2 Reyes 6:1-33
6 Juk kutimi profëta mayinkuna Eliseuta kayno nirqan: “Pasaypa kichkimi kaycho tarkaykantsi, tayta.
2 Jordán mayuman aywaykur qeruta muturir wayita rurapäkamushaq tsaycho tänantsipaq”.
Tsayno niptinmi Eliseo kayno nirqan: “Aywapäkuy”.
3 Tsaymi Eliseuta juk profëta kayno nirqan: “Kikikiwanpis aywaykuläshun, tayta”.
Tsawraqa Eliseo kayno nirqan: “Aku yanapanäpaq”.
4 Tsayno nir aywarmi Jordán mayuman chayaykärishpan qeruta mutupäkurqan.
5 Juk profëta qeruta mutuykaptinmi hächanqa makinpita loqtikar mayuman jeqakurqan. Tsaymi kayno nirqan: “¡Kananchi kananlaqa, tayta! ¡Manakuylami hächaqa kashqa!”
6 Tsaymi Eliseo kayno nirqan: “¿Mayninmantaq jeqashqa?”
Tsayno niptinmi rikatsirqan mayninman jeqashqantapis. Tsawraqa takshala qeruta muturir hächa jeqashqan kaqpa jitarpuptin hächa awnarkamurqan.
7 Awnarkamuptinmi Eliseo kayno nirqan: “Jukla aptay”.
Tsayno niptinmi aptarkur hächata jorqamurqan.
Siria nación soldädukunapa nawinta pantakätsishqan
8 Siria nacionpa mandaqnin reyqa Israel nacionwan guërrata rurarmi soldädunkunapa capitanninkunawan wilanakurqan maynin partichöpis campamentunta rurapäkunanpaq.
9 Tsayta musyaykurmi profëta Eliseuqa Israel nacionpa mandaqnin reyta wilakatsirqan kayno nir: “Siria soldädukunami tsayman shamurkaykan. Tsaypaqa ama pasapäkuytsu”.
10 Profëta Eliseo cadala tsayno wilaptinmi Israel nacionpa mandaqnin reyqa cercancho kaykaq markakunaman soldädunkunata kacharqan Siria soldädukuna mana yaykapäkunanpaq. Tsaynöpami atska kuti Israel runakuna salvakärirqan.
11 Tsayno pasaptinmi Siria nacionpa mandaqnin rey pasaypa rabyakushpan capitanninkunata qayaykur kayno nirqan: “¿Mayqaykitaq maypa atacanantsipaq wilanakushqantsitapis Israel nacionpa mandaqnin reyta wilapäkushqanki?”
12 Tsayno niptinmi juk capitán kayno nirqan: “Noqakunaqa manami pitapis wilapashqätsu, tayta. Israelcho kaykaq profëta Eliseumi cuartuykicho pakaylapa nishqaykitapis mandaqnin reyta wilapan”.
13 Tsayno niptinmi kayno nirqan: “Tsay runa maycho kashqantapis musyapäkamuy prësu tsaritsimunäpaq”.
Tsayno niptinmi wilapäkurqan Dotán markacho profëta Eliseo kaykashqanta.
14 Tsayno niptinmi tsaytsika soldädunkunata tsakaypa kacharqan bestiankunawan y carrëtankunawan Eliseuta prësu tsarimunanpaq. Eliseo tashqan Dotán markaman chayaykurmi tsay soldädukuna jiruruypa tsapapäkurqan.
15 Patsa wararkuptinmi Eliseupa ashmaynin waqtapa yarqushqancho rikarqan tsaytsika soldädukuna markata tumariq juntaparaykaqta. Tsay soldädukunaqa bestian muntashqa y carrëtan qarachashqa cawallunkunawanmi kaykarqan.
Tsayta rikaykurmi Eliseuta kayno nirqan: “¡Kaychi kaylaqa, tayta! ¡Imataraq kanan ruraykuläshun!”
16 Tsayno niptinmi Eliseo kayno nirqan: “Paykunata ama mantsakuytsu. Tayta Dios kachamushqan *angilkunaqa paykunapa soldädunkunapita mas tsaytsikami karkaykan”.
17 Tsayno nirkushpanmi Tayta Diosta Eliseo manakurqan kayno nir: “TAYTA DIOS, ashmaynïta yanapaykulay kachamushqayki angilkunata rikananpaq”.
Tsayno manakuptinmi Eliseupa ashmayninta TAYTA DIOS rikatsirqan tsaytsika angilkunata. Tsay angilkunami bestiankunawan y ninano atsikyaykaq carrëtankunawan Eliseuta tsapänanpaq jirkancho juntaraykarqan.
18 Siria soldädukuna prësu tsarinanpaq aywaptinnami TAYTA DIOSTA manakur Eliseo kayno nirqan: “Tayta Dios, kay soldädukunata qaprayaykatsilay”.
