2 Reyes 12:1-21
12 (2) Israel nacioncho qanchis wata Jehú rey kaykaptinmi Judá nacioncho Joás rey kayta qalaykurqan. Payqa chusku chunka (40) watami Jerusaléncho rey karqan. Mamanqa Beerseba markapita kaq Sibiami karqan.
2 (3) Cüra Joiada yätsiptinmi Joásqa TAYTA DIOS munashqanno lapanta rurarqan.
3 (4) Itsanqa markakunacho kaykaq *altarkunata manami juchutsirqantsu. Tsay altarkunachömi runakuna sacrificiukunata imaypis rupatsipäkurqan y inciensuwan qoshtatsipäkurqan.
4 (5) Juk junaqmi cürakunata rey Joás kayno nirqan: “TAYTA DIOSPA templunta altsatsishun. Tsaypaq TAYTA DIOSPA templunman apapäkamushqan qellayta shuntapäkunki. Tsayno shuntapäkunki censakärishqanpita impuestu kaptinpis*, aylunta dedicashqanpita ofrenda kaptinpis* o kikinpa voluntäninpita apapäkamushqan ofrenda kaptinpis.*
5 (6) Tsay qellaymi kanqa templuta altsatsinaykipaq”.
6 (7) Tsayno niptinpis ishkay chunka kimsa (23) wata pasashqanyaq cürakunaqa manaraqmi templuta altsatsirqanraqtsu.
7 (8) Tsaymi cüra Joiadata y wakin cürakunatapis rey Joás qayaykatsir kayno nirqan: “¿Imanirtaq templuta mana altsatsishqankiraqtsu? Kananpitaqa shuntashqayki qellayta amana gastapäkuynatsu, sinöqa templuta altsatsinaykipaq katsun”.
8 (9) Tsayno niptinmi cürakuna awnir kikinkunapa gastunkunapaq runakunapita qellayta mana chaskirqannatsu. Templuta altsatsinanpaqpis juk runatanami churapäkurqan.
9 (10) Tsaymi cüra Joiadaqa babulta rurarkatsir tsapanan chawpinpa qellayta winapäkunanpaq uchkurqan. Nirkurmi altarpa alawqa kaq nawpanman tsay babulta churarqan. Tsaymanmi runakuna apamushqan qellayta templu täpaq cürakuna winapäkurqan.
10 (11) Tsay babulman juntaqnöna kaptinmi reypa secretariun y mandaq cüra aywaykur tsay qellayta yupapäkuq. Nirkurmi shumaq churapäkuq lutala pipis mana jorqunanpaq.
11 (12) Tsaypitanami templuta altsatsiylanta pägananpaq encargädu runakunata entregapäkurqan. Paykunanami aruylanta pägarqan carpintërukunata, contratistakunata,
12 (13) albañilkunata y rumi laqlaqkunata. Tsaynöpis qellayta kamariparqan qerukunata y laqlashqa rumikunata rantinanpaq y wakin gastunkunapaqpis.
13 (14) TAYTA DIOSPA templunman apamushqan qellayqa manami tazonkunata, mëchapa litpa jorqukunanta, *cornëtakunata, ni ima manëjutapis qellaypita ni qoripita rurapäkunanpaqtsu karqan, sinöqa tsay qellay karqan templuta altsatsinalanpaqmi.
14 (15) Tsaymi tsay qellaytaqa TAYTA DIOSPA templunta altsatsinalanpaq kamaripäkuq.
15 (16) Templuta arutsiqkunaqa mana suwakuypami lapanta rurapäkuq. Tsaymi qellayta kamaripaqkunaqa mana tapupaqnatsu aruqkunata pägar aykata gastashqantapis.
16 (17) Purificatsina sacrificiupaq y consagratsina sacrificiupaq apamushqan qellayqa manami templuta altsatsinanpaqtsu karqan, sinöqa cürakunapaqmi.*
17 (18) Tsay witsanmi Siria nacionpa mandaqnin rey Hazael soldädunkunawan Gat markata atacar vincipäkurqan. Nirkurnami Jerusalén markata atacananpaq aywapäkurqan.
18 (19) Atacananpaq aywarkaykashqanta musyaykurmi Judá nacionpa mandaqnin rey Joásqa TAYTA DIOSPA templuncho churaraykaq manëjukunata shuntarqan. Tsay manëjukunataqa templuman churarqan rey Josafat, rey Joram, rey Ocozías y kikin Joásmi. Tsaynöpis TAYTA DIOSPA templuncho y palaciucho tarishqan kaq qoritaqa lapantami shuntarkur Siria nacionpa mandaqnin rey Hazaelman apatsirqan. Tsayta chaskirkurnami Hazaelqa Jerusalénta mana atacarqannatsu.
19 (20) Joás imata rurashqankunapis lapanmi qelqaraykan Judá nacionpa mandaqnin reykunapa acta libruncho.
20 (21) Joástaqa kikinpa soldädunkunami tikrapar wanuratsirqan Bet-milucho. Tsayqa karqan Silaman aywaq nänichömi.
21 (22) Payta wanutsirqan Simeatpa tsurin Josacar y Somerpa tsurin Jozabadmi. Joás wanuykuptinmi *Davidpa Markancho unay aylunkuna pamparaykashqan kaqman pampapäkurqan. Paypa trukannami tsurin Amasana rey karqan.
Ichic wilacuycuna
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 12.4a Éxo. 30.11-16.
^ 12.4b Lev. 27.1-8.
^ 12.4c Lev. 22.18-23.
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
