2 Reyes 13:1-25
13 Ocozíaspa tsurin Joás ishkay chunka kimsa (23) wata Judá nacioncho rey kaykaptinmi Israel nacioncho Jehúpa tsurin Joacaz rey kayta qalaykurqan. Samariapitami Joacaz mandarqan chunka qanchis wata.
2 Joacazqa TAYTA DIOSTA mana cäsukurmi Nabatpa tsurin Jeroboamnöla Israel runakunata jutsata ruratsirqan.*
3 Joacaz tsayno ruraptinmi Tayta Dios pasaypa rabyashpan Siria nacionpa mandaqnin rey Hazaelta y tsurin Ben-adadta yanaparqan Israel nacionta atacar atska kuti vincipäkunanpaq.
4 Siria soldädukuna pasaypa nakatsiptinmi Joacazqa TAYTA DIOSTA manakurqan. Tsayno manakuptinmi Israel runakunata kuyapar TAYTA DIOS yanaparqan.
5 Tsaymi Siria nacionpa munaynincho karkaykashqanpita jorqunanpaq juk runata churarqan. Tsaypitanami Israel runakunaqa nawpata kawashqanno jawkana kawapäkurqan.
6 Tsayno salvaykaptinpis Jeroboampita miraq reykunanölami Israel runakunata jutsata ruratsirqan. Tsaymi Samaria markacho *Asera diösata imaypis adorapäkurqan.
7 Siria nacionpa mandaqnin reypa soldädunkuna wanutsishqanpitami rey Joacazpaqa walkalana soldädunkuna karqan. Tsaymi karqan pitsqa chunka (50) cawallun muntashqa soldädukuna, chunka guërra carrëtakuna y chunka waranqa (10,000) chakilapa aywaq soldädukuna.
8 Rey Joacaz imata rurashqankunapis lapanmi qelqaraykan Israel nacionpa mandaqnin reykunapa acta libruncho.
9 Joacaz wanuykuptinnami Samaria markaman pampapäkurqan. Paypa trukannami tsurin Joásna rey karqan.
Israel nacioncho Joás rey kashqan
10 Kimsa chunka qanchis (37) wata Judá nacioncho Joás rey kaykaptinmi Israel nacioncho Joacazpa tsurin Joás rey kayta qalaykurqan. Samariapita Joás mandarqan chunka soqta watami.
11 Joásqa TAYTA DIOSTA mana cäsukurmi Nabatpa tsurin Jeroboamnöla Israel runakunata jutsata ruratsirqan.*
12 Rey Joás imata rurashqankunapis y rey Amasíaswan pelyashqankunapis lapanmi qelqaraykan Israel nacionpa mandaqnin reykunapa acta libruncho.
13 Joás wanuykuptinnami Israel nacionpa mandaqnin rey pamparashqan Samaria markaman pampapäkurqan. Tsaypitanami tsurin Jeroboamna yaykurqan rey kananpaq.
Profëta Eliseo wanushqan
14 Pasaypa antsa qeshyar profëta Eliseo jitaraykaptinmi Israel nacionpa mandaqnin rey Joásqa watukuq aywarqan. Chayaykurmi makalakurkur waqashpan Eliseuta kayno nirqan: “¡Ay tayta! ¡Israel runakunapa guërra carrëtankunata y cawallunkunatami rikaykä!”*
15 Tsaymi Eliseo kayno nirqan: “Juk ishkay flëchakunata arcuntinta aptay”.
Tsayno niptinmi flëchakunata arcuntinta aptakurqan.
16 Tsaypitana Eliseo kayno nirqan: “Flëchanaykipaq arcuykita apuntay”.
Nishqanno apuntaraykaptinmi Eliseuqa reypa makin jananman makinta churaykur
17 kayno nirqan: “Inti jeqamunan kaq lädupa ventänata kichay”.
Ventänata kichaptinmi Eliseo kayno nirqan: “Kananqa flëchay”.
Tsayno niptinmi reyqa flëchaykurqan. Flëchaptinmi kayno nirqan: “Tsay flëchashqaykiqa señal kaykan Siria soldädukunapa munayninpita TAYTA DIOS salvashunaykipaq kashqanta musyanaykipaqmi. Tsaymi Afecman aywaykur Siria soldädukunata vincishpayki Israel runakunata salvamunkipaq”.
18 Mastapis Eliseo kayno nirqan: “Wakin kaq flëchakunata aptay”.
Flëchakunata aptarkuptinnami kayno nirqan: “Kananqa pampata takay”.
Tsawraqa pampata kimsa kuti takaykurqan.
19 Kimsa kutila takaykuptinmi profëta Eliseo pasaypa rabyakur reyta kayno nirqan: “Pitsqa kuti o soqta kuti pampata takarqa Siria soldädukunata lapantami ushakätsinkiman karqan. Kimsa kutila takashqaykipitami kimsa kutila Siria soldädukunata vincinkipaq”.
20 Tsaypitanami Eliseo wanuykuptin pampapäkurqan.
Cada watami Moab nacionpita asaltantikuna Israel nacionman shapäkamuq runakunata asaltapäkunanpaq.
21 Juk kutichömi Israel runakuna ayata pampaq aparkaykashqancho rikapäkurqan asaltantikuna aywarkaykämuqta. Rikaykurmi aparkaykashqan ayata Eliseupa sepultüranman jitariykur qeshpir aywakärirqan. Eliseupa tulunkunaman töparkurmi jinan höra tsay ayaqa kawarirkamur sharkurqan.
22 Joacaz rey kashqan witsanmi Siria nacionpa mandaqnin rey Hazael Israel runakunata pasaypa nakatsirqan.
23 Tsayno kaptinpis Abrahamwan, Isaacwan y Jacobwan *pactuta rurashqa karmi Israel runakunata TAYTA DIOS imaypis kuyaparqan. Tsaymi kananyaqpis paykunata mana elqätsishqatsu ni ushakätsishqatsu.
24 Siria nacionpa mandaqnin rey Hazael wanuykuptinnami tsurin Ben-adadna rey karqan.
25 Joásqa soldädunkunawan kimsa kutimi Ben-adadta vincipäkurqan. Tsaynöpami papänin Joacaz rey kaykaptin Hazael qechushqan markakunata Joás shuntarqan.
Ichic wilacuycuna
^ 13.2 1Rey. 12.28-33.
^ Asera Aseraqa cananeo runakuna adorashqan diösami karqan. Paykunaqa yarpapäkurqan tsay diösa imatapis miratsiq kashqantami. Aserata adorananpaqmi raku qerukunata jawipäkuq. Cananeo runakunaqa yarpapäkurqan tsay jawishqan qerukunacho Asera kashqantami (Éxo. 34.13; Deut. 7.5; 12.3; 16.21; 1Rey. 16.33; 18.19; 2Rey. 13.6).
^ 13.11 1Rey. 12.28-33.
^ 13.14 2Rey. 2.12.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
