2 Reyes 21:1-26
21 Manasés chunka ishkay watayuq kaykarmi rey kayta qalaykurqan. Payqa pitsqa chunka pitsqa (55) watami Jerusalénpita mandarqan. Mamanpa jutinmi karqan Hepsiba.
2 Manasésqa TAYTA DIOSTA mana cäsukurmi unay runakunano jutsata rurar kawarqan.* Tsay runakunatami TAYTA DIOS qarqurqan paykunapa markankunacho Israel runakunana tänanpaq.
3 Tsaynölami Manasésqa papänin Ezequías talamatsishqan *altarkunata yapay sharkatsir mushuq altarkunatapis ruratsirqan *Baalta adorapäkunanpaq. Nirkurmi Israel nacionpa mandaqnin rey Acab rurashqanno raku qeruta jawitsirqan *Asera diösata adorapäkunanpaq. Intita, killata y qoylarkunatapis adorarqan.
4 Jerusaléncho imayyaqpis tänanpaq TAYTA DIOS nishqa kaykaptinpis juk dioskunata adorapäkunanpaqmi templuncho altarkunata ruratsirqan.
5 Intita, killata y qoylarkunata adorapäkunanpaqmi TAYTA DIOSPA templunpa ishkan patiuncho altarkunata ruratsirqan.
6 Juk diosta adorashpanmi tsurintapis altarcho Manasés rupatsirqan. Tsaynöpis rikakuq y brüjumi karqan. Payqa almakunawan parlaqkunatapis tapukurqanmi. Tsayno mana alikunata rurarmi TAYTA DIOSTA pasaypa rabyanätsirqan.
7 *Asera diösapaq raku qerutapis jawitsirqan TAYTA DIOSPA templun patiuman. Tsay templupaqmi Davidta y tsurin Salomónta Tayta Dios kayno nirqan: “Jerusalén templuchömi imayyaqpis täshaq. Israel nacioncho kaykaq lapan markakunapitami Jerusalén markata akrashqä täkunä templu tsaycho kananpaq.
8 Sirvimaqnï Moisés yachatsishqan leykunata cumpliptinqa Israel runakunata manami imaypis qarqushaqtsu unay aylunkunata entregashqä nacionpita”.
9 Tsayno niykaptinpis Judá runakunaqa manami cäsukurqantsu. Tsaypa trukanqa rey Manasés shakyätsiptin TAYTA DIOS ushakätsishqan nación runakunapita mas peormi jutsata rurapäkurqan.
10 Tsayno jutsata ruraptinmi sirviqnin profëtakunawan TAYTA DIOS wilakatsirqan kayno nir:
11 “Judá runakunapa mandaqnin rey Manasésqa TAYTA DIOS qarqushqan amorreo runakunapitapis mas peormi jutsata ruraykan. Ïdulukunata adoratsirmi Judá runakunata jutsata ruraykätsin”.
12 Tsaymi Israel runakunata kuyaq TAYTA DIOS kayno nin: “Jerusalén markata y Judá nacionta tukuy niraq desgraciawan castigaptïmi runakuna pasaypa mantsakaywan tulunkunapis siksikyanqaraq.
13 Samaria markacho taqkunata y Acab aylu kaqkunata ushakätsishqänömi Jerusaléncho taqkunatapis ushakätsishaqpaq. Qanra plätuta shumaq maylaykur ukparkuqnömi Jerusalén markatapis pitsaypa ushakätsishaq.
14 Kawaykar quëdaq runakunatapis manami tsapäshaqnatsu. Tsaymi contrankuna shamur imaykantapis qechur prësu apakunqapaq.
15 Tsayno rurashaq rabyanätsimar jutsata rurashqanpitami. Unay aylunkunata Egiptupita jorqamushqäpita patsami kananyaqpis paykunaqa jutsata rurar pasaypa rabyanaykätsiman”.
16 Manasésqa Judá runakunata jutsata ruratsishqan jananmanmi jutsaynaq runakunata wanutsirqan. Tsayno wanutsirmi intëru Jerusaléncho yawarta mashtarqan.
17 Manasés imata rurashqankuna y jutsata rurashqankunapis lapanmi qelqaraykan Judá nacionpa mandaqnin reykunapa acta libruncho.
18 Manasés wanuykuptinnami pampapäkurqan palaciucho kaykaq Uza nishqan huertaman. Tsaypitanami tsurin Amónna rey karqan.
Judá nacioncho Amón rey kashqan
2 Crónicas 33.21-25
19 Amón ishkay chunka ishkay (22) watayuq kaykarmi rey kayta qalaykurqan. Payqa ishkay watami Jerusalénpita mandarqan. Mamanmi karqan Jotba markapita Haruzpa tsurin Mesulemet.
20 Amónpis papänin Manasésnölami TAYTA DIOSTA mana cäsukur jutsata rurarqan.
21 Tsaymi papänin adorashqan ïdulukunata paypis adorarqan.
22 Tsaynölami unay aylunkuna yärakushqan TAYTA DIOSTA mana cäsukurqantsu.
23 Juk junaqmi kikinpa yanapaqninkunala contran sharkur jinan palaciulancho Amónta wanutsirqan.
24 Tsayta musyaykurmi wanutsiq runakunata marka runakuna wanutsirqan. Nirkurmi Amónpa tsurin Josíastana rey kananpaq churapäkurqan.
25 Rey Amón imata rurashqankunapis lapanmi qelqaraykan Judá nacionpa mandaqnin reykunapa acta libruncho.
26 Paytapis Uza nishqan huertamanmi pampapäkurqan. Amónpa trukannami tsurin Josíasna rey karqan.
Ichic wilacuycuna
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ Baal Baalqa cananeo runakuna adorashqan diosmi karqan. Juk dios kashqanta yarpaptinpis manami rasunpatsu dios karqan. Cananeo runakuna yarpapäkurqan tsay diosta adoraptin uywankuna mirananpaq kashqanta y chakrankuna ali wayunanpaq kashqantami. Tsaynöpis yarpapäkurqan löcu tamyata y ali tamyatapis kachamushqantami.
^ Asera Aseraqa cananeo runakuna adorashqan diösami karqan. Paykunaqa yarpapäkurqan tsay diösa imatapis miratsiq kashqantami. Aserata adorananpaqmi raku qerukunata jawipäkuq. Cananeo runakunaqa yarpapäkurqan tsay jawishqan qerukunacho Asera kashqantami (Éxo. 34.13; Deut. 7.5; 12.3; 16.21; 1Rey. 16.33; 18.19; 2Rey. 13.6).
^ Asera Aseraqa cananeo runakuna adorashqan diösami karqan. Paykunaqa yarpapäkurqan tsay diösa imatapis miratsiq kashqantami. Aserata adorananpaqmi raku qerukunata jawipäkuq. Cananeo runakunaqa yarpapäkurqan tsay jawishqan qerukunacho Asera kashqantami (Éxo. 34.13; Deut. 7.5; 12.3; 16.21; 1Rey. 16.33; 18.19; 2Rey. 13.6).
