2 Samuel 12:1-31
12 Tsaypitami Davidman TAYTA DIOS kacharqan profëta Natánta.* Chayaykurmi kayno nirqan: “Juk markachömi karqan rïcu runa y waktsa runa.
2 Rïcu runapami karqan atska wäkankuna y uyshankuna.
3 Waktsa runapanami karqan juklayla rantishqan washki uyshan. Tsay uyshantami ashmarqan wamrankunatawan juntu. Tsaynöpis mikushqan mikuytami qaraq y yakutapis pucillulanpitami uputsiq. Melqaynilanchömi punutsiqpis. Tsay waktsa runaqa warmi tsurintanömi uyshanta pasaypa kuyarqan.
4 Juk kutichömi tsay rïcu runaman qorpa chayarqan. Chayaptinmi mikuyta qarananpaq kikinpa uyshanta o wäkanta pishtananpa trukanqa tsay waktsa runapa juklayla washki uyshanta pishtarqan. Nirkurmi qorpanta qararqan”.
5 Natán tsayno wilaptinmi David fiyupa rabyakur kayno nirqan: “TAYTA DIOSPA jutinchömi kayno nï: ¡Tsayno rurashqanpita tsay runata jukla wanutsitsun!
6 Tsaynöpis waktsa runata mana kuyapaypa qechushqanpita chusku uyshata uyshanpa trukan kutitsitsun”.
7 Tsayno niptinmi Natán kayno nirqan: “¡Tsay runaqa kikikimi kaykanki! TAYTA DIOSMI kayno nin: ‘Israel nacionpa mandaqnin rey kanaykipaq noqami qamta akrashqä. Tsaynöpis Saúl wanutsishunaykipaq kaykaptin noqami qamta salvashqä.
8 Nirkurnami Saúlpa palaciuntapis y warminkunatapis qamta kamaripashqä. Paypa trukan Israel runakunapa y Judá runakunapa mandaqnin rey kanaykipaqmi qamta churashqä. Tsaykuna pishïshuptikiqa mastapis kamaripämanmi karqan.
9 Tsayno yanapaykaptïqa ¿imanirtaq mandamientükunata mana cäsukur lutanta rurashqanki? ¿Imanirtaq warminta qechunayki kashqa Uríasta wanutsishqanki? Manami amonita runakunatsu wanutsishqa, sinöqa qammi wanutsishqanki.
10 Uríaspa warminta warmikipaq qechushpaykimi manakaqman churamashqanki. Tsaymi kananpitaqa ayluykikuna chikinakur imaypis wanutsinakular kawapäkunqapaq’.*
11 “Mastapis TAYTA DIOS kaynömi nin: ‘Kikikipa ayluykipitami contrayki sharkur lapan runa rikaykaptin warmikikunawan pununqapaq.*
12 Qamqa pakaylapami Betsabéwan punur jutsata rurashqanki. Contrayki sharkuq runaqa lapan Israel runakuna rikaykaptinmi warmikikunawan kakunqapaq’ ”.
13 Tsaymi David kayno nirqan: “TAYTA DIOSTA rabyanätsirmi jutsata ruraykushqä, tayta”.
Tsawraqa Natán kayno nirqan: “Jutsa rurashqaykipita TAYTA DIOS perdonashushqankimi. Tsaymi juklaqa mana wanunkipaqtsu.
14 Itsanqa TAYTA DIOSTA mana cäsukur rabyanätsishqaykipitami tsayraq yurishqa tsuriki wanunqapaq”.
15 Tsayno olqüparkurmi Natánqa wayinpa kutikurqan. Uríaspa warmincho yuriq wamrantanami TAYTA DIOS pasaypa qeshyatsirqan.
16 Tsurin qeshyaptinmi David ayunashpan Tayta Diosta manakur pampalacho punurqan.
17 Tsayno ruraptinmi palaciuncho taq mayor runakuna Davidta ruwarqan pampacho jitaraykashqanpita sharkur mikunanpaq. Ruwaptinpis manami sharkurqantsu ni paykunawan mikuytapis munarqantsu.
