2 Samuel 1:1-27
1 Saúl wanushqan witsan* amalecita runakunata vinciykurmi Davidqa Siclagman kutishpan* ishkay junaq tsaycho qoyarqan.
2 Tsaypita jukaqnin junaqnami Saúlpa soldädunkunapita juk soldädu chayarqan. Paymi guërracho Israel runakuna wanushqanpita pasaypa lakikur röpankunata rachir umanmanpis uchpata winakurqan. Davidpa nawpanman chayaykurmi qonqurpakuykurqan urkunpis pampaman töpashqanyaq.
3 Tsawraqa David tapurqan kayno nir: “¿Maypitataq shamushqanki?”
Tapuptinmi mözu kayno nirqan: “Israel runakunata pelyacho yanapaykashqäpitami qeshpimushqä, tayta”.
4 Niptin David kayno nirqan: “Mä wilapämay ima pasashqantapis”.
Tsawraqa soldädu kayno nirqan: “Guërracho pelyaykashqanpitami Israel soldädukuna qeshpir aywakärishqa. Tsaynöpis atska soldädukunatami tsaycho wanutsipäkushqa. Tsaychömi Saúlta y tsurin Jonatántapis wanutsipäkushqa”.
5 Tsawraqa David kayno nirqan: “¿Imanöpataq Saúl y tsurin Jonatán wanushqanta musyanki?”
6 Niptin soldädu kayno nirqan: “Gilboa jirkachömi Israel runakunata pelyacho yanapaykarqä. Tsaychömi rikashqä Saúl lanzanwan tuknakushqa kaykaqta. Filisteo soldädukunanami carrëtankunawan cawallunkunawan Saúlta tarinanpaqna kaykarqan.
7 Tsaymi Saúl rikaykamar qayamaptin pay kaqman aywarqä.
8 Tsaychönami pï kashqätapis tapumaptin wilarqä amalecita runa kashqäta.
9 Tsaymi kayno nimarqan: ‘Wanuytami nakaykä. Jukla pasarpatsimay’.
10 Tsayno nimaptinmi wanunaykashqanta tantiyar jukla pasarpatsirqä. Nirkurnami jatirashqan corönanta y rikrancho jatirashqan adornuta qampaq apamushqä”.*
11 Tsayta mayaykur Davidpis y yanapaqnin runakunapis lakikushpan röpanta rachipäkurqan.
12 Tsaynölami pasaypa waqapäkushpan tsay junaq imatapis mana mikupäkurqantsu. Tsayno waqapäkurqan Saúl y tsurin Jonatán wanushqanpita y Israel runakunata filisteo runakuna vincishqanpitami.
13 Nirkurnami tsay wilapaq mözuta David kayno tapurqan: “¿May runataq kaykanki?”
Tsawraqa mözu kayno nirqan: “Amalecita jäpa runami kaykä, tayta”.
14 Tsaymi David nirqan: “¿Imanirtaq mana mantsakuypa TAYTA DIOS churashqan rey Saúlta wanutsishqanki?”
15 Tsayno nirmi juk yanapaqnin runata qayaykur kayno nirqan: “¡Kay runata jukla wanutsiy!”
Tsayno niptinmi jukla wanutsirqan.
16 Manaraq wanutsirmi tsay mözuta David kayno nirqan: “TAYTA DIOS churashqan reyta wanutsishqaykipita kikikimi jutsayuq kaykanki wanunaykipaq”.
Saúl y Jonatán wanushqanpita David lakikur cantashqan
17 Tsaypitana Saúl y tsurin Jonatán wanushqanpita David lakikushpan qelqarqan juk cantata.
18 Nirkurnami Judá runakuna yachakunanpaq mandarqan. Tsay cantaqa qelqaraykan Jaser libruchömi.*
19 “¡Wawalaw Israel! ¡Jirkachömi tsurinkunawan mandaqniki ushakashqa!¡Tsayjina ali chölu kaykarmi wanupäkushqa!
20 Wanushqantaqa Gat markacho ama wilakutsuntsu.*Ascalón markapa cällinkunachöpis ama parlakutsuntsu.Tsayta musyaykurqa filisteo warmikuna kushikunqachari.Diosman mana yärakuq runakunapis fiestatachari ruranqa.
21 “Gilboa jirkakuna, qamkunaman tamyapis ni shulyapis ama chayatsunnatsu.Qamkunacho ofrendapaq mikuykunapis ama wayutsunnatsu.Qamkunachömi ali pelyaqkunapa escüdunta jarur ushapäkushqa.Tsaymi Saúlpa escüdun aceitiwan mana chipchipyannatsu.
22 Jonatánpa flëchanqa yawartaraqmi mashtaramuq.Saúlpa espädanqa wiswiypa wiswirraqmi kutiq.Ali pelyaq kaptinpis contran runakunata imaypis wanutsiqmi.
23 “Saúlta y Jonatántaqa runakuna kuyarqanmi.Kawar mana kachanakushqannömi wanushqanyaqpis kachanakushqatsu.Ankakunapitapis masmi paykunaqa cörriq karqan.Leonkunapitapis mas kalpasapami kapäkurqan.
24 “Israel warmikuna, Saúl wanushqanpita waqapäkuy.Kananqa ¿piraq jatipäshunki lïnupita awashqa puka tëlata?¿Piraq jatipäshunki qoriwan bordashqa röpata?
25 “¡Ali chölukunami guërracho wanupäkushqa!¡Jonatánpis jirkachömi wanushqa!
26 ¡Pasaypami qampaq lakikü, wawqi Jonatán!¡Alimi qam kuyamarqayki!Runanta y wawankunata warmi kuyashqanpitapis masraqmi noqata kuyamarqayki.
27 “¡Ali chölukunami guërracho wanupäkushqa!¡Armankunapis lapanmi ushakashqa!”
Ichic wilacuycuna
^ 1.6-10 1Sam. 31.3-5; 1Crón. 10.3-5.
^ 1.18 Jaser libruqa manami Bibliatsu kaykan, sinöqa juk librumi. Tsay libruqa unaynami oqrakashqa (Jos. 10.13).
