2 Samuel 18:1-33
18 Tsaypitanami soldädunkunata shuntarkur capitankunata David churarqan cada waranqa (1,000) soldädukunapaq y cada pachak (100) soldädukunapaq.
2 Nirkurmi lapan soldädukunata kimsa puntaman rakirqan. Joabta churarqan juk batallonpa mandaqnin kananpaq. Joabpa wawqin y Sarviapa wawan Abisaitanami churarqan juk batallonpa mandaqnin kananpaq. Itaitanami churarqan juk batallonpa mandaqnin kananpaq. Nirkurmi soldädunkunata kayno nirqan: “Guërracho yanapanäpaqmi noqapis aywashaq”.
3 Tsawraqa paykuna kayno nipäkurqan: “Qamqa ama aywaytsu, tayta. Manami noqakunatatsu wanutsimänanpaq ashirkaykäman, sinöqa qamtami. Qeshpipäkuptïpis o pulannïta wanutsimashpanpis qamtami imanöpapis wanutsishunaykipaq ashirkaykäshunki. Chunka waranqa (10,000) soldädukunata wanutsirpis qamta mana wanutsishushpaykiqa manami contentakärinqatsu. Aywanaykipa trukanqa kay markalacho quëdakuy vincipäkamaptin imaptinqa mas soldädukunata kachamunaykipaq”.
4 Tsayno nipäkuptinmi rey David kayno nirqan: “Alimi kaykan qamkuna nishqayki”.
Tsayno nishpan marka yaykuna jatun punku nawpanman ichikurqan. Tsaycho ichiraykaptinmi waranqanpa waranqanpa (1,000) y pachakninpa pachakninpa (100) soldädukuna yarqupäkurqan.
5 Yarquykaptinmi Joabta, Abisaita y Itaita rey David kayno nirqan: “Noqa rayku tsurï Absalónta kuyapaykulanki”.
Tsayno nishqantami lapan soldädunkuna mayapäkurqan.
6 Tsawraqa Davidpa soldädunkuna aywapäkurqan Israel soldädukunawan pelyapäkunanpaq. Tsay guërra karqan Efraín munti kaqchömi.
7 Tsaycho pelyarmi Israel soldädukunata Davidpa soldädunkuna vincipäkurqan. Tsay junaqmi ishkay chunka waranqa (20,000) runakunata wanutsipäkurqan.
8 Tsay munti rurincho pelyarmi kuchu kuchu qatikachänakurqan. Espädawan runakunata soldädukuna wanutsishqanpitapis mas atska runakunami munticho ushakarqan.
9 Absalónqa mulan muntashqa aywaykashqanchömi elaqpita tinkurqan Davidpa soldädunkunawan. Tsaymi mulan muntashqa qeshpir encina yöra rurinpa pasaykaptin aqtsapita rämakuna tsarikuykurqan. Tsawraqa mulan aywakuptin Absalónqa warkakashqa quëdarqan.
10 Tsayno warkaraykaqta rikarmi juk soldädu aywaykur Joabta kayno nir wilarqan: “Absalónmi encina yöracho warkaraykan”.
11 Niptinmi Joab kayno nirqan: “Rikaykarqa ¿imanirtaq jinalancho mana wanutsishqankitsu? Wanutsiptikiqa chunka siclo qellayta* y juk cinturontami pägäman karqan”.
12 Niptinmi tsay runa kayno nirqan: “Reypa tsurin kaykaptinqa waranqa (1,000) siclo qellayta pägamaptikipis manami wanutsïmantsu. Absalónta kuyapänaykipaqmi qamta, Abisaita y Itaitapis rey David nishushqanki. Tsaytaqa lapanïmi mayapäkushqä.
13 Imata rurashqantsitapis rey David musyanqami. Absalónta wanutsiptïqa kikïtapis wanutsimanmanchari. Wanutsimaptinqa manami qampis tsapämankipaqtsu”.
14 Niptinnami Joab kayno nirqan: “Tiemputa perdirmi qamwan parlaykä”.
Tsayno nirmi kimsa puñalkunata aptakurkur aywar Absalónta encina yöracho warkaraykaqta shonqunpa tuksiriykurqan.
15 Tsaypitanami Joabpa yanapaqnin chunka mözukuna Absalónta jirurupaykur pasarpatsirqan.
16 Nirkurnami *cornëtata Joab tukatsiptin Israel soldädunkunata manana qatikacharqannatsu.
17 Absalónpa ayanta juk uchkuman winarkurmi jananman atska rumikunata qotupäkurqan. Davidpa contran Israel soldädukunanami qeshpir wayinpa aywakärirqan.
18 Nawpatanami Absalónqa Reypa Pampan nishqancho monumentuta ruratsirqan kayno nir: “Manami tsurïpis kantsu jutïta aparänanpaq”.