18 Tsaypita qanchis junaqta wamra wanuptinmi yanapaqninkuna wilayta mantsakushpan kikinpura parlapäkurqan kayno nir: “Kawaykaptinpis mikuyta mana munaykarqa ¿imanöraq kanqa tsurin wanushqanta wilaptintsi?”
19 Kikinpura shapshapyaylapa parlaykashqanta rikarmi David tantiyarqan tsurin wanushqanta. Tsawraqa tapurqan kayno nir: “¿Rasunpaku tsurï wanushqa?”
Niptinmi kayno nipäkurqan: “Pasarpushqanami, tayta”.
20 Tsawraqa pampacho jitaraykashqanpita David sharkushpan armakurir y perfümita winakurir röpanta trukakurqan. Nirkur TAYTA DIOSPA wayinman aywarqan adorananpaq. Wayinman kutiykurnami mikuyta manakurir mikurqan.
21 Tsawraqa yanapaqninkuna kayno nipäkurqan: “Tayta, ¿imanirtaq tsuriki manaraq wanuptin waqar mana mikurqaykitsu y kanan wanurkuptinnaqa jawkalana mikuykanki?”
22 Tsawraqa David kayno nirqan: “Tsurï kawaykaptin ayunar waqarqä kayno nishpämi: ‘Capazchari TAYTA DIOS kuyapämar tsurïta aliyaykatsinmanpis’.
23 Wanushqana kaykaptinqa ¿imapaqnataq ayunashaqpis? Ayunaptïpis tsurï manami kawarimunqatsu. Tsaypa trukanqa noqami wanur pay kaykashqan kaqman aywakushaq. Payqa manami imaypis kay patsaman kutimunqanatsu”.
Salomón yurishqan
24 Wawan wanushqanpita waqaptinmi Betsabéta David shoqarqan. Tsaypitanami yapay Davidwan punushpan qeshyaq rikakur wacharqan olqu wamrata. Tsay wamrapa jutintami David churaparqan Salomón jutin kananpaq. Paytami TAYTA DIOS pasaypa kuyarqan.
25 Tsayno kuyarmi profëta Natánta TAYTA DIOS kacharqan Jedidías jutitapis churapänanpaq.*
Amonita runakunata David vincishqan
1 Crónicas 20.1-3
26 Joabnami soldädunkunawan aywar Rabá marka runakunawan pelyarkaykarqan. Tsay runakunaqa amonita runakunami karqan. Reypa palaciun kaykashqan partiman yaykapäkunanpaqna kaykarmi
27 Davidman wilakatsirqan kayno nir: “Rabá marka runakunata atacar markaman yaykuq yaku kaqchönami karkaykä.
28 Kananqa wakin kaq soldäduykikunawan kikikina shamuy vincirir markaman yaykunaykipaq. Mana shamuptikiqa markaman yaykuptï Israel runakuna qamta alabashunaykipa trukanqa noqatanami alabapäkamanqa”.
29 Tsayno niptinmi soldädunkunata pushakurkur David aywarqan Rabá markaman. Tsaycho taq runakunata vincirkurmi markaman yaykushpan
30 reypa corönanta qechurqan. Tsay corönaqa kimsa arröba qoripita rurashqa y kuyaylapaq rumikunawan adornashqami karqan. Tsay corönatami Davidta jatiparqan. Tsaynölami Rabá markapita imaykatapis alinnin kaqtaqa apakärirqan.
31 Markacho mana wanutsishqan runakunatami wakinta churarqan qeruta partinanpaq, wakintana churarqan chakracho arunanpaq y wakintana churarqan ladrilluta rurananpaq. Tsaynölami wakin markakunacho taq amonita runakunatapis tsay aruykunaman churarqan. Nirkurnami soldädunkunawan Jerusalénman David kutirqan.
Ichic wilacuycuna
^ 12.10 2Sam. 13.28-29; 18.14; 1Rey. 2.25.
^ 12.11 2Sam. 16.22.
^ 12.25 Jedidías ninanqa Tayta Dios kuyashqan ninanmi. Tsaynöpami tsay wamrapa jutin karqan Salomón y Jedidías.
