2 Samuel 19:1-43
19 (2) Tsawraqa Joabta wilapäkurqan tsurin Absalónpaq pasaypa lakikur rey David waqaykashqanta.
2 (3) Tsaymi contrankunata vincishqanpita kushikärinanpa trukanqa tsurinpaq rey David lakikuptin wakin runakunapis pasaypa lakikurqan.
3 (4) Guërrapita qeshpiq runakuna pasaypa penqaytukushqa kutishqannömi paykunapis pasaypa penqaytukushqa kutipäkurqan.
4 (5) Rey Davidnami makinwan qaqlanta tsapakurkur fiyupa qapararqan kayno nir: “¡Ay Absalón! ¡Ay Absalón! ¡Ay tsurilay tsuri!”
5 (6) Tsaymi David waqaykashqan kaqman aywaykur Joab kayno nirqan: “Kikikitapis, olqu tsurikikunatapis, warmi tsurikikunatapis, warmikikunatapis y *concubïna warmikikunatapis salvarkaykaptï Absalónpaq tsayno waqarqa manakaqmanmi churarkaykämanki.
6 (7) Qamqa chikishuqnikikunata kuyanki y kuyashuqnikikunatami chikinki. Qamtaqa manami imapis qokushunkitsu lapan soldäduykikuna y capitanninkuna wanuptinpis. Absalón kawaptinqa lapanï wanuptïpis kushikunkimanchari karqan.
7 (8) Waqanaykipa trukanqa jukla aywaykur soldäduykikunata felicitay. Imatapis mana niptikiqa kanan tsakaymi lapan aywakärinqa. Paykuna kachariykushuptikiqa mözu kashqaykipita hasta kananyaq mana nakashqaykitami nakankipaq. Rasun kaqtami TAYTA DIOSPA jutincho niykä”.
8 (9) Tsayno niptinmi rey Davidqa urarpur marka yaykuna punku nawpanman jamakurqan. Tsaycho jamaraykashqanta musyaykurmi lapan runakuna kushikur Davidpa nawpanman juntakarqan.
Davidpa contran pelyaq Israel runakunaqa qeshpirmi wayinkunapa aywakärirqan.
Jordán mayuman David chayashqan
9 (10) Tsaypitanami lapan trïbu Israel runakuna* kikinpura rimanakur kayno nipäkurqan: “Filisteo runakunapa y wakin chikimaqnintsipa munayninpita rey Davidmi jorqamashqantsi. Kananqa Absalón qatikachaptinmi juk lädupa qeshpir aywakushqa.
10 (11) Mandamaqnintsi rey kananpaq churashqantsi Absalónqa guërrachömi wanushqa. Kananqa jukla Davidta kutitsimushun rey yapay kananpaq”.
11 (12) Tsayno parlashqanta mayaykurmi David juk kachata kachakurqan Sadoc y Abiatar cürakunaman Judá trïbu mayor runakunata kayno nipäkunanpaq: “Rey David kaynömi nin: ‘Palaciüman kutitsimänanpaq Israel runakuna wilanakuykaptinqa ¿imanirtaq qamkunapis jukla mana shamunkitsu kutitsimänaykipaq?
12 (13) Qamkunapa ayluyki y yawar mayiki kaykaptïqa ¿imanirtaq jukla mana kutitsimankitsu?’ ”
13 (14) Tsaynölami tsay cürakunata David encargakurqan Amasatapis kayno ninanpaq: “Rey David kaynömi nin: ‘¿Manaku yawar mayï kaykanki?* Kananpitaqa Joabpa trukan lapan soldädükunapa capitannin kanaykipaqmi churashayki. Tsay niykashqäta mana cumpliptïqa Tayta Dios castigamätsun’ ”.
14 (15) Tsayno niptinmi lapan Judá runakunata Amasa shakyätsirqan Davidta kutitsimunanpaq. Lapanpis tsay yarpayla kashpanmi Davidman kacharqan kayno nir: “Tayta David, rey kanaykipaq lapan soldäduykikunawan kutikalämuy”.
15 (16) Tsawraqa rey David kutishpan chayarqan Jordán mayuyaq. Judá runakunanami Gilgalman aywapäkurqan chaskikärinanpaq y Jordán mayuta tsimpatsimunanpaq.
