2 Reyes 15:1-38
15 Ishkay chunka qanchis (27) wata Israel nacioncho Jeroboam rey kaykaptinmi Judá nacioncho Amasíaspa tsurin Azarías* rey kayta qalaykurqan.
2 Mandayta qalaykushqan witsan chunka soqta watayuqmi kaykarqan. Payqa pitsqa chunka ishkay (52) watami Jerusalénpita mandarqan. Mamanmi karqan Jerusalénpita Jecolías.
3 Azaríasqa papänin Amasíasnömi TAYTA DIOS munashqanno kawarqan.
4 Itsanqa markakunacho *altarkunata manami juchutsirqantsu. Tsay altarkunachömi sacrificiukunata imaypis rupatsipäkurqan y inciensuwan qoshtatsipäkurqan.
5 TAYTA DIOS castigaptinmi Azaríasqa *leprawan wanushqanyaq qeshyarqan. Tsayno qeshyarmi palaciupita juk läduchöna taptin tsurin Jotamna rey karqan.
6 Azarías imata rurashqankunapis lapanmi qelqaraykan Judá nacionpa mandaqnin reykunapa acta libruncho.
7 Azarías wanuykuptinnami* *Davidpa Markancho unay aylunkuna pamparaykashqanman pampapäkurqan. Paypa trukannami tsurin Jotamna rey karqan.
Israel nacioncho Zacarías rey kashqan
8 Azarías kimsa chunka pusaq (38) wata Judá nacioncho rey kaykaptinmi Israel nacioncho Jeroboampa tsurin Zacarías rey kayta qalaykurqan. Payqa Samariapita mandarqan soqta killalami.
9 Paypis TAYTA DIOSTA mana cäsukurmi Nabatpa tsurin Jeroboamno y wakin unay reykunanöla Israel runakunata jutsata ruratsirqan.*
10 Jabespa tsurin Salummi Ibleam markacho atacar Zacaríasta wanutsirqan. Nirkurmi Zacaríaspa trukan rey karqan.
11 Zacarías imata rurashqankunapis lapanmi qelqaraykan Israel nacionpa mandaqnin reykunapa acta libruncho.
12 Zacarías rey kaykaptinmi Jehúta TAYTA DIOS kayno nishqan cumplikarqan: “Israel nacionpa trönuncho qampita miraqkuna hasta chusku *generacionyaqmi rey kanqapaq”.* *
Israel nacioncho Salum rey kashqan
13 Kimsa chunka isqun (39) wata Judá nacioncho Uzías rey kaykaptinmi Israel nacioncho Jabespa tsurin Salum rey kayta qalaykurqan. Payqa juk killalami Samariapita mandarqan.
14 Juk killana rey kaykaptinmi Tirsa markapita Samaria markaman Gadipa tsurin Manahem chayaykur Salumta wanutsirqan. Nirkurnami Salumpa trukan rey karqan.
15 Salum imata rurashqankuna y Zacaríaspa contran sharkushqanpis lapanmi qelqaraykan Israel nacionpa mandaqnin reykunapa acta libruncho.
16 Manahemmi Tirsa markapita soldädunkunawan aywarqan Tifsa markata atacananpaq. Marka punkuta mana kichapaptinmi Tifsa markapita hasta Tirsa markayaq lapan runakunata wanutsipäkurqan. Tsaynölami pacha juntaraykaq warmikunatapis pachankunata qashar ushapäkurqan.
Israel nacioncho Manahem rey kashqan
17 Azarías kimsa chunka isqun (39) wata Judá nacioncho rey kaykaptinmi Israel nacioncho Gadipa tsurin Manahem rey kayta qalaykurqan. Payqa chunka watami Samariapita mandarqan.
18 Paypis TAYTA DIOSTA mana cäsukurmi rey kayta qalaykushqanpita wanunanyaq Nabatpa tsurin Jeroboamnöla Israel runakunata jutsata ruratsirqan.*
19 Manahem rey kashqan witsanmi Asiria nacionpa mandaqnin rey Pul* Israel nacionman soldädunkunawan atacananpaq chayarqan. Atacananta mana munarmi Manahem pägarqan kimsa chunka kimsa waranqa (33,000) kïlu qellayta. Tsaynöpis nirqan pelya kaptin payta yanapananpaqmi.
20 Tsayno pägananpaqmi Manahemqa Israel nacioncho taq lapan rïcu runakunapita mediu kïlu qellayta shuntatsirqan. Tsay qellayta Asiria nacionpa mandaqnin Pulta qoykuptinmi soldädunkunawan kutikurqan.
21 Manahem imata rurashqankunapis lapanmi qelqaraykan Israel nacionpa mandaqnin reykunapa acta libruncho.
22 Manahem wanuykuptinnami paypa trukan tsurin Pekaíana rey karqan.
Israel nacioncho Pekaía rey kashqan
23 Pitsqa chunka (50) wata Judá nacioncho Azarías rey kaykaptinmi Israel nacioncho Manahempa tsurin Pekaía rey kayta qalaykurqan. Payqa Samariapita mandarqan ishkay watami.
