2 Samuel 11:1-27
11 Cada watami tamya tiempu pasarkuptin reykuna pelyananpaq aywapäkuq. Tsay witsanmi capitannin Joabta David kacharqan soldädukunata pushakurkur amonita runakunawan pelyapäkunanpaq. Chayaykurmi amonita runakunapa chakrankunacho mikuykunata y markankunata ushakätsirqan. Tsaynölami Rabá markacho taq runakunata jiruruypa tsapapäkurqan. Davidnami Jerusalénlacho quëdakurqan.*
2 Juk tardimi punushqanpita David sharkurkur aywarqan palaciun jananman. Tsaycho puriykashqanchömi rikarqan kuyaylapaq warmi armakuykaqta.
3 Tsayta rikaykurmi David kacharqan juk ashmayninta pï kashqantapis musyamunanpaq. Kutiykurmi wilarqan heteo aylu Uríaspa warmin Betsabé kashqanta. Betsabéqa Eliampa tsurinmi karqan.
4 Payqa killa qeshyanwan qeshyashqanpitami purificakur armakuykarqan. Betsabé kashqanta wilaptinmi palaciunman pushaykatsimur paywan David punurqan. Nirkurnami Betsabéqa wayinpa kutikurqan.
5 Chichu rikakushqanta tantiyarmi jukla Davidta musyatsirqan.
6 Tsayta musyaykurmi ashmayninta kacharqan capitán Joabman kayno ninanpaq: “Heteo aylu Uríasta jukla kachaykalämuy”.
Tsayno niptinmi Joabqa David kaqman Uríasta jukla kacharqan.
7 Urías chayaykuptinmi David tapurqan Joab y soldädunkuna imano kashqanta y guërra imano kashqantapis.
8 Nirkurnami Uríasta kayno nirqan: “Kananqa wayikipa aywar chakikita maylakurishpayki jamapay”.
Palaciupita yarqurkuptinnami alinnin kaq mikuyta David apatsirqan.
9 Wayinman aywananpa trukan Uríasqa palaciu punkulachömi punurqan täpaq soldädukunawan juntu.
10 Wayinpa mana aywashqanta mayaykurmi Uríasta qayaykur David kayno nirqan: “Tsayraq karupita chayaykämurqa ¿imanirtaq wayikipa mana aywashqankitsu?”
11 Tsayno niptinmi Urías kayno nirqan: “Israelpa y Judápa soldädunkuna guërraman aywar toldukunalachömi punurkaykan. Capitán Joab y capitán mayinkunapis tsaynölami punurkaykan. Paykuna kaqchömi Tayta Diospa babulninpis kaykan. ¿Tsayno kaykaptintsuraq wayïman aywäman mikunäpaq, upunäpaq, warmïwan pununäpaq? ¡Tsaytaqa manami imaypis rurashaqtsu, tayta!”
12 Tsawraqa David kayno nirqan: “Tsayno kaptinqa kanan junaq kaylacho qoyäkuy. Waranami kutinkipaq”.
Tsayno niptinmi Urías Jerusaléncho qoyarqan.
13 Tsay junaqmi Uríasta David mikatsirqan y upyatsirqan shinkananyaq. Shinkashqa kaykarpis Urías wayinpa aywananpa trukanqa palaciuta täpaq soldädukuna punushqan kaqlachömi yapay punurqan.
14 Tsaypita jukaqnin tutanami Davidqa juk cartata qelqarkur Joabman Uríaswan apatsirqan.
15 Tsay cartachömi kayno nirqan: “Guërracho pelyashpayki Uríasta puntaman churanki. Nirkur tsaycho kikilanta kachariykur witikärinki wanutsinanpaq”.
16 Cartacho David tsayno niptinmi Joabqa Rabá markata atacashpan mas geniuyuq soldädukunawan pelyananpaq Uríasta churarqan.
17 Atacaptinmi Rabá soldädukunaqa markapita yarqurir Joabpa soldädunkunawan pelyapäkurqan. Tsay pelyachömi Davidpa juk ishkay capitanninkunata wanutsir heteo aylu Uríastapis wanutsipäkurqan.
18 Tsaypitanami Joabqa Davidman wilakatsirqan guërracho ima pasashqantapis.
19 Wilakuqta kacharmi kayno nirqan: “Guërracho ima pasamashqantsitapis wilaptiki
20 capazmi rey David rabyar kayno nishunkipaq: ‘¡Imanirtaq aläpa yaykapäkurqayki marka murälla chakinyaq! ¿Manaku tantiyapäkurqayki jananpita flëchamunanpaq kashqanta?’
21 Tsaynöpis capazmi David yarpätsishunki Tebes markacho ima pasashqantapis. Tsaychömi murälla jananpita tunaywan warmi saqmamur Jerobaalpa tsurin Abimelecta wanutsirqan.* David tsayno olqüpäshuptiki kayno ninki: ‘Heteo aylu Uríaspis wanushqami, tayta’ ”.
22 Tsayno yätsirkuptinmi tsay kachashqan runa David kaqman aywaykur wilarqan Joab nishqannöla.
23 Wilarmi kayno nirqan: “Noqakunawan pelyananpaq yarqamuq soldädukuna puntataqa vincirkaykämarqanmi. Jina kaqtami tikrapar paykunata vincipäkuptï markaman qeshpikärirqan.
24 Marka punkucho pelyapäkuptïmi murällapita flëchakunawan flëchapäkamushqancho wakin soldäduykikunata wanutsipäkushqa. Tsaychömi Uríastapis wanutsishqa”.
25 Tsayno niptin David kayno nirqan: “Tsaypita Joab ama lakikutsuntsu. Guërrachöqa mana yarpashqatami pitapis wanutsipäkun. Tsayno kaptinpis payta shakyätsinki tsay runakunata ushakätsishqanyaq atacananpaq”.
26 Uríaspa warminqa runan wanushqanta musyaykur lakikushpan lüturqan.
27 Lütuykashqanta cumplirkuptinnami Betsabéta warminpaq palaciunman David pushatsirqan. Tsaychönami killan aypämuptin wachakurqan. David tsayno rurashqanpitami TAYTA DIOS fiyupa rabyakurqan.
