2 Pedro 2:1-22
2 Israel nacioncho lula profëtakuna unay kashqannömi qamkunachöpis lutan yachatsikuqkuna kanqa. Paykunaqa Tayta Diospa wilakuqnin tukurmi criyitsishushpayki manakaqkunata yachatsipäkushunki. Tsaynölami salvakuq Señor Jesucristutapis ñëganqa. Paykunatami Tayta Dios juiciu final junaqcho elaqpita ushakätsinqa.
2 Paykuna yachatsishqanta chaskiparmi runakunapis warmikunapis jutsata rurar kawapäkunqa. Tsayno kawapäkuptinmi Tayta Diospa wilakuyninta pïmaypis manakaqman churanqa.
3 Qellaypaq wanushpanmi ali tupaylapa sakyapäkushunki. Paykunata infiernuman qaykunanpaq unaypita patsanami Tayta Dios destinarqan. Tsaymi paykunata pasaypa nakay shuyaraykan.
4 Jutsa ruraq *angilkunatapis Tayta Dios manami perdonarqantsu, sinöqa infiernumanmi qaykurqan. Tsaychömi yanawyaykaq tsakayman wichqarqan juiciu final junaq chayamuptin juzgananpaq.
5 Noé kawanan witsanpis jutsasapa runakunata manami perdonarqantsu. Tsay runakunaqa Tayta Dios munashqanno kawananpaq Noé wilapaptinpis manami chaskikurqantsu. Tsaymi Tayta Dios diluviuwan ushakätsirqan. Noélatami qanchis runakunatawan salvarqan.*
6 Tsaynölami Sodoma y Gomorra markakunatapis Tayta Dios rupatsirqan uchpayashqanyaq.* Tsayno rurarqan castigakuq kashqanta jutsasapa runakuna tantiyakärinanpaqmi.
7 Tsay markakunata rupatsirpis Lottaqa ali runa kaptinmi salvarqan. Paymi tsay markakunacho taq fiyu runakuna jutsata rurar kawapäkuptin ima ruraytapis mana kamäpakurqantsu.*
8 Paykuna kaqcho tashpanmi jutsa rurashqanta rikar y manakaqkunata parlashqanta mayar waran waran fiyupa lakikurqan.
9 Tsaynöpami musyantsi pay munashqanno kawaq kaqtaqa lapantsitapis Tayta Dios ima nakaypitapis salvamänantsipaq kashqanta. Jutsa ruraqkunatami itsanqa juiciu final junaq fiyupa castiganqa.
10 Mas fiyupami castiganqa shanaripakur pïmaywanpis kakuqkunata. Tsay runakunaqa Tayta Diostapis manami cäsukärintsu. Yachaq tukushpanmi *supaykunatapis mana mantsakuypa ashlipäkun.
11 Jana patsacho kaykaq angilkunaqa runakunapita mas munayniyuq kaykarpis y Tayta Diospa nawpancho kaykarpis manami supaykunata ashlipäkuntsu.
12 Tsay runakunaqa mana tantiyarmi tsayno ashlipäkun. Uywakunano yarpayniynaq kashpanmi wanutsishqa kanalanpaq yurishqa. Jutsata ruraykashqalanchömi ushakanqa.
13 Wakinkunata nakatsishqanpitami kikinkunapis nakapäkunqa. Pïmaypa nawpanchömi manakaqkunata rurapäkurpis mana penqakuypa jeqchikachan. Qamkuna mikunaykipaq juntakashqaykichöpis lutankunata parlarmi kushikärin.
14 Tsay runakunaqa pï warmita rikarpis munaparkaykanmi. Jutsa rurayta manami ajayantsu. Manaraq shumaq yärakuqkunatami lutankunata yachatsipäkun. Runa mayinta imaykanöpapis sakyayta yachanmi. Tsayno kashqanpitami fiyupa castigashqa kanqa.
15 Tayta Dios munashqanno nawpata kawarkurpis kananqa qepamanmi kutikärishqa. Beorpa tsurin Balaam qellay raykula lutanta rurashqannömi paykunapis lutankunata rurarkaykan.
16 Qellaypaq kashqa Balaam aywaykaptinmi china bürrun parlar micharqan mana aywananpaq.*
17 Tsay runakunaqa tsakishqa pukyuno y wakpa kaypa aywaq tsaki pukutaynömi karkaykan. Paykunapaqmi kamarishqa kaykan yanawyaykaq tsakay [imayyaqpis] tsaycho wichqarpänanpaq.
18 Paykunaqa sumätsishpanmi yachaq tukur imatapis parlapäkun. Jutsa ruraykunata tsayraq kacharishqa kaqkunatami shimita jatipar shakyätsin jutsata rurananpaq.
19 Runakunatami promitipäkun yachatsishqankunata chaskir libri kawapäkunanpaq kashqanta. Tsayno promitirpis manami kikinkunapis libritsu kaykan, sinöqa jutsa ruraypa munaynilanchömi karkaykan. Ima viciupis runata vinciptinqa tsay viciupa munayninchömi kaykan.*
20 Salvamaqnintsi Señor Jesucristuta chaskikushqa kaykar yapay jutsa rurayman kutirqa nawpata kashqanpita mas peormi rikakun.*
21 Diospa wilakuyninta chaskikushqa kaykar jutsa rurayman kutinanpaq kaykaptinqa mejor tsay *sagrädu wilakuyninta ama chaskikunmantsu karqan.
22 Jutsa rurayman kutiqkunapaqqa rasuntachari kayno nipäkun: “Alquqa gumitashqanta yapaymi kutipan. Kuchipis armaratsiptin yapaymi mitucho qochpan”.*
Ichic wilacuycuna
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 2.5 Gén. 6.1-7; 8.18.
^ 2.6 Gén. 19.24.
^ 2.7 Gén. 19.1-16, 29.
^ supay Supaykunaqa Tayta Diosta mana cäsukuq angilkunami kaykan. Paykunami Satanás mandashqanta rurar runakunata qeshyatsin, löcuyätsin, chikinakatsin y yarpayninta pantakätsin Tayta Diospa ali wilakuyninta mana tantiyapäkunanpaq (Mat. 12.43-45; Mar. 1.23-26; Luc. 8.2). Masta musyanaykipaq liyinki Satanáspita tantiyatsikuyta.
^ 2.15-16 Núm. 22.4-35.
^ 2.19 Juan 8.34; Rom. 6.6, 16.
^ 2.20 Mat. 12.45; Luc. 11.26.
^ sagrädu Liyinki santupita tantiyatsikuyta.
^ 2.22 Prov. 26.11.
