2 Reyes 1:1-18
1 Rey Acab wanuykuptinmi* Moab nación runakuna Israel runakunapa contran sharkapäkurqan.
2 Juk junaqmi Acabpa tsurin rey Ocozías* Samaria markacho kaq palaciunpa ishkay kaq pïsuncho kaykar ventänapita jeqakurqan. Tsaymi pasaypa antsa kar aliyänanpaq kashqanta o mana aliyänanpaq kashqantapis musyayta munar Ecrón markaman kachakurqan *Baal-zebub diosta tapukamunanpaq.
3 Tsaymi TAYTA DIOSPA *angilnin Elíasta kayno nirqan: “Jukla aywashpayki Ocozías kachashqan runakunawan tinkur kayno ninki: ‘¿Imanirtaq Israelcho Dios mana kaptinnöpis Ecróncho kaykaq Baal-zebub diosman tapukuq aywarkaykanki?
4 Rey Ocozíaspaq TAYTA DIOS kaynömi nin: Qeshyashqaykipita aliyänaykipa trukanqa wanunkipaqmi’ ”.
Ángel nishqannölami Elías aywaykur tsay kacha aywaq runakunata wilarqan.
5 Tsayno wilaykuptinmi kacha aywaq runakuna rey kaqman kutipäkurqan. Kutiykuptinmi rey kayno tapurqan: “¿Imanirtaq jukla kutipäkamushqanki?”
6 Tsaymi kayno nipäkurqan: “Juk runawanmi tinkupäkushqä. Paymi nimashqa qamta kayno nir wilanäpaq: ‘¿Imanirshi Israelcho Dios mana kaptinnöpis Ecróncho kaykaq Baal-zebub diosman tapukuq kachapäkamashqanki? Tsayshi kananqa aliyänaykipa trukan wanunkipaq. Tsayno kananpaq kashqantashi TAYTA DIOS nishqa’ ”.
7 Tsayno wilaptinmi rey kayno tapurqan: “¿Imanötaq tsay runa kashqa?”
8 Tsawraqa nipäkurqan: “Paypa röpanqa kashqa aqtsapita awashqa y wachkunpis qarapita rurashqami”.*
Tsayno wilaptinmi rey kayno nirqan: “¡Payqa kanqa Tisbépita kaq Elíasmi!”
9 Tsaymi pitsqa chunka (50) soldädukunata capitannintawan kacharqan Elíasta prësu tsarimunanpaq. Paykuna chayananpaqmi Elíasqa jirkancho jamaraykarqan. Chayaykurmi capitán kayno nirqan: “¡Profëta Elías, rey Ocozíasmi kachamashqa qamta pushanäpaq!”
10 Tsayno niptinmi Elías kayno nirqan: “Tayta Diospa profëtan kashqäta musyanaykipaqmi ciëlupita nina ratamur qamta y pitsqa chunka soldäduykikunatapis rupar ushashunki”.*
Tsayno niptinmi ciëlupita nina ratamur paykunata rupar usharqan.
11 Tsaypitanami reyqa kacharqan juk capitantana pitsqa chunka (50) soldädukunatawan. Paypis tsayman chayaykur Elíasta kayno nirqan: “¡Profëta Elías, rey Ocozíasmi kachamashqa qamta pushanäpaq!”
12 Tsayno niptinmi Elías kayno nirqan: “Tayta Diospa profëtan kashqäta musyanaykipaqmi ciëlupita nina ratamur qamta y pitsqa chunka soldäduykikunatapis rupar ushashunki”.
Tsayno niptinmi ciëlupita nina ratamur paykunatapis rupar usharqan.
13 Tsaypitanami rey yapay juk capitantana kacharqan pitsqa chunka (50) soldädunkunatawan. Tsay capitannami Elías kaqman chayaykushpan nawpanman qonqurpakuykur ruwakurqan kayno nir: “Tayta profëta, noqatapis kay soldädükunatapis ama wanuykatsilämaytsu.
14 Noqa musyämi punta shamuq ishkan capitankunata y soldädunkunatapis ciëlupita ratamuq ninawan ushakätsishqaykita. Ama paykunatanöqa ushakaykatsilämaytsu”.
15 Tsayno manakuptinmi TAYTA DIOSPA angilnin Elíasta kayno nirqan: “Mana mantsakuypa paykunawan ayway”.
Tsayno niptinmi paykunawan rey kaqman Elías aywarqan.
16 Chayaykurmi rey Ocozíasta Elías kayno nirqan: “TAYTA DIOSMI kayno nin: ‘Israel nacioncho Dios mana kaptinnöpis ¿imanirtaq Ecróncho kaykaq Baal-zebub diosman tapukuq kachakushqanki? Tsayno kachakushqaykipitami aliyänaykipa trukanqa wanunkipaq’ ”.
17 Elías nishqannölami rey Ocozías wanurqan. Ocozíaspa tsurin mana kaptinmi wawqin Joram rey karqan. Mandaq kayta qalaykurqan Josafatpa tsurin kaq Joram ishkay watana Judá nacioncho rey kaykaptinmi.
18 Rey Ocozías rurashqankunapis lapanmi qelqaraykan Israel nacionpa mandaqnin reykunapa acta libruncho.
Ichic wilacuycuna
^ 1.1 1Rey. 22.34-37.
^ 1.2 1Rey. 22.51-53.
^ Baal Baalqa cananeo runakuna adorashqan diosmi karqan. Juk dios kashqanta yarpaptinpis manami rasunpatsu dios karqan. Cananeo runakuna yarpapäkurqan tsay diosta adoraptin uywankuna mirananpaq kashqanta y chakrankuna ali wayunanpaq kashqantami. Tsaynöpis yarpapäkurqan löcu tamyata y ali tamyatapis kachamushqantami.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
