2 Samuel 14:1-33
14 Tsurin Absalónpaq David fiyupa lakikurpis kutitsimuyta mana munashqantami Sarviapa wawan Joab tantiyarqan.
2 Tsaymi Davidta awnitsinanpaq Tecoa markapita astüta warmita qayaykatsimur kayno nirqan: “Perfümita mana winakuylapa lütu röpata jatikunki. Tsaynöpis wanupakushqanpita atska junaq lakikuykaqno purinki.
3 Nirkurna rey kaqman aywaykushpayki yachatsishqänöla lapanta ninki”.
Tsayno nirmi tsay warmita yachatsirqan imata ninanpaqpis.
4 Tsawraqa rey kaqman chayaykurmi urkunpis pampaman töpashqanyaq qonqurpakuykur tsay warmi kayno nirqan: “Yanapaykalämay, tayta”.
5 Tsawraqa David kayno nirqan: “¿Imataq pasashushqanki?”
Tsayno niptin warmi nirqan: “Viüda warmimi kä, tayta.
6 Tsaynölami ishkan olqu wawäkuna chakracho pelyashpan pipis mana washaptin juknin kaq wanuykatsishqa wawqinta.
7 Tsaymi kananqa lapan aylükuna conträ sharkushpan kayno nipäkaman: ‘Wawqin wanutsiq wawaykita wanutsinäpaq kayman pushamuy’. Nishqannöla wanutsir imarqa wawaynaqtachari kachaykamanqa. Tsayno kaptinqa runäpa apellïdunpis elqanqachari”.
8 Tsayno niptinmi David kayno nirqan: “Wayikipa kutikuy. Kananpitaqa noqanami favorniki sharkushaq”.
9 Tsawraqa Tecoa warmi kayno nirqan: “Tayta rey, yanapamashqaykipita pipis jamurpäshuptikiqa noqami y taytäpa aylunkunami jutsayuq kapäkushaq. Qam y mandäshiqnikikunami itsanqa jutsaynaq kapäkunki”.
10 Tsayno niptin rey David kayno nirqan: “Pipis achäquita ashipäshuptikiqa kayman pushamunki arreglanäpaq. Tsaymi manana achäquita pipis ashipäshunkipaqnatsu”.
11 Tsawraqa tsay warmi kayno nirqan: “TAYTA DIOSPA jutincho promitimay wawäta mana wanutsinanpaq”.
Tsayno niptinmi David kayno nirqan: “Wawaykita pipis mana yatananpaq TAYTA DIOSPA jutinchömi promitï”.
12 Tsawraqa warmi kayno nirqan: “Ama rabyakuykulaytsu, tayta. Mastapis ruwakuläshayki”.
Tsayno niptin David nirqan: “¿Imataq mas kaykan nimänaykipaq?”
13 Tsayno niptinmi warmi kayno nirqan: “Juk nacioncho kaykashqanpita tsurikita mana kutitsimurqa aylükuna conträ sharkushqannömi qampis Israel runakunapa contran sharkuykanki. Yanapamänaykipaq nimarpis tsurikita mana kutitsimurqa kikilaykimi condenakuykanki, tayta.
14 Pampaman yaku jichakar ushakashqannömi noqantsipis ushakaqla kaykantsi. Tsayno kaptinpis Tayta Dios manami munantsu pipis paypita karucho wanunanta, sinöqa runata imanöpapis tantiyatsin kawashqanyaq payman kutinanpaq.*
15 “Wawäta wanutsipäkunanpaq parlaptin pasaypa mantsarishpä qamman shamushqä kayno nir: ‘Ruwakuptïqa capazchari yanapaykamanmanpis’.
16 Yarpashqanno wawäta wanutsirqa Tayta Diospita chaskipäkushqä posisionpitapis qarqamanqachari. Tsayno mana kananpaqmi ruwakuq shamushqä, tayta.
17 Tayta Diospa *angilninnömi qamqa tantiyanki alitapis mana alitapis. Tsaymi yärakü favornï sharkunaykipaq, tayta. TAYTA DIOS yanapaykuläshunki”.
18 Tsayno niptinmi rey David kayno nirqan: “Tapuptï rasun kaqlata wilamay”.
Tsawraqa warmi kayno nirqan: “¿Imaraq tapumänaykipaq kaykan, tayta?”