Nirkurnami tsay monumentupa jutinta churaparqan Absalón jutin kananpaq. Tsaymi kananyaqpis tsay monumentuta “Absalónpa monumentun” nipäkun.
Absalón wanushqanpita David waqashqan
19 Absalónta wanuykatsiptinnami Sadocpa tsurin Ahimaas Joabta kayno nirqan: “ ‘Chikishuqnikipa makinpita TAYTA DIOS salvashushqankinami, tayta’ nir wilanäpaq rey Davidman jukla aywashaq”.
20 Niptinmi Joab kayno nirqan: “Tsurin wanushqan mana ali wilakuy kaykaptinqa manami qamtsu rey Davidta wilaq aywanki, sinöqa juk wilatsun. Ali wilakuy kaptinmi itsanqa wilaq aywankipaq”.
21 Nirkurnami Etiopíapita kaq runata Joab kayno nirqan: “Lapan rikashqaykikunata wilanaykipaq rey David kaqman ayway”.
Tsayno niptinmi Joabpa nawpanman qonqurpakurir warakayla aywarqan wilananpaq.
22 Tsaypita Sadocpa tsurin Ahimaas Joabta yapay kayno nirqan: “Imano kaptinpis tsay Etiopía runapa qepanta aywashaq”.
Tsayno niptinmi Joab kayno nirqan: “¿Imanirtaq aywayta munaykanki, hïju? Wilashqaykipita manami imatapis pägashunkipaqtsu”.
23 Tsayno niptinpis Ahimaas kayno nirqan: “Imano kaptinpis wilanäpaq aywashaq”.
Tsaymi Joab kayno nirqan: “Aywayta munarqa ayway imaypis, ari”.
Tsayno niptinmi Ahimaasqa pampapa aywaq chaki nänipa warakayla aywar Etiopía runata yalirqan.
24 Markaman yaykuna ruri kaq punkuchömi David jamaraykarqan. Marka täpaq runanami punku janan azoteaman witsarkur rikachakuykashqancho rikarqan juk runa warakayla aywaykämuqta.
25 Tsawraqa qayakur rey Davidta wilaptin kayno nirqan: “Kikilan shamurqa ali wilakuytami apaykämunqa”.
Tsay runa yaykuykaptinnami
26 marka täpaq runa rikarqan yapay juk runa warakayla aywaykämuqta. Tsaymi punku täpaykaq runaman kayno nir qayakurqan: “¡Mas juk runanami cörriykämun!”
Niptin David kayno nirqan: “Paypis ali wilakuytami capaz apaykämun”.
27 Tsaymi marka täpaq runa kayno nirqan: “Puntata cörrimuq kaqqa Sadocpa tsurin Ahimaasnömi cörriykämun”.
Tsayno niptinmi David kayno nirqan: “Ahimaas karqa ali wilakuytami apaykämun. Payqa ali runami”.
28 Tsawraqa chayaykur rey Davidta Ahimaas winchikushpan nawpanman qonqurpakuykurqan urkunpis pampaman töpashqanyaq. Nirkurmi kayno nirqan: “TAYTA DIOS alabashqa kaykulätsun. Paymi lapan chikishuqnikikunata ushakätsishqa”.
29 Tsawraqa rey David tapurqan: “Tsurï Absalónqa ¿aliku kaykan?”
Niptinna Ahimaas kayno nirqan: “Yanapashuqniki Joab kachamashqan hörami mayashqä runakuna büllata rurarkaykaqta. Itsanqa manami musyätsu ima pasashqantapis”.
30 Tsawraqa rey David nirqan: “Washa lädulacho shuyaykämay”.
Niptinmi washa lädunman witiykur shuyararqan.
31 Tsaypitanami Etiopía runa chayaykur kayno nirqan: “Tayta David, qampaq ali wilakuytami apamushqä. Kanan junaqmi lapan chikishuqnikikunapita TAYTA DIOS salvashushqanki”.
32 Tsawraqa rey David kayno nirqan: “Tsurï Absalónqa ¿aliku kaykan?”
Niptinmi Etiopía runa kayno nirqan: “Qamta chikishuqnikikunaqa lapanpis ojalä tsay mözuno ushakanman, tayta”.
33 (19.1) Tsayta mayaykushpanmi rey Davidqa marka yaykuna punku janancho kaq cuartuman ataypa atar waqaraykar witsar kayno nirqan: “¡Ay Absalón! ¡Ay Absalón! ¡Qam wanunaykipa trukanqa noqa wanüman karqan, hïju! ¡Ay Absalón! ¡Ay Absalón!”
Ichic wilacuycuna
^ 18.11 Juk siclo qellayqa juk killa arur gänashqannömi karqan.
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
