2 Reyes 20:1-21
20 Tsay witsanmi rey Ezequías qeshyawan antsakar wanunanpaqna kaykarqan. Tsaymi Amozpa tsurin profëta Isaías watukuq aywar kayno nirqan: “TAYTA DIOSMI kayno nin: ‘Qamqa mananami aliyankipaqnatsu. Lapan imaykaykitapis shumaq disponinaykipaq testamentuykita ruratsikuy’ ”.
2 Tsayno niptinmi Ezequías wayi perqa kaq lädupa tikrakushpan TAYTA DIOSTA manakurqan kayno nir:
3 “TAYTA DIOS, nishqaykita lapan shonqüwan cäsukur munashqaykino kawashqäta yarpaykulay”.
Tsayno nir lakikushpanmi fiyupa waqarqan.
4 Ezequíasta watukushqanpita palaciu patiunpita manaraq yarquptinmi Isaíasta TAYTA DIOS kayno nirqan:
5 “Kuyashqä runakunapa mandaqnin rey Ezequías kaqman kutiykur kayno wilay: ‘Unay ayluyki David sirvishqan TAYTA DIOSMI kayno nin: Mayashqämi waqar manakamashqaykita. Tsaymi qeshyashqaykipita aliyätsishayki. Kananpita kimsa junaqtami adoramänaykipaq templuman aywankipaq.
6 Tsaynöpis chunka pitsqa wata masraqmi kawankipaq. Kawashqaykiyaqqa qamta y Jerusalén markatapis Asiria nacionpa mandaqnin reypa makinpita salvashaykimi. Tsayno rurashaq salvashqäpita runakuna alabamänanpaq y sirvimaqnï Davidta promitishqäpitami’ ”.
7 Nirkurnami Isaíasqa hïgusta aqarkatsir rey Ezequíaspa qerinman emplastuwan wankuparqan. Tsaywanmi Ezequías aliyarqan.
8 Manaraq aliyarmi rey Ezequías Isaíasta tapurqan kayno nir: “¿Imanöpataq musyashaq TAYTA DIOS aliyätsimänanpaq kashqanta? Tsaynöpis ¿imanöpataq musyashaq kananpita kimsa junaqta TAYTA DIOSPA templunman aywanäpaq kashqanta?”
9 Tsayno tapuptinmi Isaías kayno nirqan: “TAYTA DIOS aliyätsishunaykipaq kashqanta musyanaykipaq juk milagrutami ruranqa. ¿Relojcho* lantuy chunka grädata pasanantaku munanki? ¿O chunka grädata qepaman kutinantaku munanki?”
10 Tsayno niptinmi Ezequías kayno nirqan: “Lantuyqa fäcilmi puntapa aywan. Itsanqa manami imaypis qepapa kutintsu. Tsayno kaptinpis relojcho chunka grädata qepapa kutitsun”.
11 Tsayno niptinmi profëta Isaías TAYTA DIOSTA manakuptin Acazpa relojnincho chunka gräda qepapa lantuyta TAYTA DIOS kutitsirqan.
Babiloniapita kacha aywaqkunata Ezequías chaskikushqan
2 Crónicas 32.27-31; Isaías 39.1-8
12 Tsay witsanmi Babilonia nacionpa mandaqnin rey Merodac-baladán musyarqan rey Ezequías pasaypa antsa qeshyaykashqanpita aliyashqanta. (Merodac-baladánqa Baladánpa tsurinmi karqan.) Tsaymi cartakunata y regäluta apatsirqan.
13 Kachakuna chayaptinmi Ezequías kushishqa chaskikurqan. Paykunatami rikatsirqan qellayninta, qorinta, chanin cuestaq perfüminta, olïvupita rurashqa aceitinta, armankunata y churakunan wayikunacho lapan imaykankunatapis. Palaciuncho kaqta y mandashqan nacioncho kaqtaqa lapantami rikatsirqan.
14 Tsaymi profëta Isaías rey Ezequíasman aywaykur kayno nirqan: “Tsay runakunaqa ¿maypitataq shamushqa? Y ¿imatataq nishushqanki?”
Tsayno tapuptin Ezequías kayno nirqan: “Paykunaqa shapäkamushqa Babilonia nacionpitami”.
15 Niptinmi Isaías yapay kayno tapurqan: “Palaciucho ¿imatataq rikapäkushqa?”
Tsawraqa Ezequías kayno nirqan: “Palaciucho kaqkunata y churakuna wayicho kaqkunatami lapanta rikatsishqä”.
16 Tsawraqa Ezequíasta Isaías kayno nirqan: “Kanan wilashayki TAYTA DIOS imata nishqantapis.
17 TAYTA DIOSMI kayno nin: ‘Tiempu chayamunqanami Babilonia nacionpita soldädukuna kay markata atacarkur palaciucho rikatsishqayki riquëzakunata apakärinanpaq. Unay ayluykikuna shuntashqanta y qam shuntashqaykitapis lapantami apakärinqa. Tsayno apakuptinmi kaychöqa wayralana tumaykanqa.*
18 Qampita miraqkunatapis wakintaqa Babilonia nacionmanmi apakärinqapaq. Tsayman chayaykatsirmi reypa ashmaynin kananpaq olqu kaqkunata capapäkunqa’ ”.*
19 Tsaymi rey Ezequíasqa Isaíasta kayno nirqan: “TAYTA DIOS nishqanta alimi wilamashqanki”.
Shonqulanchöna yarparmi kayno nirqan: “Tsawraqa kawashqäyaq imapis manami pasanqaraqtsu”.
Rey Ezequías wanushqan
2 Crónicas 32.32-33
20 Ezequías imata rurashqankuna y guërrata rurashqankuna lapanmi qelqaraykan Judá nacionpa mandaqnin reykunapa acta libruncho. Tsaynömi Jerusalénman yakuta chayatsinanpaq pözuta y tünilta ruratsishqanpis tsaycho qelqaraykan.
21 Ezequías wanuykuptinnami tsurin Manasésna rey karqan.
Ichic wilacuycuna
^ 20.9 Tsay witsanqa relojkuna manami kanan witsan relojkunanötsu karqan, sinöqa grädayuqmi karqan. Tsay grädakunata lantuy pasashqanta rikarmi runakuna musyarqan imay höra kashqantapis. Tsay relojkunaqa patiuchömi churararqan lapan rikananpaq.
^ 20.17 2Rey. 24.13; 2Crón. 36.10.
^ 20.18 2Rey. 24.14-15; Dan. 1.3-4.