16 (17) Tsaymanmi Gerapa tsurin Simeipis Judá runakunawan apurädu aywarqan rey Davidta chaskikärinanpaq. Simeiqa Bahurim markapita Benjamín trïbu runami karqan.
17 (18) Simeiwanmi aywarqan Benjamín trïbu waranqa (1,000) runakunapis. Tsaynölami Saúlpa ashmaynin Sibapis chunka pitsqa tsurinkunawan y ishkay chunka (20) ashmayninkunawan aywar rey David manaraq chayaptin Jordán mayuman puntata chayapäkurqan.
18 (19) Chayaykurmi väduta pasapäkurqan rey Davidta y aylunkunata pasatsimunanpaq.
Simeita David perdonashqan
Jordán mayuta rey David tsimpananpaqna kaykaptinmi Davidpa nawpanman qonqurpakuykushpan Gerapa tsurin Simei
19 (20) kayno nirqan: “¡Ay tayta! Jerusalénpita aywakushqayki junaq qamta saqmar qayapashpä pasaypa jutsatami rurashqä.* Tsaypita perdonaykalämay. Qammi mandamaqnï rey kaykanki. Jutsa rurashqäta qonqaykulayna, tayta.
20 (21) Qamta rabyanätsishqäpita lakikurmi José aylu runakunapitapis* mas puntata chaskikunäpaq shamushqä”.
21 (22) Tsayno niptinmi Sarviapa wawan Abisai Davidta kayno nirqan: “Tayta Dios churashqan rey kaykaptiki qayapäshushqaykipita kay runa wanutsun”.
22 (23) Tsayno niptinmi Abisaita y Joabta David kayno nirqan: “Sarviapa wawankuna, ¿imanirtaq rayan wishlaykita jatimur lutanta ruratsimayta munarkaykanki? Rey kanäpaq yapay kutiykaptïqa kanan junaq pitapis ama wanutsishuntsu”.
23 (24) Tsaypitami Diospa jutincho promitir Simeita kayno nirqan: “Manami wanutsishaykitsu”.
Mefi-bosetta David kuyapashqan
24 (25) Tsaynölami Saúlpa wilkan Mefi-bosetpis rey Davidta chaskikunanpaq aywarqan. Payqa rey David aywakushqanpita kutimunanyaqmi pasaypa lakikur chakinta maylakurqantsu, shapranta rutukurqantsu ni röpantapis taqshakurqantsu.
25 (26) Tsaymi Jerusalénpita chaskikuq chayaptin David kayno nirqan: “¿Imanirtaq noqawan mana aywarqaykitsu?”
26 (27) Tsayno niptinmi Mefi-boset kayno nirqan: “Tayta rey, puriyta mana puëdishpämi yarparqä bürruta muntakurkur aywayta. Tsayno kaptinpis bürruta sillapämänanpaq niykaptïmi ashmaynï Siba kachariykamar shakamurqan.
27 (28) Nirkurmi manakaqkunata noqapita wilapäshushqanki.* Tsayno kaptinpis Tayta Diospa *angilninno kaptikimi noqaläqa listu kaykä imata nimashqaykitapis ruranäpaq.
28 (29) Saúl aylu kaptïmi noqata y taytäpa wakin aylunkunata wanutsinaykipaq karqayki. Tsaypa trukanqa kuyapämashpaykimi mësaykicho mikunäpaq shuntamarqayki.* Tsayno kuyapaykämaptikiqa ¿imatanataq mas manaküman, tayta?”
29 (30) Tsayno niptinmi David kayno nirqan: “Amana tsaypita parlashunnatsu. Tsayno kaptinqa Siba chaskishqan chakrakuna pulan qampaq katsun y pulan paypaq katsun”.
30 (31) Tsawraqa Mefi-boset kayno nirqan: “Lapan tsay chakrakuna paylapaqna kakutsun, tayta. Palaciuykiman ali kutimushqaykipitami kushishqa kaykä”.
Barzilaipita David despidikushqan
31 (32) Galaad particho kaykaq Rogelim markapitami Barzilai urämurqan Jordán mayuta rey Davidta pasatsimunanpaq.
32 (33) Tsay runa karqan pusaq chunka (80) watayuqmi. Paymi rïcu kashpan Mahanaimcho rey David kaykaptin mikuyta kamariparqan.*
33 (34) Tsaymi Barzilaita rey David kayno nirqan: “Jerusalénman aywakushun. Tsaychömi lapan munashqaykita kamaripäshayki”.
