2 Samuel 16:1-23
16 Tsaypita aywar Olivos jirkanta David tumarkuptinmi Mefi-bosetpa ashmaynin Siba* tariparqan ishkay silla bürrunkuna qatishqa. Tsay bürrukunaman cargakurkurmi Davidpaq aparqan ishkay pachak (200) tantakunata, päsaslan atipay pachak (100) tantakunata, pachak (100) frütakunata y vïnu puritsikuna qarawan vïnuta.
2 Paywan tinkurmi rey David kayno tapurqan: “¿Imapaqtaq kaykunata apamushqanki?”
Tsawraqa Siba kayno nirqan: “Bürrukunata qatimushqä qam y qamwan aywaykaq ayluykikuna muntakunaykipaqmi, tayta. Tantakunata frütakunata apamushqä soldäduykikuna mikunanpaqmi. Vïnutanami apamushqä chunyaq jirkapa aywar utikaqkuna upupäkunanpaq”.
3 Tsawraqa David kayno tapurqan: “¿Maytaq patronnikipa wilkan Mefi-bosetqa?”
Tsayno niptin Siba kayno nirqan: “Jerusalénchömi kaykan. Payqa niykan awkilun Saúlta rey kananpaq Israel runakuna churapäkushqanno paytapis kanan junaq churapäkunanpaq kashqantami. Tsayta yarparmi Jerusaléncho quëdakamushqa”.
4 Tsayno niptin David kayno nirqan: “Tsayno kaptinqa qampana katsun Mefi-bosetpa lapan imaykankunapis”.
Niptinnami Davidpa nawpanman qonqurpakuykushpan Siba kayno nirqan: “Tayta rey, qampa makiki chakikichömi kaykälä”.
Davidta Simei qayapashqan
5 Tsaypitanami Bahurim markaman David chayaptin Saúl aylu runa Gerapa tsurin Simei yarqurqan Davidpa contran rimashpan.
6 Alinnin kaq soldädunkunapa chawpincho rey David aywaykaptinmi Simeiqa paykunata saqmar
7 kayno nir qayaparqan: “¡Runa mayinta wanutsiq! ¡Imatataq kaycho ashinki, fiyu runa kaykarqa! Qamtaqa rikaytapis manami munapäkütsu. ¡Kaypita aywakuy!
8 ¡Qammi rey kanaykipaq Saúlta y aylunkunata wanutsishqanki! ¡Tsaypitami TAYTA DIOS castigashushpayki tsuriki Absalóntana rey kananpaq churashqa! ¡Tsaykuna pasashunaykipaq kikikimi jutsayuq kaykanki, mana penqakuypa runa mayinta wanutsiq!”
9 Tsayno niptinmi Sarviapa wawan Abisai rey Davidta kayno nirqan: “Tayta, ¿imanirtaq taqay mana väliq alqu tsayjinanpa qayapaykäshunki? ¡Noqata kachapaykamay kanan höra tsimparir umanta roqumunäpaq!”
10 Niptinnami Abisaita y Joabta rey David kayno nirqan: “Sarviapa wawankuna, ¿imanirtaq qamkuna rayan wishlaykita jatiykämunki? Kikin TAYTA DIOS munaptinchari tsayno qayapaykäman. Tsayno kaykaptinqa ¿imapaqtaq michäshun?”
11 Nirkurnami Abisaita y lapan yanapaqninkunata kayno nirqan: “Kikïpa tsurïpis wanutsimayta yarpaykaptinqa rasuntanachari kay Benjamín trïbu runaqa qayapaykäman. TAYTA DIOS munaptinqa jina tsaynöpis qayapämätsun.
12 Capazchari lakikushqäta rikar TAYTA DIOS kuyapämashpan runakuna qayapämashqanpita bendicionninta qomanqa”.
13 Tsayno nishpanmi yanapaqninkunawan David aywakurqan. Simeinami wak tsimpanpa aywarqan ashliraykar, saqmaraykar y alpatapis altupa matsiraykar.
14 Jordán mayu kuchunman chayaykurmi utikashpan Davidqa yanapaqninkunawan jamaparqan.
Jerusalénman Absalón chayashqan
15 Absalónnami lapan Israel runakunawan y Ahitofelwanpis Jerusalénman chayapäkurqan.
16 Tsaymi Davidpa amïgun Husai jukla aywarqan chaskikunanpaq. Tinkurmi kayno nirqan: “¡Viva rey Absalón! ¡Viva rey Absalón!”
17 Tsayno niptinmi Absalón kayno nirqan: “Kananqa ¿amïguyki Davidpa contrannaku kaykanki? ¿Tsaynöku ali amïgu kay? ¿Imanirtaq paywanqa mana aywashqankitsu?”
18 Niptinnami Husai kayno nirqan: “TAYTA DIOS y Israel runakuna akrashqan kaq reytami noqa yanapashaq, tayta.
19 Pitapis yanaparqa amïgüpa tsurintami yanapashaq. Taytaykita yanapashqänömi qamtapis yanapashayki”.
20 Tsaypitanami Ahitofelta Absalón tapurqan kayno nir: “Kanan ¿imata ruranäpaqtaq yätsimanki?”
21 Tsayno niptin Ahitofel kayno nirqan: “Palaciuta täpananpaq taytayki churashqan *concubïna warminkunawan punuy. Tsaynöpami lapan Israel runakuna tantiyapäkunqa taytayki pasaypa rabyakur imaypis manana chaskishunaykipaq kashqanta. Tsayta tantiyarqa yanapashuqnikikuna masraqmi favorniki sharkunqa”.
22 Tsayno niptinmi lapan Israel runakuna rikananpaq palaciu janancho juk tolduta Absalónpaq rurapäkurqan. Tsaychömi taytan Davidpa concubïna warminkunawan Absalón punurqan.*
23 Tsay witsanqa lapan runakuna yarpapäkurqan Ahitofel imatapis yätsishqanqa kikin Tayta Dios yätsiykaqno kashqantami. Tsaymi Ahitofel yätsishqanta David rurashqanno Absalónpis Ahitofel yätsishqanta rurarqan.
Ichic wilacuycuna
^ 16.1 2Sam. 9.9-10.
^ concubïna Concubïnaqa manami runapa legïtimu warmintsu karqan. Concubïnanwanqa manami pakaylapatsu purikurqan, sinöqa warminwannömi tarqan (Jue. 8.31; 19.1-4; 2Sam. 5.13; 15.16; 16.21-22; 20.3; Est. 2.9).
^ 16.22 2Sam. 12.11-12.
