2 Reyes 8:1-29
8 Juk kutichömi kawaritsishqan wamrapa* mamanta Eliseo kayno nirqan: “Qanchis wata pasaypa muchuy kananpaqmi TAYTA DIOS nimashqa. Tsayno kananpaq kaykaptinqa kay markapita juk lädu markapa ayluykikunawan aywakuy”.
2 Profëta Eliseo tsayno niptinmi warmiqa lapan aylunkunawan aywakurqan filisteo runakunapa nacionninman. Tsay nacionchömi qanchis wata tarqan.
3 Qanchis wata pasarkuptinnami markanman warmi kutirqan. Chayaykurmi wayinta y chakrankunata shuntakunanpaq rey kaqman ruwakuq aywarqan.
4 Tsay warmi chayananpaqqa Eliseupa ashmaynin Gieziwanmi rey parlaykarqan. Tsaychömi Giezita tapupaykarqan Eliseo milagru rurashqanta wilananpaq.
5 Tsaycho warmipa wawanta Eliseo imano kawaritsimushqantapis wilapaykaptinmi tsay warmi wawan pushashqa chayarqan reyta ruwakunanpaq.
Tsay warmita y wawanta rikarmi Giezi kayno nirqan: “¡Paypitami wilapaykarqä, tayta! ¡Eliseo kawaritsimushqan wamrapis paymi kaykan!”
6 Tsaymi tsay warmita rey tapurqan wawanta imano kawaritsimushqantapis. Wilaparkuptinmi juk yanapaqninta rey nirqan tsay warmipa wayinta y chakrankunata shuntäshinanpaq. Tsaynöpis nirqan aywakur kacharishqanpita patsa chakranta murushqanpita pägatsinanpaq.
Siria nacionpa mandaqnin rey kananpaq Hazael yaykushqan
7 Tsaypitanami Eliseuqa Damasco markaman aywarqan. Tsaychömi Siria nacionpa mandaqnin rey Ben-adad pasaypa antsa qeshyaykarqan. Tsayman Eliseo chayashqanta wilaptinmi
8 yanapaqnin Hazaelta rey Ben-adad kayno nirqan: “Imalatapis qaranaykipaq* apakurkur ayway profëta kaqman. Chayaykurnami kayno ninki: ‘TAYTA DIOSTASHI tapuykulanki rey aliyänanpaq o mana aliyänanpaq kashqantapis’ ”.
9 Tsayno niptinmi Hazaelqa chusku chunka (40) *camëllukunawan qarananpaq kaqkunata cargakurkur profëta kaqman aywarqan. Chayaykurmi kayno nirqan: “Siria nacionpa mandaqnin rey Ben-adadmi taytantano respitashunki. Paymi kachamashqa qeshyaykashqanpita aliyänanpaq o mana aliyänanpaq kashqantapis wilamänaykipaq”.
10 Tsayno niptinmi Eliseo kayno nirqan: “Kanan aywaykur reyta wilay qeshyaykashqanpita aliyänanpaq kashqanta. Itsanqa TAYTA DIOS nimashqa tsay qeshyaykashqanpita aliyarpis wanunanpaqna kashqantami”.
11 Tsayno nirkushpanmi profëta Eliseuqa Hazael pasaypa penqakushqanyaq rikararqan. Rikapaykashqanchömi Eliseuqa waqayta qalaykurqan.
12 Tsayno waqaptinmi Hazael kayno nir tapurqan: “¿Imanirtaq waqaykanki, tayta?”
Tsayno tapuptinmi Eliseo kayno nirqan: “Qammi wara warantin Israel nacioncho murallashqa markakunata rupatsinkipaq, mözukunata espädaykiwan wanutsinkipaq, wamrakunata saqtaypa wanutsir ushankipaq y chichu warmikunapa pachantapis qashaypa qasharmi ushankipaq. Israel runakunapa contran sharkur tsayno ruranaykipaq kashqanta musyarmi waqaykä”.
13 Tsayno niptinmi Hazael kayno nirqan: “Mana väliq alqu kaykarqa ¿imanöpataq tsaykunata rurayküman, tayta?”
Tsayno niptinmi Eliseo kayno nirqan: “TAYTA DIOSMI musyatsimashqa Siria nacionpa mandaqnin rey kanaykipaq kashqanta”.*
14 Tsaypitanami Hazaelqa Eliseupita despidikurir rey kaqman kutirqan. Chayaykuptinmi rey tapurqan kayno nir: “¿Imatataq Eliseo nishushqanki?”
Tsayno tapuptinmi Hazael kayno nirqan: “Aliyänaykipaq kashqantami nimashqa, tayta”.