34 (35) Tsawraqa Barzilai kayno nirqan: “Jerusalénman aywanantsipaq awkinnami kaykä, tayta. Juk ishkay watalanachari kawashaq.
35 (36) Pusaq chunka (80) watayuqnami kaykä, tayta. Mikurpis ni upurpis gustunta manami tarïnatsu. Warmi o olqu cantaykashqantapis manami tantiyänatsu. Tsayno kaykarqa ¿imapaqnataq afannikipaq aywashaqpis?
36 (37) Jordán mayuta tsimpanaykiyaq yanaqashqaläpitaqa manami merecïtsu wayikicho ashmamänaykita.
37 (38) Jerusalénman aywanäpa trukanqa markäpa kutikushaq. Tsaycho wanukuptïmi taytä y mamä pamparashqanman pampapäkamanqa. Noqapa trukä kay tsurï Quimamta yanapashunaykipaq pushakulay”.
38 (39) Tsayno niptin rey David kayno nirqan: “Tsawraqa Quimam noqawan aywatsun. Qampa trukayki paytanami yanapashaq. Imatapis manakamaptikiqa qamtapis kamaripäshaykimi”.
39 (40) Jordán mayuta lapan runakunawan rey David pasarirnami Barzilaita mutsarkur ali kawananpaq bendicionninta qorqan. Nirkurmi wayinpa Barzilai kutikurqan.
40 (41) Tsaypitanami Quimamwan rey David Gilgalpa aywarqan. Tsaynölami Davidwan aywarqan Judá runakuna y pulan Israel runakunapis.
Israel runakunawan Judá runakuna rimanakushqan
41 (42) Gilgalcho juntakarmi Israel runakuna rey Davidta kayno nipäkurqan: “¿Imanirtaq Judá runakunala soldäduykikunata, yanapashuqnikikunata y ayluykikunata Jordán mayuta tsimpatsimushushqanki? Tsayno rurarqa ¿paykunalapa mandaqnin rey kanaykitaku munarkaykan?”
42 (43) Tsawraqa Judá runakuna kayno nipäkurqan: “¿Imanirtaq qamkunaqa tsaypita rabyashqa karkaykanki? Noqakunaqa manami imatapis qaramänan* raykutsu ni kamaripämänan kashqatsu yanapashqä, sinöqa Judá trïbupa aylun kapäkushpämi”.
43 (44) Tsayno niptinmi Judá runakunata Israel runakuna kayno nipäkurqan: “Noqakunaqa chunka trïbukunami karkaykä. Tsaymi rey Davidqa chunka kuti mas noqakunapa mandamaqnï rey kaykan. Tsayno kaykaptinqa ¿imanirtaq manakaqman churaykämanki? Tsaynöpis noqakunami puntata manakärirqä rey kayman yapay kutinanpaq”.*
Tsayno niptinmi Judá runakunaqa masraq rabyakärirqan Israel runakunapita.
Ichic wilacuycuna
^ concubïna Concubïnaqa manami runapa legïtimu warmintsu karqan. Concubïnanwanqa manami pakaylapatsu purikurqan, sinöqa warminwannömi tarqan (Jue. 8.31; 19.1-4; 2Sam. 5.13; 15.16; 16.21-22; 20.3; Est. 2.9).
^ 19.9 Lapan trïbu Israel runakunapaq parlarqa norti läducho taq chunka trïbukunapaqmi parlaykan. Judá y Simeón trïbu runakunapaq manami parlantsu.
^ 19.13 Amasaqa Davidpa panin Abigailpa wawanmi karqan. Tsaynöpis paymi karqan Absalónpa soldädunkunapa capitannin. Tsaypita musyanaykipaq liyinki 2Sam. 17.25; 1Crón. 2.15-17.
^ 19.19 2Sam. 16.4-14.
^ 19.20 José aylu runakunapaq parlarqa norti kaq läducho taq chunka trïbu Israel runakunapaqmi parlarqan.
^ 19.27 2Sam. 16.1-4.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 19.28 2Sam. 9.7, 13.
^ 19.32 2Sam. 17.27-29.
^ 19.42 Wakin runakunaqa regalamänan nipäkun.
^ 19.43 2Sam. 19.9-10.
