2 Reyes 14:1-29
14 Joacazpa tsurin Joás ishkay wata Israel nacioncho rey kaykaptinmi Judá nacioncho Joáspa tsurin Amasías rey kayta qalaykurqan.
2 Mandayta qalaykushqan witsan ishkay chunka pitsqa (25) watayuqmi kaykarqan. Payqa ishkay chunka isqun (29) watami Jerusalénpita mandarqan. Mamanmi karqan Jerusalénpita Joadán.
3 Amasíasqa TAYTA DIOS munashqanno kawarpis manami unay aylun Davidnötsu kawarqan, sinöqa papänin Joásnölami.
4 Tsayno kawarmi markakunacho kaykaq *altarkunata mana juchutsirqantsu. Tsay altarkunachömi sacrificiukunata imaypis rupatsipäkurqan y inciensuwan qoshtatsipäkurqan.
5 Amasíasqa rey kaykarnami papäninta wanutsiq capitankunata wanutsirqan.
6 Itsanqa manami tsay capitankunapa tsurinkunataqa wanutsirqantsu. Tsayno mana wanutsinanpaqmi *Moisés qelqashqan leykunacho Tayta Diospa mandamientun kayno nir qelqaraykan: “Tsurinpa jutsanpita ama mamanta ni papäninta wanutsipäkunkitsu. Tsaynöpis mamanpa o papäninpa jutsanpita tsurinta ama wanutsipäkunkitsu. Tsaypa trukanqa jutsa ruraq kaqta wanutsipäkunki”.*
7 Kachi Pampacho pelyarmi Amasías wanutsirqan chunka waranqa (10,000) edomita runakunata. Sela markachöpis vincirkurmi tsay markapa jutinta trukatsirqan Jocteel jutin kananpaq. Tsaymi kananyaqpis tsay jutiwan reqipäkun.
8 Tsaypitana Amasíasqa kachakunata kacharqan Israel nacionpa mandaqnin rey Joás kaqman. Joás karqan Joacazpa tsurin y Jehúpa wilkanmi. Kachakuna chayaykurmi kayno nirqan: “Ali chölu karqa soldäduykikunata shuntarkurshi aywanki Amasíaspa soldädunkunawan pelyapäkunaykipaq”.
9 Tsayno niptinmi kacha aywaqkunata Joás kayno nirqan: “Kutiykur mandaqniki reyta kayno ninki: ‘Cardón kashashi kacharqan Líbanucho kaykaq cedru qeruta kayno ninanpaq: “Tsurïwan warmi tsurikita tätsishun”. Tsayno parlaykaptinshi munti uywa pasar cardón kashata pakiqpaq jarurirqan.
10 Tsay kashanölami qampis kaykanki. Edomita runakunata ushakätsishqalaykipitaqa ama runa tukuytsu. Runa tukur pelyaq shamunaykipa trukanqa wayilaykicho täkuy. Tsaynöla achäquita ashipämaptikiqa ushakätsishaykimi y Judá runakunatapis ushakätsishaqmi’ ”.
11 Rey Joás tsayno niptinpis Amasíasqa manami cäsurqantsu. Mana cäsuptinmi Joásqa Israel soldädunkunawan Judácho kaykaq Bet-semesman aywarqan Amasíaspa soldädunkunawan pelyananpaq.
12 Israel soldädukuna vinciptinmi Judá soldädukunaqa qeshpir wayinpa kutikärirqan.
13 Israel nacionpa mandaqnin rey Joásnami Judá nacionpa mandaqnin rey Amasíasta Bet-semescho prësu tsariykur Jerusalénman aparqan. Tsaychömi marka murällata juchutsipäkurqan Efraín punkupita qalaykur hasta Esquïna nishqan punkuyaq. Tsay juchutsishqan murällaqa karqan pachak pusaq chunka (180) metru largumi.
14 Tsayno juchurkatsirmi TAYTA DIOSPA wayincho kaqtapis palaciucho kaqtapis qellayta y qorita apakärirqan. Nirkurmi runakunata prësu aparkur Samariaman kutikurqan. Aparmi kayno nirqan: “Ayluykikuna pägamaptinraqmi kachashayki”.
15 Rey Joás imata rurashqankunapis y Judá nacionpa mandaqnin rey Amasíaswan pelyashqankunapis lapanmi qelqaraykan Israel nacionpa mandaqnin reykunapa acta libruncho.
16 Joás wanuykuptinnami Israel nacionpa mandaqnin reykuna pamparashqan Samaria markaman pampapäkurqan. Paypa trukannami tsurin Jeroboamna rey karqan.