15 Tsaypita jukaqnin junaqnami Hazaelqa juk fresädata ushmarkatsir reypa umanta tsaparkuptin jämaytsaypa wanurqan. Wanurkatsirnami Hazaelna Siria nacionpa mandaqnin rey karqan.
Judá nacioncho Joram rey kashqan
2 Crónicas 21.1-20
16 Acabpa tsurin Joram pitsqa watana Israel nacioncho rey kaykaptinmi Judá nacioncho Josafatpa tsurin Joram rey kayta qalaykurqan.
17 Mandayta qalaykushqan witsan kimsa chunka ishkay (32) watayuqmi kaykarqan. Payqa pusaq watami Jerusalénpita mandarqan.
18 Rey Acabpa tsurinwan tarmi Acabpa aylunkunanöla y Israel nacionpa mandaqnin reykunanöla TAYTA DIOSTA mana cäsukur jutsata rurarqan.
19 Tsayno kaptinpis sirviqnin Davidpita miraq runa Judácho imaypis rey kananpaq *pactuta rurashqa karmi Judá nacionta TAYTA DIOS mana ushakätsirqantsu.*
20 Judá nacioncho Joram rey kaykänan witsanmi Edom nación runakuna Judá nacionpa munaynincho kaykashqanpita yarqukärirqan.* Nirkurmi kikinkunapa mandaqnin reyta churapäkurqan.
21 Tsaymi Joramqa guërra carrëtankunawan Edomcho kaq Zair markaman aywarqan atacananpaq. Tsawraqa edomita soldädukuna pelyananpaq yarqurmi rey Joramta y carrëtakunawan aywaq capitankunata tumariq tsapapäkurqan. Tsayno tsapaptinmi Israel soldädukunaqa imaykanöpapis tsakaypa qeshpir wayinkunapa aywakärirqan.
22 Tsaypita patsami Edom nación runakunaqa kananyaqpis Judá nacionpa munayninchönatsu kaykan. Tsay witsanmi Libna marka runakunapis Judá nacionpa munayninpita yarqukurqan.
23 Joram imata rurashqankunapis lapanmi qelqaraykan Judá nacionpa mandaqnin reykunapa acta libruncho.
24 Joram wanuykuptinmi *Davidpa Markanman unay aylunkuna pamparaykashqan kaqman pampapäkurqan. Tsaynami tsurin Ocozías yaykurqan rey kananpaq.
Judá nacioncho Ocozías rey kashqan
2 Crónicas 22.1-6
25 Acabpa tsurin Joram chunka ishkay wata Israel nacioncho mandaq kaykaptinmi Judá nacionpa mandaqnin rey Jorampa tsurin Ocozías rey kayta qalaykurqan.
26 Mandayta qalaykushqan witsan Ocozíasqa kaykarqan ishkay chunka ishkay (22) watayuqmi. Payqa juk watami Jerusalénpita mandarqan. Mamanmi karqan Atalía. Atalíaqa karqan Israel nacionpa mandaqnin rey Omripa wilkanmi.
27 Ocozíaspis Omripa tsurin Acab ayluwan tarmi TAYTA DIOSTA mana cäsukur Acab y Acabpa aylunkuna jutsata rurashqanno jutsata rurarqan.
28 Ocozíasqa Israel nacionpa mandaqnin rey Joramwanmi wilanakurqan Siria nacionpa mandaqnin rey Hazaelta atacananpaq. Rey Joramqa Acabpa tsurinmi karqan. Atacananpaq awniptinmi Galaadcho kaykaq Ramot markaman soldädunkunawan aywapäkurqan. Tsaycho pelyar Siria soldädukuna rey Joramta flëchaykuptinmi
29 Jezreel markaman jampikunanpaq kutirqan. Tsaycho qeshyar jitaraptinmi rey Ocozíasqa watukuq aywarqan.
Ichic wilacuycuna
^ 8.1 2Rey. 4.8-37.
^ 8.8 Wakin runakunaqa regalanaykipaq nipäkun.
^ camëllu Camëlluqa jatunkaray uywami kaykan. Camëllukunataqa ashmapäkun maypapis aywar cargakunanpaq y muntakunanpaqmi. Tsaynöpis camëllupa milwanta putskarkurmi awapäkuq. Camëllupa milwanpitami Bautizaq Juanpa röpanpis karqan (Mat. 3.4; Mar. 10.25).
^ 8.13 1Rey. 19.15.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 8.19 2Sam. 7.11b-16; 1Rey. 11.36.
^ 8.20 Gén. 27.40.
^ Davidpa Markan Davidpa Markanqa manami David yurishqan Belén markatsu karqan, sinöqa Sión jirkancho kaykaq Jerusalén markami. Tsayno jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta sharkatsipäkurqan. Jerusalén marka jatunyaptinpis Sión jirkancho kaykaq partilatami Davidpa Markan kashqanta nipäkun.
