawpataqa noqakunapis mana yärakuq runakunanölami Jesucristupaq lutanta yarparqä. Kananqa manami tsaynönatsu yarpapäkü.
17 Pipis Jesucristucho karqa mushuq kamashqa runanami kaykan.* Unay kawayqa pasashqanami. Kananqa lapanpis mushuqnami kaykan.
18 Tsayno kanantsipaq kikin Tayta Diosmi kamakätsishqa. Paymi noqantsi rayku Jesucristo wanuptin perdonamashqantsi. Tsaynöpis lapan runakuna paywan amistananpaqmi wilakuyninta wilakärinäpaq churapäkamashqa.
19 Tsay wilakuyqa kaynömi niykan: Jesucristuchömi Tayta Dios karqan runakunata jutsankunapita perdonar kikinwan amistananpaq. Tsay wilakuyta wilakärinäpaqmi churapäkamashqa.
20 Tsaymi noqakunaqa Jesucristupa wilakuqninkuna karkaykä. Wilakuqnin karmi Tayta Dios ruwakuykaqno Jesucristupa jutincho pïmaytapis kayno nir ruwakärï: ¡Tayta Dioswan amistakuy!
21 Jutsaynaq kaykaptinpis lapan jutsantsitami Jesucristuta Tayta Dios jitapashqa. Tsaymi jutsayuq runano noqantsi rayku wanuptin paycho kaptintsi jutsaynaqtano Tayta Dios chaskimantsi.
Ichic wilacuycuna
^ 5.10 Rom. 14.10.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ 5.17 Gál. 6.15; Efe. 4.24; Tito 3.5; 1Ped. 1.3, 23.