Tsayno manakuptinmi jinan höra Siria soldädukunata TAYTA DIOS qaprayätsirqan.
19 Tsaymi tsay soldädukunata Eliseo kayno nirqan: “Qamkunaqa lutan nänipami shamushqanki. Ashiykashqayki runaqa manami kay markachötsu kaykan. Pay kaqman pushashayki”.
Tsayno nirmi pusharqan Samaria markaman.
20 Samaria markaman chayaykatsirnami Tayta Diosta manakurqan kayno nir: “TAYTA DIOS, kay soldädukunapa nawinta kichaykulayna”.
Eliseo manakushqanno nawinta TAYTA DIOS kichaptinmi tsay soldädukuna tantiyarqan Samaria pläzachöna karkaykashqanta.
21 Pläzacho karkaykaqta rikaykurmi Israel nacionpa mandaqnin reyqa Eliseuta tapurqan kayno nir: “Kay soldädukunata ¿juklaku wanutsishaq, tayta?”
22 Tsayno niptinmi Eliseo kayno nirqan: “Ama wanutsiytsu. Manami imaypis guërracho tsarishqantsi prësukunata wanutsintsitsu. Wanutsinaykipa trukanqa mikuyta qaray y yakutapis kamaripay. Nirkurqa mandaqnin rey kaqman kutikärinanpaq despachay”.
23 Tsayno niptinmi ali alita yanukarkatsir qararqan. Mikuyta upuyta usharkuptinnami mandaqnin reyman kutikärinanpaq despacharqan. Tsaypitaqa Israel nacionta Siria nación runakuna manami atacarqannatsu.
Samariacho muchuy kashqan
24 Tsaypita juk ishkay wata pasarkuptinnami Siria nacionpa mandaqnin rey Ben-adadqa lapan soldädunkunawan juntakarkur Samaria markata atacananpaq aywapäkurqan. Chayaykurmi markapa intëru waqtankunapa tumariq tsaparparqan.
25 Tsaymi Samaria markacho pasaypa muchuy kaptin bürrupa umanta rantikurqan pusaq chunka (80) yoraq qellaycho. Tsaynöpis palumapa ismayninta juk pucilluwan tupurkur rantikurqan pitsqa yoraq qellaycho.
26 Juk junaqmi Israel nacionpa mandaqnin rey murälla jananpa puriykaqta rikaykur juk warmi qayakurqan kayno nir: “Yanapaykalämay, tayta”.
27 Tsayno qayakuptinmi rey kayno nirqan: “Manami trïgüpis ni vïnüpis kantsu kamaripänäpaq. TAYTA DIOS mana yanapashuptikiqa ¿imanöpataq noqa yanapäman?”
28 Nirkurmi kayno nirqan: “¿Imachötaq yanapäman?”
Tsayno niptinmi kayno nirqan: “Kay warmiwanmi wilanakurqä wawäkunata mikupäkunäpaq. Tsaymi nimarqan noqapa wawäta puntata mikupäkunäpaq nirkur paypa wawantana mikupäkunäpaq.
29 Tsayno nimaptinmi wawäta mikupäkushqä.* Tsaypita jukaqnin tuta paypa wawantana mikupäkunäpaq wilanakushqa kaykaptïmi payqa wawanta pakashqa”.
30 Warmi tsayno nishqanta mayarmi reyqa pasaypa lakikushpan röpanta rachirirqan. Murälla jananpa puriptinmi runakuna rikapäkurqan röpan rurincho qachqa röpan jatishqa kaykaqta.
31 Puriykashqanchömi qayararqan kayno nir: “¡Tayta Dios castigamätsun Safatpa tsurin Eliseupa umanta kanan junaq mana roqutsiptïqa!”
32 Tsayno nirmi Eliseuta wanutsinanpaq juk runata kacharqan.
Eliseuqa Israel mayor runakunawanmi wayincho jamaraykarqan. Rey kachashqan runa Eliseupa wayinman manaraq chayaptinmi Eliseo kayno nirqan: “Mandamaqnintsi rey wanutsikuq runa karmi wanutsimänanpaq runata kachaykämun. Rikaq rikaqla karkaykay. Tsay runa shamuykaqta rikar punkuta shumaq trancanki. Paypa qepantanami patronninpis aywaykämun”.
33 Tsayno parlaykaptinmi rey kachashqan runa Eliseupa wayinman chayarqan. Chayaykurmi kayno nirqan: “Kayjinanpa desgracia pasamänantsipaq TAYTA DIOSMI kacharimashqantsi. Tsayno kaykaptinqa ¿imapaqnataq payman yärakushunpis?”
Ichic wilacuycuna
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 6.29 Deut. 28.57.