17 Judá nacionpa mandaqnin rey Amasíasqa Israel nacionpa mandaqnin rey Joás wanushqanpita chunka pitsqa wata masraqmi kawarqan. Rey Amasíasqa karqan Joáspa tsurinmi.* Rey Joásnami karqan Joacazpa tsurin.
18 Rey Amasías imata rurashqankunapis lapanmi qelqaraykan Judá nacionpa mandaqnin reykunapa acta libruncho.
19 Jerusalén runakuna contran sharkuptinmi Amasíasqa Laquis markaman qeshpir aywakurqan. Tsayman qeshpiptinpis qatipaykurmi wanutsipäkurqan.
20 Ayantanami cawalluman cargakurkur Jerusalénman apapäkurqan. Tsaychömi *Davidpa Markanman unay aylunkuna pamparaykashqan kaqman pampapäkurqan.
21 Nirkurmi Judá runakuna juntakaykur Amasíaspa tsurin Azaríasta* churapäkurqan rey kananpaq. Tsay witsan Azarías kaykarqan chunka soqta watayuqmi.
22 Paymi taytan wanushqanchöna Elat markata* shuntarkur yapay sharkatsirqan. Tsaynöpami Judá nación runakunapaqna tsay marka karqan.
Israel nacioncho qepa kaq Jeroboam rey kashqan
23 Judá nacioncho kaq Joáspa tsurin Amasías chunka pitsqa wata rey kaykaptinmi Israel nacioncho kaq Joáspa tsurin Jeroboam rey kayta qalaykurqan. Paymi Samariapita Israel runakunata mandarqan chusku chunka juk (41) wata.
24 TAYTA DIOSTA mana cäsukurmi Jeroboampis Nabatpa tsurin Jeroboamnöla Israel runakunata jutsata ruratsirqan.*
25 Jeroboammi shuntarqan Israel nacionpa lindërunta Hamatpita hasta *Arabá Lamaryaq. Tsayno rurarqan Amitaipa tsurin profëta Jonás* TAYTA DIOSPA wilakuyninta wilakushqannölami. Jonásqa karqan Gat-hefer markapitami.
26 Tsayno shuntananpaq Jeroboamta TAYTA DIOS yanaparqan Israel nacioncho runakuna pasaypa nakar lakikushqanta rikarmi. Israel runakunata yanapananpaq manami ashmaypis ni libripis karqantsu.
27 Tsayno kaptinpis Israel runakuna ushakänanta mana munarmi Joáspa tsurin Jeroboamta TAYTA DIOS yanaparqan paykunata salvananpaq.
28 Rey Jeroboam imata rurashqankunapis, guërracho pelyar vincishqankuna y Damascuta y Hamatta shuntashqankunapis lapanmi qelqaraykan Israel nacionpa mandaqnin reykunapa acta libruncho.
29 Jeroboam wanuykuptinnami Israel nacionpa mandaqnin reykuna pamparashqanman pampapäkurqan. Paypa trukannami tsurin Zacaríasna rey karqan.
Ichic wilacuycuna
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ Moisés qelqashqan leykuna Moisés qelqashqan leykunaqa kaykan Sinaí jirkacho Tayta Dios tantiyatsishqan mandamientukuna y leykunami. Tsay leykunatami Moisés qelqarqan Éxodo, Levítico, Números y Deuteronomio librukunacho.
^ 14.6 Deut. 24.16.
^ 14.17 Amasíaspa taytan Joásqa manami Israel nacionpa mandaqnin rey Joástsu karqan, sinöqa Judá nacionpa mandaqnin rey Ocozíaspa tsurinmi.
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
^ 14.21 Azaríaspa jukaq jutinmi karqan Uzías.
^ 14.22 1Rey. 9.26.
^ 14.24 1Rey. 12.28-33.
^ Arabá Arabáqa jatun pampami kaykan. Galilea qocha sur kaq kuchunpitami qalaykun. Tsaypita sur kaq lädupami Jordán mayu kuchunkunapa Kachi Lamaryaq pasan. Kachi Lamarpitanami Puka Lamarcho kaq Golfo de Acabayaq chayan. Arabápa anchunmi chunka kilömetruno kaykan. Largunnami kimsa pachak ishkay chunka (320) kilömetruno kaykan. Arabápa ishkan lädupa jirkakuna kaptinmi tsaki kaykan. Norti kaq lädu chakrakunatami Jordán mayu yakuwan parqupäkun. Sur kaq lädu chakrakunatami itsanqa yaku mana kaptin mana parqupäkuntsu (Deut. 1.7; 2.8; 3.17; 4.49).
