2 Samuel 10:1-19
10 Tsaypitanami amonita runakunapa mandaqnin rey wanuykuptin tsurin Hanún papäninpa trukan rey karqan.
2 Tsawraqa David kayno nirqan: “Nahaswan kuyanakushqänömi tsurin Hanúnwanpis kuyanakushaq”.
Tsayno nirmi Hanún kaqman propiukunata kacharqan taytan wanushqanpita shakyätsinanpaq.
Kachashqan propiukuna chayaptinmi
3 soldädunkunapa capitanninkuna Hanúnta kayno nipäkurqan: “¿Criyinkiku taytayki wanushqanpita shakyätsishunaykipaq runakunata David kachamushqanta? ¿Manatsuraq niq tumpala shamushqa markantsita rikapakunanpaq y soldädunkunawan kutimurna ushakätsimäshunpaq?”
4 Tsayno nipäkuptinmi Hanúnqa David kachashqan runakunata prësu tsariykatsir jukaq qaqlanpita shapranta ruturqan. Nirkurmi siki patan lädupa tünicanta rutuparir qarqurirqan.
5 Tsayno ruraptinmi tsay runakuna pasaypa penqaytukushqa kutikärirqan. Hanún tsayno rurashqanta mayaykurmi tsay runakunaman propiuta David kacharqan kayno nipäkunanpaq: “Jericó markalachöshi täkärinki shaprayki winananyaq. Nirkurraqshi kutipäkamunki”.
6 Davidta rabyanätsishqanta tantiyarmi amonita runakuna Siria nacionman aywaykur Bet-rehob y Soba markakunacho taq ishkay chunka waranqa (20,000) soldädukunata minkakärirqan yanapananpaq. Tsaynöpis Maaca runakunapa mandaqnin reywan conträtuta rurapäkurqan juk waranqa (1,000) soldädukunawan yanapananpaq. Tsaynölami Is-tob partiman aywaykur chunka ishkay waranqa (12,000) soldädukunata minkakärirqan yanapananpaq.
7 Tsayta musyaykurmi lapan alinnin kaq soldädunkunata y capitannin Joabta David kacharqan pelyaq aywapäkunanpaq.
8 Tsaymi amonita soldädukuna kamarikurkur marka punkuman churanakurqan Israel runakunawan pelyapäkunanpaq. Siriapita, Is-tobpita y Maacapita aywaq soldädunkunanami pampaman churanakurqan Israel runakunawan pelyapäkunanpaq.
9 Tsaymi nawpanpa y qepanpa atacananpaq kashqanta musyashpan alinnin kaq soldädunkunata Joab akrarqan Siria soldädukunawan pelyaq aywananpaq.
10 Wakin soldädukunatanami wawqin Abisaitawan kacharqan amonita soldädukunawan pelyapäkunanpaq.
11 Tsaymi Abisaita kayno nirqan: “Siria soldädukuna vinciykämaqta rikarqa shapäkamunki yanapamänaykipaq. Tsaynölami amonita soldädukuna vinciykäshushqaykita rikarqa noqapis shamushaq soldädükunawan yanapanäpaq.
12 ¡Mana mantsakuypa pelyashun! ¡TAYTA DIOSNINTSI qomashqantsi nacionnintsi rayku y markantsi rayku pelyashun! ¡TAYTA DIOS munashqanno kaykulätsun!”
13 Tsaymi pelyananpaq soldädunkunawan Joab aywaptin Siria soldädukuna qeshpir aywakärirqan.
14 Siria soldädukuna qeshpishqanta rikaykurmi amonita soldädukunapis Abisaipita qeshpir markaman yaykapäkurqan. Tsayno qeshpikäriptinmi Jerusalénpana soldädunkunawan Joab kutikurqan.
15 Israel runakuna tsayno vinciptinmi Siria runakuna yapay juntakarqan paykunawan pelyananpaq.
16 Éufrates mayu tsimpancho taq Siria runakunatapis rey Hadad-ezer minkakuptinmi Helam markaman chayapäkurqan yanapananpaq. Lapan soldädukunapa mandaqninmi Hadad-ezerpa capitannin Sobac karqan.
17 Pelyananpaq juntakashqanta wilaykuptinmi Davidqa lapan Israel soldädukunata pushakurkur aywapäkurqan Jordán mayuta tsimparir Helam markayaq. Tsayman chayapäkuptinmi Siria soldädukuna atacayta qalaykurqan.
18 Davidpa soldädunkuna vinciptinmi pelyaykashqanpita Siria soldädukuna qeshpir aywakärirqan. Tsaychömi Davidwan kaykaq soldädukuna wanutsipäkurqan qanchis pachak (700) carrëtawan puriq soldädukunata y chusku chunka waranqa (40,000) cawallun muntashqa soldädukunata. Tsaynölami Siria soldädukunapa capitannin Sobactapis wanutsipäkurqan.
19 Tsayno vinciptinmi Hadad-ezerta yanapaq reykuna rindikushpan Davidpa munayninchöna kawapäkurqan. Tsaypita patsa Siria soldädukuna mananami amonita soldädukunata yanaparqannatsu.