24 Paypis TAYTA DIOSTA mana cäsukurmi Nabatpa tsurin Jeroboamno Israel runakunata jutsata ruratsirqan.*
25 Pekaía rey kaykaptinmi soldädunkunapa capitannin karqan Remalíaspa tsurin Peka. Paymi pitsqa chunka (50) Galaad runakunawan Samariacho palaciuman yaykuykur Pekaíata wanutsirqan. Tsaynöpis tsaycho wanutsirqan Argobta y Arieta. Nirkurmi Pekaíapa trukan Pekana rey karqan.
26 Pekaía imata rurashqankunapis lapanmi qelqaraykan Israel nacionpa mandaqnin reykunapa acta libruncho.
Israel nacioncho Peka rey kashqan
27 Azarías pitsqa chunka ishkay (52) wata Judá nacioncho rey kaykaptinmi Israel nacioncho Remalíaspa tsurin Peka rey kayta qalaykurqan. Payqa ishkay chunka (20) watami Samariapita mandarqan.
28 Paypis TAYTA DIOSTA mana cäsukurmi Nabatpa tsurin Jeroboamno Israel runakunata jutsata ruratsirqan.*
29 Israel nacioncho Peka rey kaykaptinmi Asiria nacionpa mandaqnin Tiglat-pileser soldädunkunawan Israel nacionman chayarqan atacananpaq. Atacarmi vincirqan Ijón markacho taq runakunata, Abel-bet-maaca markacho taq runakunata, Janoa markacho taq runakunata, Cedes markacho taq runakunata, Hazor markacho taq runakunata, Galaad particho taq runakunata, Galilea particho taq runakunata y Neftalí particho taq runakunata. Nirkurmi tsaycho taq runakunata Asiriaman prësu apakärirqan.
30 Tsaypitanami Elapa tsurin Oseasqa Remalíaspa tsurin Pekapa contran sharkushpan wanutsirqan. Nirkurnami Pekapa trukan rey karqan. Tsayqa karqan Uzíaspa tsurin Jotam ishkay chunka (20) wata Judácho rey kaykaptinmi.
31 Peka imata rurashqankunapis lapanmi qelqaraykan Israel nacionpa mandaqnin reykunapa acta libruncho.
Judá nacioncho Jotam rey kashqan
2 Crónicas 27.1-9
32 Ishkay wata Israel nacioncho Remalíaspa tsurin Peka rey kaykaptinmi Judá nacioncho Uzíaspa tsurin Jotam rey kayta qalaykurqan.
33 Mandayta qalaykushqan witsan ishkay chunka pitsqa (25) watayuqmi kaykarqan. Payqa chunka soqta watami Jerusalénpita mandarqan. Mamanmi karqan Sadocpa tsurin Jerusa.
34 Jotamqa papänin Uzíasnömi TAYTA DIOS munashqanno kawarqan.
35 Paymi TAYTA DIOSPA templun jana waqtan murällapa punkunta tanatsirqan. Itsanqa markakunacho *altarkunata manami juchutsirqantsu. Tsay altarkunachömi runakuna sacrificiukunata imaypis rupatsipäkurqan y inciensuwan qoshtatsipäkurqan.
36 Jotam imata rurashqankunapis lapanmi qelqaraykan Judá nacionpa mandaqnin reykunapa acta libruncho.
37 Jotam rey kashqan witsanmi Siria nacionpa mandaqnin rey Rezínta y Remalíaspa tsurin Pekata TAYTA DIOS kacharqan Judá nacionta atacananpaq.
38 Jotam wanuykuptinmi *Davidpa Markancho unay aylunkuna pamparaykashqan kaqman pampapäkurqan. Paypa trukannami tsurin Acazna rey karqan.
Ichic wilacuycuna
^ 15.1 Azaríaspa jukaq jutinmi karqan Uzías.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ lepra Lepra qeshyaqa runapa qarancho tukuy casta qerikunami karqan. Israel nacioncho lepra qeshyawan qeshyaykaqkunaqa markapita juk läduchömi täkäriq (Lev. 13.45-46). Paykunataqa runakuna manami yataylapis yataqtsu (Lev. 22.5). Tsayno kaptinpis Jesucristo munayniyuq karmi leprawan qeshyaykaqkunata yataykur aliyätsirqan (Mar. 1.40-43).
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
^ 15.9 1Rey. 12.28-33.
^ generación Juk generacionqa kaykan runa yurishqanpita hasta tsurin yurishqanyaqmi. Tsurinkuna yuriptinnami juk generación qalaykun. Wilkankuna yuriptinnami juk generación qalaykun. Wilkankunapa tsurinkuna yuriptinnami juk generación qalaykun. Tsaynölami imayyaqpis kanqa (Éxo. 20.6; Deut. 5.10; 7.9; 1Crón. 16.15; Sal. 105.8; Mat. 1.17).
^ 15.12 Tsayno nishqan qelqaraykan 2Rey. 10.30 versïculuchömi. Tsayno nirmi Jehúta Tayta Dios nirqan Jehúpa tsurin Joacaz, Jehúpa wilkan Joás, Jehúpa wilkanpa tsurin Jeroboam y Jehúpa wilkanpa tsurinpa tsurin Zacarías rey kananpaq.
^ 15.12 2Rey. 10.30.
^ 15.18 1Rey. 12.28-33.
^ 15.19 Tsay reypa jukaq jutinmi karqan Tiglat-pileser. Tiglat-pileserpita masta musyanaykipaq liyinki 2Rey. 15.29; 16.7-10.
^ 15.24 1Rey. 12.28-33.
^ 15.28 1Rey. 12.28-33.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
