2 Reyes 22:1-20
22 Josías* pusaq watayuq kaykarmi Judá nacioncho rey kayta qalaykurqan. Payqa kimsa chunka juk (31) watami Jerusalénpita mandarqan. Mamanpa jutinmi karqan Jedida. Payqa karqan Boscat markapita Adaíapa wawanmi.
2 Josíasqa unay aylun Davidnömi TAYTA DIOS munashqanno imaypis kawarqan.
Leykuna qelqarashqan libruta tarishqan
2 Crónicas 34.8-33
3 Chunka pusaq watana rey kaykarmi Azalíapa tsurin Safánta rey Josías templuman kacharqan. Safán karqan Josíaspa secretariun y Mesulampa wilkanmi. Templuman kacharmi Safánta Josías kayno nirqan:
4 “Templuman chayaykur mandaq cüra Hilcíasta kayno ninki: ‘TAYTA DIOSPA templun punkukunata täpaq runakuna shuntashqan qellayta shuntarkurshi
5 templuta shumaq altsatsinanpaq encargädu runakunata qoykunki.
6 Paykunana tsay qellayta pägatsun carpintërukunata y albañilkunata. Qeruta y laqlashqa rumitapis rantitsun.
7 Tsay encargädu runakunata ama cuentata manankitsu imacho qellayta gastashqantapis. Paykunaqa mana yatapakuq runakunami karkaykan’ ”.
Rey Josías nishqannölami Safánqa lapanta nirqan.
8 Tsaypita juk junaqmi secretariu Safánta mandaq cüra Hilcías kayno nirqan: “TAYTA DIOSPA templunchömi leyninkuna qelqaraykashqan libruta tarishqä”.
Tsayno wilarkurmi aptaparqan Safán liyinanpaq.
9 Liyirkurnami Safánqa rey kaqman aywaykur kayno nirqan: “Nimashqaykinömi qellayta shuntarkur encargädu runakunata qoykushqa templuta altsatsinanpaq”.
10 Nirkurmi kayno nir wilarqan: “Mandaq cüra Hilcíasmi templucho tariykur kay libruta apamushqa”.
Tsayno wilarkurmi tsay libruta liyiparqan.
11 Liyipaptinmi reyqa pasaypa mantsakashpan röpantapis rachirqan.
12 Nirkurmi cüra Hilcíasta, Safánpa tsurin Ahicamta, Micaíaspa tsurin Acborta, secretariun Safánta y yätsiqnin Asaíasta kayno nirqan:
13 “Kay librucho qelqaraykaq leykunata manami noqantsipis ni unay ayluntsikunapis cäsukushqantsitsu. Tsayno mana cumplishqantsipita TAYTA DIOSQA pasaypa rabyashqachari kaykan. TAYTA DIOSTA tapuykalämuy noqapaq, Israel nacioncho quëdaq runakunapaq y kay nacionnintsicho kaq runakunapaqpis”.
14 Tsayno kachaptinmi Hilcías, Ahicam, Acbor, Safán y Asaías aywarqan Salumpa warmin profetïsa Huldaman tapukuq. Huldapa runan Salum karqan Ticvapa tsurin y Harhaspa wilkanmi. Tsaynöpis Salum karqan templucho röpakunata täpaqmi. Huldaqa runanwan tarqan Jerusalén kuchun mushuq barriuchömi.
15 Tapukuptinmi Hulda kayno nirqan: “Israel runakunata kuyaq TAYTA DIOS kaynömi nin: ‘Kachamushuqniki runaman kutiykur kay nishqäkunata wilanki:
16 Liyipäshushqayki librucho nishqänölami kay markacho taqkunata y kay markatapis ushakätsishaq.
17 Paykunaqa mana cäsukamarmi juk dioskunapaq sacrificiukunata ruparkaykätsin. Tsaymi pasaypa rabyar mana kuyapaypa castigashaq’.
18 “TAYTA DIOSTA tapunäpaq kachamushuqniki reyman kutiykur kayno nir wilanki: ‘Tsay librucho qelqaraykaqta cäsukushqaykipitami Israel runakunata kuyaq TAYTA DIOS kayno nin:
19 Kay marka y kay markacho taqkuna asulashqa kananpaq kashqanta mayar lakikushqaykita y mantsakashqaykita rikashqämi. Tsaynöpis rikashqämi röpaykita rachir waqashqaykita.
20 Tsaymi kawashqaykiyaqqa kaycho taq runakunata mana castigashaqtsu. Wanuptiki unay ayluykikuna pamparashqanmanmi pampashunkipaq’ ”.
Profetïsa Hulda tsayno nishqantami kachashqan runakuna kutiykur reyta wilapäkurqan.