19 Tsawraqa tapurqan kayno nir: “Tsaykunata nimänaykipaq ¿manaku Joab yätsishushqanki?”
Niptin warmi kayno nirqan: “Aw, yarpashqaykinömi kaykan, tayta. Yanapashuqniki Joabmi lapan nishqäkunata yätsimashqa.
20 Joab tsayno yätsimashqa lapanpis arreglakänanta munarmi. Qamqa Tayta Diospa angilninnömi kay nacioncho imapis pasaykashqanta musyanki”.
21 Tsaypita Joabta qayaykatsir rey David kayno nirqan: “Yarpashqaykino kaykulätsun. Kananqa tsurï Absalónta jukla kutitsimuy”.
22 Tsayno niptinmi urkunpis pampaman töpashqanyaq Davidpa nawpanman Joab qonqurpakuykurqan. Bendicionninta David churaptinmi Joab kayno nirqan: “Tayta rey, manakushqäta awnimaptikimi musyä kuyamashqaykita”.
23 Tsaypitanami Gesur nacionman Joab aywaykur Jerusalénman Absalónta kutitsimurqan.
24 Chayaptinmi rey David kayno nirqan: “Absalónqa wayinman aywakutsun. Paytaqa manami rikaytapis munätsu”.
Tsayno niptinmi Absalónqa reyman mana chayaylapa wayinpa aywakurqan.
Davidwan Absalón amistashqan
25 Israel nacioncho manami pipis Absalónno kuyaylapaq runa karqantsu. Chaki puntanpita uma pukshunyaq kuyaylapaq kaptinmi lapan runakuna kuyapäkuq.
26 Aqtsanta cada wata rututsikur palaciucho pësakunawan pësaptinmi ishkay kïlupita maslan karqan.
27 Absalónpa tsurinkuna karqan kimsa olqu y juk warmi. Warmi tsurinmi karqan pasaypa kuyaylapaq. Paypa jutinmi karqan Tamar.
28 Absalónqa Jerusaléncho ishkay watami tarqan papänin Davidwan mana tinkuylapa.
29 Tsaymi Joabta Absalón qayatsirqan kayno yarpachakur: “Joabta ruwakushaq papänïman aywar favornï parlamunanpaq”.
Tsayno qayatsiptinpis Joab manami aywarqantsu. Tsaymi yapaypis Joabta Absalón qayatsirqan. Yapay qayatsiptinpis Joabqa manami aywarqantsu.
30 Tsawraqa ashmayninkunata Absalón kayno nirqan: “Chakrä nawpancho Joabpa cebädan poquraykaqta kanaykäramuy”.
Nishqannölami ashmayninkuna aywaykur Joabpa cebädanta kanaykurqan.
31 Tsaymi Joabqa Absalónpa wayinman jukla aywaykur kayno nirqan: “¿Imanirtaq ashmaynikikunata kachashqanki cebädäta kanananpaq?”
32 Tsawraqa Absalón kayno nirqan: “Papänïwan parlaq aywanaykipaq qayatsimuptïpis mana shamuptikimi kanatsishqä. Kanan aywar kayno niy: ‘¿Imapaqshi tsurikita Gesur nacionpita kutitsimushqanki? Mana tinkunaykipaq kaykaptinqa jinan Gesurlachöshi täkunman karqan. Kaychöna karshi qamwan tinkuyta munaykan. Imatapis jutsata rurashqa kaptinqa juklashi wanutsinki’ ”.
33 Tsayno niptinmi rey David kaqman aywarkur Absalón nishqannöla Joab nirqan. Tsawraqa Absalónta David qayatsirqan. Chayaykurmi Absalónqa Davidpa nawpanman qonqurpakuykurqan urkunpis pampaman töpashqanyaq. Chaskikurmi Absalónta rey David mutsarqan.
Ichic wilacuycuna
^ 14.14 Tayta Diospita karucho wanushqa ninanqa Diosta mana chaskikuypa wanushqa ninanmi. Tayta Diosman kutinanpaq ninanqa jutsankunata kacharir Tayta Diosta chaskikunanpaq ninanmi. Tsayno parlarmi tsay warmi tumatsipaylapa Davidta tantiyatsirqan tsurinta kutitsimunanpaq.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
